Sa Ibayong Dagat:
Bitag

Read this article in English

Sa pamamagitan ng tinagurian nitong "roadmap" tungo sa kapayapaan, nais iligaw ng US ang pakikibaka ng mga Palestino at patibayin pa ang kontrol sa Middle East

Hindi na iilang pagkakataong "namagitan" ang US sa Palestine at Israel, ngunit sa halip na malutas ay lalo lamang umigting ang mahigit kalahating siglo nang tunggalian. Nabigo ang lahat ng nakaraang mga inisyatiba ng US dahil hindi nito nilulutas ang pinakaugat ng problema�ang pananakop at agresyon ng Israel sa Palestine.

Wala sa moral na katayuan ang US para tumayong tagapamagitan sa tunggalian. Hindi lingid sa kaalaman ng mga Palestino na sinusuportahan ng US ang Israel. Lahat ng mga nagdaang "planong pangkapayapaang" inihapag ng US ay kiling sa interes ng mananakop. Sa lahat ng mga hakbanging ito, ang tanging nilalayon ng US ay paluhurin ang Palestine at tiyakin ang seguridad at preserbasyon ng Israel, ang pinakaestratehikong alyado nito sa Middle East.

Nitong huli'y ni hindi pinagsisikapan ng US na ikubli pa ang pagkampi nito sa Israel. Noong nakaraang taon, nagpasa ang kongreso ng US ng batas na kumikilala sa lunsod ng Jerusalem bilang kabisera ng Israel, gayong isa ito sa pinakasusing mga usaping pinagtutunggalian at naging sanhi ng pagkabigo ng negosasyon noong 2000. Ngayon naman, naglalaan ang US ng aabot sa $55 bilyong ayuda sa Israel.

Nang hindi matuloy ang inasahang "pinal na kasunduan" noong Setyembre 2000, lalong bumwelo ang marahas na pananakop ng Israel sa mga teritoryo ng Palestine. Sa kabilang panig, muling sumiklab ang intifada o pag-aalsa ng mga Palestino.

Kinukundena ng US bilang terorismo ang lehitimo at makatarungang armadong paglaban ng mga Palestino para sa pagpapasya-sa-sarili, samantalang ni ha ni ho'y wala itong sinabi laban sa ekspansyunismo at pandarahas ng Israel sa Palestine.

Ang "roadmap" ng US

Isa na namang panibagong "planong pangkapayapaan" ang pinapakana ngayon ng US para sa tunggaliang Palestino-Israeli. Higit kaysa dati, pwersado ngayon ang US na ihanap ng solusyon ang tunggalian dahil nangangamba ito sa pagsidhi ng mga sentimyentong anti-US sa Middle East sanhi ng pagsakop nito sa Iraq. Umaasa ang US na kung malulutas ang tunggaliang Palestino-Israeli, huhupa ang galit ng mga Arabo at magiging mas paborable ang sitwasyon para sa mga imperyalistang interes sa rehiyon.

Ang bagong plano ay tinaguriang "roadmap" o mapa ng daan tungo sa kapayapaan sa Palestine. Kinaladkad ng US ang United Nations, European Union at Russia at binuo ang tinaguriang Quartet (grupo ng apat) para ipinal at pabanguhin ang "roadmap" at para gamitin ang mga ito sa paghikayat at pagpresyur sa Palestine.

Katulad ng nakaraang mga pakana ng US, tagibang ang solusyong inihahapag ng ipinamamaraling "roadmap." Pinapatawan nito ng napakabibigat na kundisyon ang pagkilala at pagtatatag ng malayang estado ng Palestine.

Unang-una na, dapat umanong itigil ng mga Palestino ang mga armadong pag-atake at supilin ang lahat ng mga armadong grupong nasa gulugod ng pakikibaka ng mamamayang Palestino. Pinalalabas nitong ang karahasan ng Israel ay pagtatanggol lamang sa sarili. Makakamit lamang umano ng Palestine ang kapayapaan at kasarinlan kung ititigil nito ang armadong pakikibaka.

Para rito, dapat umanong itayo ang isang bagong gubyernong Palestino na mapagpasyang susupil sa mga "terorista." Nais ng US na alisan ng kapangyarihan si Arafat dahil tumatanggi siyang supilin ang mga militanteng armadong grupong tulad ng Hamas at Islamic Jihad. Bukod rito, nais ng US na putulin ang suportang tinatanggap ng mga militanteng grupo mula sa PNA.

Matapos ang ilang linggong pambabraso ng US at ng Quartet, pinagtibay ng parlamentong Palestino ang bagong gubyernong pamumunuan ni Mahmoud Abbas bilang prime minister. Sinusuportahan ng US ang paghirang kay Abbas, gayundin kay Mohammed Dahlan bilang espesyal na ministro para sa mga usaping panseguridad, dahil nagpapahayag sila ng kahandaang disarmahan ang mga armadong militante upang bigyang-daan ang "roadmap."

Binasbasan ni Arafat ang paghirang kina Abbas at iba pa sa bagong gabinete ng PNA kahit na naging bantulot siya sa paghirang kay Dahlan. Gayunman, mananatili pa rin si Arafat bilang pangulo ng PNA at mapagpasya pa rin siya sa pagbubuo ng mga saligang patakaran at kapasyahan ng PNA.

Tiyak na kabiguan

Ilang oras lamang matapos pagtibayin ang bagong gubyerno, isang Palestinong suicide bomber ang nagpasabog ng bomba sa lunsod ng Tel Aviv, kabisera ng Israel. Tatlo ang namatay at humigit-kumulang 40 ang nasugatan sa insidente.

Inako ng mga militanteng grupong Hamas at Al Aqsa Martyrs Brigades ang pagpapasabog. Anila, hindi sila magbababa ng armas hangga't walang nailalatag na solusyon sa tunggalian. "Bibirahin namin ang Zionistang kaaway sa lahat ng sulok ng Palestine hanggang magwakas ang pananakop," dagdag pa ng tagapagsalita ng Hamas.

Tahasang tinanggihan ng Hamas ang "roadmap" ng US. "Isa itong plano para likidahin ang adhikaing Palestino," anang lider nitong si Sheikh Ahmed Yassin.

Ipinakikita lamang ng mga ito na hindi mawawala ang matinding galit at hindi titigil ang armadong paglaban ng mga Palestino habang hindi napapalayas ang Israel at hindi naitatatag ang isang tunay na malayang estado ng Palestine.

Siguradong patuloy na yayanigin ng armado at di armadong paglaban ng mga Palestino at lahat ng mamamayang Arabo ang sabwatang US-Israel at ang imperyalistang paghahari sa Middle East. Ang landas tungo sa kapayapaan sa Palestine at sa buong rehiyon ay di hamak na mas masalimuot sa anumang "roadmap" na ilatag ng mga imperyalista.

07 Mayo 2003
Edisyong Pilipino

	Editoryal: Ibayong labanan ang papatinding militarisasyon sa Mindoro at ibang lugar
	Pagpaslang sa mga aktibista sa Mindoro: Malawakang galit, sumiklab laban sa 204th Brigade
	Davao City, laboratoryo para sa mga pasistang hakbangin
	Pananalanta ng Pasistang Estado: Tumitindi ang mga paglabag sa mga karapatang-tao
	Ika-100 pagdiriwang ng Mayo Uno sa bansa: Mga hamon sa kilusang manggagawa
	Libu-libong manggagawa, dumagsa sa lansangan noong Mayo 1
	Naghahanap ng mas maginhawang buhay
	Kabulukan ng RPA-ABB, ibayong nabubunyag
	Sa Ibayong Dagat: Bitag
	BALITA