Matagumpay na pagbubuo ng balangay ng PKM
Matagumpay na naidaos nitong Marso ang unang kumperensya ng pagbubuo ng balangay ng Pambansang Katipunan ng mga Magbubukid (PKM) sa isang baryo sa South Quezon. Sa kabila ng tuluy-tuloy na operasyong militar ng kaaway, nakadalo sa kumperensya ang 56 na kinatawan ng mga organisasyong masa ng iba-ibang sektor, kasama ang mga grupo ng mga bata.
Hinirang ng komite ng Partido sa teritoryo ang pamunuan na bumubuo sa lupong tagapagpaganap nito at mga kasapi sa komite ng organisasyon, ekonomya, kalusugan, depensa at edukasyon.
Bago naidaos ang kumperensya, dumaan muna sa proseso ng pagbaka sa konserbatismo sa gawaing masa ang Bagong Hukbong Bayan (BHB) at sangay ng Partido sa lokalidad (SPL). Dahil sa konserbatismo, naging mabagal ang proseso ng pagtataas ng antas ng organisasyon ng masa sa mga baryo kahit may batayan na para gawin ito. Mula lamang 2003 sumigla nang husto ang pag-oorganisa sa baryo hanggang sa umabot na sa kasalukuyang lakas at latag ang organisasyong masa.
Mahigpit na nagtulungan ang BHB at SPL para maihanda ang rekisitos upang mailunsad na ang kumperensya na nakatakdang idaos noon pang nakaraang taon.
Sininop ang panlipunang pagsisiyasat ng baryo. Ayon sa pagsisiyasat, hindi tipikal na sakahan ang lugar. Malawak ang mga niyugan at sagingan dito na tadtad ng pulo-pulong kaingin na pag-aari ng maliliit na magsasaka. Aabot sa 40% ng lupain ay klasipikadong pampublikong lupain. Sa mga tituladong niyugan na kalimita�y pag-aari ng mga prominenteng pamilya, karaniwang isa hanggang dalawang ektarya naman ang pinapaalagaan sa mga magsasaka.
Napalalim at nakumpleto ang rebolusyonaryong kasaysayan ng baryo. Nagsimulang kumilos dito ang BHB noong 1981 at noong 1985 hanggang 1987 ay rumurok ang pagkilos ng mamamayan. Dala ng maling linya, tuluy-tuloy na humina ang kilusan noong huling bahagi ng 1987 hanggang 1989. Sa kabila nito, nanatiling nakatayo ang mga organisasyong masa at sangay ng Partido.
Noong 1990-92, hindi naging tuluy-tuloy ang pagkilos ng BHB sa baryo. Noong 1995 na lamang ito ganap na nabalikan ng mga Pulang mandirigma. Ang tuluy-tuloy na gawaing rekoberi sa lugar ay isinagawa sa balangkas na ng pagpapatupad ng Ikalawang Dakilang Kilusang Pagwawasto.
Isang salik sa matagumpay na pagbawi sa baryo ang paglahok ng BHB sa gawaing produksyon at pagpapagana sa suyuan tungo sa malawakang paghawan ng lupa para gawing mga kaingin. Nadagdagan ang kita ng taumbaryo dahil unti-unti na silang napabaling sa produksyon ng kopra at iba pang tanim na pangkonsumo mula sa simpleng pagbebenta ng puso at bunga ng saging.
Katangi-tangi din ang naging papel ng organisadong kababaihan sa muling pagpapatibay ng base at paglalatag ng pundasyon para sa pagbubuo ng mga samahang masa. Dahil karamihan sa kababaihan ay dati nang kasapi ng mga sangay ng Partido sa ibang baryo, malaki ang naitulong nila sa BHB at ibang kasapi ng SPL sa pag-oorganisa at pagbibigay ng mga pampulitikang pag-aaral. Kalaunan ay kinaya nilang maglunsad ng mga pag-aaral kahit wala ang mga Pulang mandirigma.
Damang-dama ang lakas ng impluwensya ng rebolusyonaryong kilusan sa baryo. Kinikilala maging ng mga kasapi ng barangay council ang mga rebolusyonaryong adhikain. Masigasig din ang paglilinis ng mga di kanais-nais na elemento at ahente ng kaaway. Mahusay na gumagana ang gawaing paniktik at sistema ng pag-uulat ng milisyang bayan (MB) at organisasyong masa para matiyak ang seguridad ng BHB at ng baryo. Maayos ang pagtangan sa mga alituntunin ng lihim na pagkilos upang hindi madampot ng militar ang mga tukoy na myembro ng Partido at organisasyong masa.
Sa ngayon ay organisado na ang mahigit 70% ng populasyon ng baryo. Mayorya ng mga kasapi ay nakatapos na ng mga batayang edukasyong masa. Subok din ang masa sa mga pakikibaka sa rebolusyong agraryo at sa pagharap sa matitinding operasyong militar ng kaaway. Lumalahok ang MB sa mga taktikal na opensiba bilang bahagi ng kanilang pagsasanay-militar.
Importanteng sangkap ang pagtatayo ng mga samahang masa sa baryo sa higit na pagdaluyong ng rebolusyonaryong kilusan. Bunga nito, inaasahan ang mas malalim na pamumuno ng Partido, ang paglakas ng BHB at ang ibayong pagtaas ng antas ng organisasyong masa. Ito ang magsisilbing bag-as ng pagsulong sa harap ng tumitinding militarisasyon at sumisidhing kontra-rebolusyonaryong digma.
| 
