Sa Ibayong Dagat:
Mga tagumpay ng Cuba sa pangangalaga sa kalusugan ng mamamayan: Kalusugan para sa lahat

Read this article in English

Ginunita ng milyung-milyong mamamayan ng Cuba ang ika-45 anibersaryo ng rebolusyon nitong Enero 1. Sa araw na iyon, ipinagdiwang nila ang nagpapatuloy na mga tagumpay ng Cuba sa paglaban sa

Kahanga-hanga ang inaaning mga tagumpay ng Cuba sa biotechnology o ang aplikasyon ng inhineriya at teknolohiya para pag-aralan at lutasin ang mga problema hinggil sa mga buhay na bagay (living organisms). Ipinakikita ng karanasan ng mga Cuban ang kakayahan ng isang maliit at nagsasariling bansa na magkaroon ng pag-unlad sa syensya at teknolohiya, kahit pa may nakapataw na pang-ekonomyang embargo ang imperyalismong US. Napakalaki ng pakinabang ng mga Cuban at iba pang mamamayan sa daigdig sa pagtatayo ng Cuba ng industriya ng mga gamot at medikasyon.

Ang determinasyon at pagsisikap ng gubyernong Cuban para paunlarin ang biotechnology ay nakatuon sa pagsisikap nito na maibigay sa mamamayan ang hindi lamang mahusay kundi abanteng serbisyong pangkalusugan. Modelo ang sistema nito sa pangangalaga sa kalusugan ng mamamayan.

Upang maabot ng serbisyong pangkalusugan ang bawat mamamayan, may nakadestinong mga doktor sa bawat komunidad sa buong Cuba. Libre ang serbisyo sa mga ospital. Pinahahalagahan ng gubyerno ang edukasyon ng mamamayan hinggil sa pag-iwas sa mga karamdaman at mga epidemya.

Bahagi ng mga programa sa pag-iingat sa mga sakit ang paglulunsad ng libreng pagbakuna sa mamamayan. Ang pagbakuna sa halos 100% ng mamamayang Cuban ay nagresulta sa pagpuksa sa mga sakit tulad ng polio, tigdas, malarya, tetano at diphtheria. Sinasabing ang Cuba ang may pinakamalaking porsyento ng nabakunahang mamamayan sa buong mundo.

Ang Cuba rin ang may pinakamababang porsyento ng populasyon na may AIDS sa mga kontinente ng America at isa sa may pinakamababa sa buong mundo. Itinayo noong 1983 sa Cuba ang National Commission on AIDS kahit na wala pa mang natukoy ni isang Cuban na may AIDS. Inilunsad ang programa para matukoy ang mga maysakit ng HIV sa buong bansa noong 1985. May nakatayong libreng mga pagamutan sa iba't ibang bahagi ng bansa para kupkupin ang mga positibo sa HIV at AIDS at bigyan sila ng tamang nutrisyon, tirahan, edukasyon hinggil sa sakit at medikasyon. Sa ngayon, signipikante ang pagbaba ng bilang sa Cuba ng mga namamatay sa sakit na AIDS dahil sa medikasyong anti-HIV na gawa sa bansa.

Ang komprehensibong pangangalaga sa mga buntis ay nagbunga ng isa sa pinakamababang bilang ng mga namamatay na sanggol (6.5 sa bawat 1,000 noong taong 2002). Pinakamataas sa Latin America ang 76 na taong karaniwang maaasahang haba ng buhay ng mga Cuban.

May isang doktor sa bawat 200 Cuban. Mayroong 21 paaralang pangmedisina sa bansa na nakapagpapatapos sa 4,000 doktor bawat taon. Maaaring pumasok ang sinumang nagbabalak maging doktor dahil libre at suportado ng gubyernong Cuba ang buong sistema ng edukasyon.

