Mga Ulat Koresponsal:
Makatarungan ang pagpaparusa kina Mayor Platon at Rep. Punzalan -- Melito Glor Command

Read this article in English

Binaybay sa magkasunod na pahayag ng Melito Glor Command (MGC) na ipinaabot sa AB kamakailan ang mga dahilan sa likod ng paggawad ng rebolusyonaryong hustisya kina Mayor Cesar Platon ng Tanauan, Batangas noong Mayo 7 at Rep. Marcial Punzalan ng Quezon noong Mayo 12.

Anang MGC, ikinagalak ng mamamayan ang pagpaparusa kina Platon at Punzalan sapagkat ang mga ito ang "pinakasagadsagaring kontra-rebolusyonaryo sa hanay ng naghaharing uri na naging simbolo ng pang-aapi at kontra-rebolusyonaryong paniniil." Ang pagpaparusang ito ay babala sa naghaharing uri na "hindi na nila magagawa nang walang taning ang paniniil at pagsasamantala sa masang anakpawis nang hindi tinatamasa ang haplit ng rebolusyonaryong hustisya."

Sumusunod ang mga inihanay ng MGC bilang batayan ng pagpaparusa kay Mayor Cesar Platon:

1. Pagiging aktibong kontra-rebolusyonaryo at anti-mamamayang alkalde ng Tanauan; pagtugis sa mga lider at organisador ng hayag na demokratikong kilusang masa;
2. Pagkandili at pakikinabang sa malalaking sindikato sa carnapping, hijacking ng mga container van, gunrunning at droga;
3. Pagpatay, panggigipit at pananakot sa mga katunggali sa lupa at pangangamkam ng lupa sa Tanauan; paggamit ng pwersa ng sandata para lutasin ang sigalutan sa kanyang mga katunggaling personal o pampulitika.
4. Pinakahuling kasalanan niya ang pagbitag at pagpapahuli sa sugo ng MGC na kakausap sana sa kanya kaugnay sa eleksyon.

Ayon sa MGC, hindi humantong sa reaksyunaryong korte ang mga kasong pagpatay ni Platon sapagkat namayani sa kanyang mga inagrabyado ang takot. "Sa hukumang bayan ng rebolusyonaryong gubyerno nakasumpong ng lakas ng loob ang mga inagrabyado ni Platon na magsampa ng demanda at humingi ng katarungan," dagdag ng MGC.

Ang sumusunod naman ang ilang ihinanay ng MGC bilang batayan ng pagpaparusa kay Rep. Marcial Punzalan:

1. Pagkandili sa mga kontra-rebolusyonaryong aktibidad ng taksil na si Leopoldo "Hector" Mabilangan para hatiin, intrigahin at sulsulan ang malawakang pagdedemoralisa at pagpapasuko sa mga pwersang gerilya;
2. Pagsamantala at pakikinabang sa kontra-rebolusyonaryong opensiba sa propaganda ni Mabi- langan sa ilalim ng rehimeng Ramos para pabanguhin ang sarili sa publiko at linlangin ang mamamayan, para sa sariling pampulitikang interes;
3. Pagpondo sa Kanayunan Foundation, Inc. (KFI), isang huwad na kilusang kooperatibang pinamunuan ni Mabilangan para sa kontra-insureksyon at pasipikasyon, na nanabotahe sa mga larangang gerilya sa Quezon at Batangas.

Bandang 1995, sinuspinde ng MGC ang pagpapatupad ng parusang kamatayan kay Punzalan. Ito'y matapos manahimik ang huli sapul nang parusahan ng rebolusyonaryong kilusan si Mabilangan, manyutralisa ang KFI at maramdaman niya ang muling paglakas ng armadong kilusan sa Timog Katagalugan. Ihinarap lamang ng MGC kay Punzalan ang kanyang mga pagkakasala at binalaan siya tungkol sa mga ito.

Subalit nitong 1998 at 1999, muling aktibong nakikoro si Punzalan sa pakanang psy-ops ng reaksyunaryong AFP. Tinangka niyang intrigahin at siraan si Kasamang Gregorio "Ka Roger" Rosal at ang mga lider ng kilusan sa rehiyon sa pamamagitan ng mga paratang na diumano'y mayroon silang mga nakatagong yaman at marangyang namumuhay. Namayagpag si Punzalan sa pagbibigay ng mga panayam sa radyo at mga nangungunang dyaryo.

Bunga ng mga ito, tinapos na ng MGC ang mahabang panahon ng pagbibigay-pagkakataon kay Punzalan na talikuran ang mga kontra-rebolusyonaryong aktibidad.

Tinuligsa ng MGC ang paggamit ng rehimeng Macapagal-Arroyo sa mga naturang pagpaparusa bilang katwiran sa paglulunsad ng mga opensibang militar laban sa rebolusyonaryong kilusan. Sinabi ng MGC na ni saglit, hindi naman tumigil sa paglulunsad ng mga kontra-rebolusyonaryong opensibang militar ang AFP at PNP sa Timog Katagalugan at sa buong kapuluan kahit nang mapatalsik si Estrada. Ito'y sa kabila ng muling pagbubukas ng usapang pangkapayapaan at diumano'y pagsasaisantabi ni Macapagal-Arroyo sa patakarang todo-digma ni Estrada.

Ayon pa sa MGC, "Sing-aga pa ng Mayo 3 (ilang araw bago ang pagpaparusa ng BHB kina Platon at Punzalan - AB), nakakuha ang MGC ng kopya ng confidential presidential instruction mula kay Macapagal-Arroyo at DND Sec. Angelo Reyes na nag-aatas para sa intensipikasyon ng mga operasyong militar para mapalakas ang pusisyon ng GRP sa negosasyong pangkapayapaan sa NDFP" at pagkaitan ang NDFP ng pagkakaton na magamit ang usapan para makapagpalakas.

Hunyo 2001
Edisyong Pilipino

	Editoryal: Ilantad at labanan ang mga maka-imperyalista at anti-mamamayang patakaran at hakbangin ng rehimeng US-Macapagal-Arroyo
	Power Reform Act: Nagbibigay-daan sa higit na dayuhang dominasyon sa ekonomya
	Singil sa serbisyong tubig, tataas
	Pagtaas ng presyo ng mga produktong petrolyo: Patuloy na pagkakamal ng superganansya ng mga dambuhalang kumpanya ng langis
	Pananalanta ng pasistang estado: Sa ikalawang kwarto ng taon
	Mga Ulat Koresponsal: Tinuligsa, tumitinding militarisasyon sa Oriental Mindoro
	Mga Ulat Koresponsal: Makatarungan ang pagpaparusa kina Mayor Platon at Rep. Punzalan -- Melito Glor Command
	Pagsuspinde ng GRP sa usapang pangkapayapaan, binatikos ng NDFP
	Bwitre ng Cagayan Col. Aguinaldo, pinarusahan ng BHB
	Hudyat sa pag-iibayo ng pandaigdigang pakikibaka: Pandaigdigang liga sa pakikibaka ng mga mamamayan, itinatag
	Mga balita ng pakikibaka