Mga Ulat Koresponsal:
Ibaba ang pasahe ng sitaw, sigaw ng Bulacan
Kasalukuyang isinusulong ng mga organisadong magsasaka sa silangang Bulacan ang isang kampanya para mapababa ang pasahe ng sitaw, mula P3 tungong P2 bawat tali. Ang kampanya ay isinusulong sa gitna ng mga pagsisikap na organisahin ang balangay ng Pambansang Katipunan ng mga Magbubukid (PKM) sa lugar.
Ayon sa pahayag ng PKM sa silangang Bulacan, sa pasaheng P3 bawat tali, P9,000 ang kabuuang kita ng mga byahero bawat byahe. Subalit P2,100 lamang ang gastos ng mga byahero para sa krudo, parking fee, pakain at upa sa drayber at pahinante. Lumalabas na P6,900 ang netong kita ng mga byahero bawat byahe.
Anang PKM: "Walang kahirap-hirap, tumataginting na P6,900 ang linis na kita sa isang byahe lang ng sitaw. Samantalang tayong nagkakandakuba sa apat na buwan sa pagsisitaw ay walang nakakamit kundi ang humahabang listahan ng utang!"
Dagdag ng PKM, "Kinatas na ng mga financier-byaherong ito ang tuyot na kabuhayan natin! Napakataas na tubo sa abono't pestisidyo, pagpapatong ng mataas na interes sa ating mga bale at utang, napakamahal na upa sa makina lalo na't kwentahan ng pakturahan (listahan ng gastos), binarat na presyo ng sitaw! Hanggang sa pasahe, tinataga pa rin tayo!"
Kinundena ng PKM ang mga komersyante-panginoong maylupa na nagsasamantala sa mga magsasaka. Ayon sa PKM, "kaisa natin ang BHB sa isinusulong na pakikibaka dahil ang interes ng magsasaka ang pangunahing nilalaman ng programa ng PKP-BHB sa demokratikong rebolusyong bayan."
|
