Editoryal:
Sumulong sa Ika-30 Anibersaryo!

Ang pagdiriwang ng ika-29 na anibersaryo ng muling pagkakatatag ng Partido Komunista ng Pilipinas ay paggunita sa mga dakilang tagumpay na nakamit ng Partido sa rebolusyong Pilipino sa teoretikong gabay ng Marxismo-Leninismo-Maoismo.

Ito ay pagkilala sa pagpapanibagong-sigla at muling paglakas ng Partido sa larangan ng ideolohiya, pulitika at organisasyon at pagtanghal sa ibayong pagsulong ng rebolusyunaryong pakikibaka ng proletaryado at mamamayang Pilipino bunga ng paglulunsad ng Ikalawang Dakilang Kilusang Pagwawasto.

Sa kabilang banda, patuloy na binabayo ng napakatinding krisis at kaguluhan ang lokal na naghaharing sistema at ang pandaigdigang sistemang kapitalista.

Nasa mas mahusay na pusisyon ngayon ang Partido para samantalahin ang naturang krisis at ibayong isulong ang bagong demokratikong rebolusyon. Wala nang ibang pwersa liban sa Partido na makakapamuno sa mamamayang Pilipino tungo sa pambansang kalayaan at demokrasya laban sa dayuhang monopolyo kapitalismo, lokal na pyudalismo at burukrata kapitalismo.

Batay sa kasalukuyan nitong lakas, dapat magbalak ang Partido para sa ibayong pagpapalakas. Sa susunod na taon, dapat iangat ang rebolusyunaryong pakikibaka sa mas mataas na antas at anihin ang mga tagumpay sa paraang lahatang-panig para buong kagalakan at maningning na maipagdiwang ang ika-30 anibersaryo ng Partido.

Susi dito ang ibayong pagpupursige sa kilusang pagwawasto. Kailangang ipatupad ng buong kasapian ng Partido nang mas masigasig at mas militante kaysa dati ang kanilang mga tungkulin sa ideolohiya, pulitika at organisasyon.

Sa larangan ng ideolohiya, dapat itaas ang teoretikong bandila ng Marxismo-Leninismo-Maoismo. Ang lahat ng mga kadre, kasapi at kandidatong kasapi ng Partido ay dapat na itaas ang kanilang kamulatan sa ideolohiya sa pamamagitan ng pagaaral sa teorya at paglalapat nito sa kongkretong kalagayan at sa rebolusyunaryong praktika.

Dapat bakahin ang suhetibismo, sa anyo man ng rebisyunismo, empirisismo at dogmatismo. Dapat maging mapagbantay sa pagpasok ng ideolohiyang petiburges sa loob ng Partido. Dapat seryosohin ang mga pulong pag-aaral ng lahat ng mga organo at yunit at ang mga pormal na kurso sa pagaaral sa batayan, intermedya at abanteng antas.

Sa larangan ng pulitika, dapat matatag at militanteng isulong ang pangkalahatang linya ng bagong demokratikong rebolusyon sa pamamagitan ng matagalang digmang bayan. Dapat wasto at mahusay na gamitin ng Partido ang dalawang makapangyarihang sandata ng rebolusyunaryong armadong pakikibaka at nagkakaisang prente.

Dapat bakahin ang mga "Kaliwa" at Kanang oportunistang kamalian. Paigtingin ang armadong pakikibaka bilang pangunahing anyo ng pakikibaka at isanib ito sa tunay na reporma sa lupa at pagbubuo ng baseng masa. Dapat paunlarin ang nagkakaisang prente para sa armadong pakikibaka at ikoordina ang rebolusyunaryong pakikibaka sa lungsod at kanayunan.

Sa larangan ng organisasyon, dapat itaguyod ang prinsipyo ng demokratikong sentralismo, itayo ang pang-organisasyong lakas ng Partido sa buong bansa at malalim na umugat sa masang anakpawis ng manggagawa at magsasaka. Gawing kasapi ng Partido ang papalaking bilang ng mga pinakaabanteng aktibista ng rebolusyunaryong kilusang masa sa lungsod at kanayunan.

Habang lumalala ang krisis ng pandaigdigang sistemang kapitalista at ng naghaharing sistema sa Pilipinas, tiyak na magtatamo ang Partido ng mas malalaking tagumpay sa pamumuno sa rebolusyunaryong pakikibaka ng proletaryado at mamamayan.

Walang ibang solusyon sa pang-aapi at pagsasamantala ng mga imperyalista at mga lokal na nagsasamantalang uri kundi ang bagong demokratikong rebolusyon sa pamamagitan ng matagalang digmang bayan.

Kapag sa saligan ay nakumpleto na ang kasalukuyang yugto ng rebolusyong Pilipino, maisusulong ang sosyalistang rebolusyon hanggang sa maabot ang ultimong layunin ng komunismo.

00 Hulyo 1997
Edisyong Pilipino

	Editoryal: Sumulong sa Ika-30 Anibersaryo!
	Bumubugso Pasulong ang Rebolusyon!
	New Mining Act of 1995: Kontra-Mamamayan, Salot sa Kalikasan
	Oplan Unlad Bayan: Bigo sa Hilagang Mindanao
	Renegadong Taksil sa Kanlurang Mindanao: Pupulutin sa Kangkungan ng Kasaysayan
	Balita
	Pakikidigmang Gerilya: Sumusulong sa Buong Kapuluan
	Komunike ng Ikatlong Panrehiyong Kumperensya ng Timog Katagalugan: Kamtin ang Dramatikong Pagsulong!