Isa pang taong krisis at paghihirap...
Pagsusuri sa ekonomya: lagpas sa usapin ng estadistika

Ginagamit ng gubyerno ang mga estadistika o datos nito upang lumikha ng baluktot na larawan ng ekonomya o tahasang magsinungaling tungkol sa tunay na kalagayan nito. Kayat mahalaga para sa mga rebolusyonaryo na mahusay na suriin ang mga inilalabas na datos ng gubyerno upang mapabulaanan ang mga kasinungalingan nito, ilantad ang tunay na kalagayang panlipunan at imulat at pakilusin ang mamamayan sa wastong daan ng rebolusyonaryong paglaban.

Sa pagsusuri sa mga upisyal na estadistika ng gubyerno sa Pilipinas, unang-una�y kinakailangang tanganan ang punto de bistang syentipiko, makauri at nakabatay sa kasaysayan. Ibig sabihin, dapat sapulin ang mga pundamental na katangian ng umiiral na malakolonyal at malapyudal na sistemang panlipunan upang wastong maisabalangkas, maunawaan at mahubaran ang inilalabas na datos at mga pagsusuri ng gubyerno; at upang di mahulog sa patibong ng repormismo o ang pagkakamaling magbuo ng programa at mga patakaran para sa kaunlarang pang-ekonomya na hindi nagtutuon ng pangunahing pansin o nagbabalewala sa rebolusyong panlipunan bilang higit na mas saligang kundisyon upang tunay na umunlad ang ekonomya.

Sa pamamagitan ng kolonyal na kapangyarihan ng US at ng sunud-sunod na papet na gubyerno, hinadlangan ng imperyalismo ang industriyalisasyon ng ekonomya ng Pilipinas at pinanatili itong agraryo sa kalakhan. Ang pinahintulutang isang antas ng manupaktura ay nakaasa sa inaangkat na materyales at nakatuon naman sa pag-eeksport. Ito ay upang ang Pilipinas ay magsilbing tagasuplay ng murang hilaw na materyales at murang lakas-paggawa sa mga dayuhang malaking kapitalista.

Ang ekonomya ng Pilipinas ay palagiang nasa krisis. Ilan sa mga tampok nitong katangian ang sumusunod: (a) di-sapat na produksyong agrikultural dulot ng monopolyong pag-aari sa lupa at atrasadong sistema ng produksyon; (b) tuluy-tuloy na pag-iral at patuloy na lumalaking hukbo ng reserbang paggawa; (k) kawalan ng nagsasariling kakayahang lumikha o magmanupaktura ng kahit mga saligang pangangailangan ng bansa kapwa para sa gamit pamproduksyon at para sa indibidwal na konsumo; (d) mababang dagdag na halaga sa sektor ng manupaktura na nakasalalay sa importasyon at nakatuon sa eksport; (e) tuluytuloy na pagkasaid ng kapital dahil sa di pantay na kalakalan at paglimas ng kapital at tubo ng mga dayuhang malalaking kapitalista; (g) pagkabaon at pagkatali sa dayuhang pautang at tuluy-tuloy na debalwasyon ng piso laban sa dolyar.

Ang mga ito ay permanenteng tatak ng ekonomya ng Pilipinas.

Sa ilang panahon ay napagtatakpan ito ng pagbuhos ng dayuhang kapital na nag-uudyok ng artipisyal na aktibidad sa ekonomya. Kabilang dito ang pamumuhunan sa pamilihan ng stocks, sa real estate, sa pampublikong konstruksyon, at sa isang antas, sa mga export processing zone. Pinapalamutian lamang ng mga ito ang bulok na sistema. Hindi nagdudulot ang mga ito ng solido at pangmatagalang pakinabang sa usapin ng empleyo at kapasidad ng ekonomya sa produksyon. Ito ang nangyari sa mga taong 1993-96 at lalo na noong 1996 nang humugos papasok ang dayuhang pamumuhunang ispekulatibo¹ matapos todo-todong inilarga ng reaksyunaryong gubyerno ang liberalisasyon ng ekonomya alinsunod sa mga dikta ng imperyalistang amo nito.