Hindi maipagkaila kahit ng mga imperyalistang bansa at mga bayarang propagandista nito ang husay ng Cuba sa pagsusulong ng mga programang pangkalusugan para sa mamamayan. Katunayan, dalawang beses na ginawaran ng World Health Organization (WHO) si Pres. Fidel Castro ng medalyang Health for All (1988 at 1998). Tanging ang Cuba ang nakaabot sa itinakda ng WHO na mga pamantayan para sa sistemang pangkalusugan ng mga bansang atrasado sa taong 2000. Naabot ito ng Cuba sa taong 1993 pa lamang.

Walang sariling industriya ng gamot ang Cuba bago magtagumpay ang rebolusyon dito noong 1959. Subalit sa kasalukuyan, nagagawa na sa Cuba ang halos lahat ng mga klase ng gamot na mayroon sa buong mundo. Sariling gawa ng mga Cuban ang 85% ng lampas sa 1,000 tipo ng kinokunsumo nilang mga gamot.

Dagdag dito, isa ang Cuba sa mga bansang nangunguna sa pananaliksik at paggawa ng mga bagong gamot at bakuna. Kabilang ang sumusunod sa kanilang pinakahuling mga tagumpay:

• paglikha ng tanging bakuna laban sa meningitis-B o impeksyon ng mga lamad sa utak at gulugod dulot ng isang tipo ng virus
• paglikha ng bakuna laban sa Hepatitis-B, impeksyon sa atay dulot ng isang tipo ng virus
• pananaliksik at pagpipinal ng bakuna laban sa kolera, isang sakit na dulot ng impeksyon sa bituka
• paglikha ng bakuna laban sa hemophilic influenza type B, isang tipo ng trangkaso
• pananaliksik at pagsusubok ng isang potensyal na bakuna laban sa AIDS. Subok na itong epektibo sa mga hayop at sa ngayon ay nasa unang yugto na ng pagsubok sa mga tao.
• paglikha ng gamot na nakakatunaw sa namuong dugo sa mga inatake sa puso
• paglikha ng pamahid na gamot (cream) mula sa inunan (placenta) ng tao na nakagagamot ng ilang sakit sa balat
• paglikha ng pamahid na gamot (ointment) na nakapagpapabilis ng paggaling ng mga sunog na balat.

Mahusay din ang kanilang pamamaraan para tukuyin at gamutin ang kanser. Abante rin ang kanilang kasanayan at kaalaman sa iba pang tipo ng operasyon tulad ng paggagamot ng mga sakit sa mata at nakalulumpong mga sakit tulad ng multiple sclerosis at Parkinson's disease.

TINATAMASA ng mga Cuban ang mga tagumpay sa biotechnology at serbisyong pangkalusugan dahil sa independyente at maka-mamamayang oryentasyon ng gubyernong Cuban. Dahil sa pangunahing konsiderasyon sa paglulunsad ng mga programa ang kagalingan ng mamamayan, tiyak ang pag-ani ng mga pakinabang ng syensya at teknolohiya. At dahil dito, naaasahan ang kooperasyon ng buong sambayanan.

21 Enero 2004
Edisyong Pilipino

	Editoryal: Patakaran sa pangangampanya sa mga rebolusyonaryong teritoryo, matagumpay na ipinatutupad
	Mga kagyat at pangmatagalang hinaharap ng usapang pangkapayapaan
	Matatagumpay na opensiba ng BHB: Dalawang kampo ng PAF sa Batangas, magkasabay na sinalakay ng BHB
	Matatagumpay na Opensiba ng BHB Pulitiko, dinisarmahan ng BHB
	Mga Ulat Koresponsal: "Peace zones"�panloloko sa mamamayan
	Mga Ulat Koresponsal: Parola Development Plan: Huwad na pabahay
	Rebyu: Buhay Barya
	Sa Ibayong Dagat: Mga tagumpay ng Cuba sa pangangalaga sa kalusugan ng mamamayan: Kalusugan para sa lahat
	Balita