Matapos magkamal ng tubo, simula 1997 ay mabilis na nilimas ng dayuhang malalaking kapitalista ang ipinuhunang kapital na nagbunsod ng mas malalang krisis sa pinansya at ekonomya. Hinubdan nito ng palamuti ang ekonomya at inilantad ang bulok na malapyudal na ubod nito�ang kawalan ng baseng industriyal at ang pagluluwas nito ng mga murang hilaw na materyales at murang lakas-paggawa bilang kakaragkarag na motor na nagpapatakbo sa Pilipinas.

Ang plano ni Estrada para sa ekonomya ay higit pang liberalisasyon upang lalong akitin ang dayuhang kapital. Isa sa mga layunin ng planong pagbabago sa konstitusyon ay ang pagbibigay sa mga dayuhang kapitalista ng mga karapatan at kalayaang dati�y tinatamasa lamang ng mga Pilipino, kabilang na ang pagari ng lupa, 100% pag-aari ng mga empresang lokal at iba pa. Ang mga desperadong patakarang ito ay bunga ng matinding kumpetisyon mula sa iba pang mga bansang malakolonyal at malapyudal sa Asya, Amerika Latina at Aprika sa pagganyak ng dayuhang kapital.

Ngunit bumuhos man ang dayuhang kapital sa Pilipinas, mauuwi lamang ito sa krisis na mas malalim sa naunang lundong dati nitong kinabagsakan. Bubulusok ang ekonomya hangga�t hindi ipinatutupad ang tunay na repormang agraryo na magpapalaya sa higit na nakararaming mamamayan mula sa pagsasamantalang pyudal at masidhing karukhaan at hangga�t hindi naipupundar ang baseng industriyal na magsisilbing nangungunang salik sa pag-abante ng produksyon at pagtataas ng antas ng kabuhayan ng mamamayan.

Kayat ang usapin ng pag-unlad ng ekonomya ay usapin ng rebolusyonaryong pagbabago ng sistemang panlipunan�sa madaling salita, usapin ito ng kung aling uri ang may tangan ng kapangyarihang pampulitika. Nasa interes at pakinabang ng mga naghaharing uri sa Pilipinas, ng malaking burgesyang kumprador at mga malaking panginoong maylupa, na patuloy na makipagsabwatan sa mga imperyalista upang hadlangan at labanan ang industriyalisasyon at repormang agraryo bilang mga saligang hakbang sa pagbabago ng ekonomya.

Tanging ang mga magsasaka at manggagawang Pilipino ang may interes, kakayahan at kapasyahang lubos na baguhin ang malakolonyal at malapyudal na sistema at wakasan ang palagiang krisis sa ekonomya.

(1) Tinatawag ding pamumuhunang portfolio ang pawang di produktibong pamumuhunan sa larangan ng real estate, pamilihan ng stocks at bono[Back]

00 Mayo 1999
Edisyong Pilipino

	Editoryal: Pagkaisahin ang mamamayan, labanan at gapiin ang pasistang kampanya ng rehimeng Estrada!
	Desisyon na pormal na kilanlin ang de facto nang terminasyon ng gubyernong Estrada sa negosasyong pangkapayapaan sa pagitan ng GRP at NDFP
	Taktikal na opensiba ng BHB laban sa panrehiyong kampo ng pulisya sa Bohol: 84 na armas, nasamsam ng BHB
	Mga Pahayag
	Patraydor na pag-aresto kay Vicente Ladlad, kinundena ng PKP
	Isa pang taong krisis at paghihirap... Paghuhubad sa lumalagong estadistika ng gubyerno
	Isa pang taong krisis at paghihirap... Pagsusuri sa ekonomya: lagpas sa usapin ng estadistika
	Isa pang taong krisis at paghihirap... Ipaglaban ang kagalingang pang-ekonomya ng mamamayan!
	Bangayang Lastimoso-Lacson: Away ng mga sindikatong kriminal sa PNP
	Ang maralitang-lunsod: Lugmok sa kahirapan
	Laban ng maralitang-lunsod, laban ng uring manggagawa
	Kalayaan ng mamamayang Timores: Patuloy ang laban sa East Timor
	Sumusulong: Sa Cagayan-Apayao
	Sumusulong: Sa Silangang Kabisayaan
	Ubos kayang labanan ang VFA!
	Pahayag hinggil sa Visiting Forces Agreement
	Balita