Basic Education Curriculum ng DepEd:
Dagdag na salot sa sistema ng edukasyon

Read this article in English

Ipinailalim ngayong Hunyo ng Department of Education (DepEd) ang lahat ng pampublikong paaralan, mula Grade 1-5 at mula sa First hanggang Third Year sa hayskul, sa Basic Education Curriculum (BEC). Laman ng kurikulum na ito ang limang subject: Pilipino, Ingles, Matematika, Agham at ang tinataguriang Makabayan. Pinagsamasama sa Makabayan ang dating magkakahiwalay na subject na Araling Panlipunan; Edukasyong Pantahanan at Pangkabuhayan; Musika, Sining at Edukasyong Pangkatawan; at Kagandahang Asal para sa elementarya. Para naman sa hayskul, pinag-isa sa Makabayan ang Araling Panlipunan (tumatalakay sa Kasaysayan at Pamahalaan, Asian Studies, World History at Economics sa apat na baitang ng segundaryong edukasyon); Teknolohiya at Edukasyong Pantahanan at Pangkabuhayan; Musika, Sining at Edukasyong Pangkatawan at Pangkalusugan; at Edukasyon sa Pagpapahalaga. Mistulang malaki ang oras na inilaan sa Makabayan kumpara sa iba pang subject. Subalit sa aktwal, binawasan ang oras sa pagtuturo ng mga paksang nakapaloob dito para idagdag sa iba pang subject ng BEC.

Ipinapataw ng DepEd ang BEC sa layuning ibayong hulmahin ang kabataan bilang mga kawal ng "globalisasyon". Mismong si Education Sec. Raul S. Roco ang nagsambit na nais ituro ng BEC ang "patriyotismo" na kumikilala sa "pagsasandigan ng mga bansa (global interdependence)" � sa madaling sabi, sa lubos na pagpapailalim sa imperyalistang "globalisasyon".

Ang pagbibigay-diin ng BEC sa mga bokasyunal at teknikal na mga pagsasanay ay ibinatay sa mga rekomendasyon ng Asian Development Bank (ADB) at World Bank (WB) noon pang 1998. Nakasaad rito na ang kakayahan ng Pilipinas na maging "kompetitibo" ay nakasalalay sa pagkakaroon ng mga gradweyt na may mataas na kasanayan sa paggawa sa larangan ng elektroniks, pagmamanupaktura at serbisyong panturismo. Itinakda nito ang papel ng Pilipinas bilang taga-suplay ng mga manggagawa para sa mga multinasyunal.

Ang pagbabawas naman sa mga pangunahing subject ay alin-sunod sa dikta ng ADB at WB na i-streamline ang kurikulum para makatipid at matiyak ang pagbabayad ng Pilipinas ng utang laluna sa mga imperyalistang institusyong gaya nito.

MALINAW NA ANG BEC AY BAHAGI LAMANG NG SERYE ng mga diumano�y reporma sa sistema ng edukasyon na itinutulak ng International Monetary Fund (IMF) at WB mula pa noong dekada 1970.

Noon pa mang 1962 ay binalak na ng IMF-WB na pondohan ang sistema ng edukasyon sa bansa tungo sa pagpapalawak ng bokasyunal na pag-aaral. Ito�y upang mas makatugon ang pwersa sa paggawa ng Pilipinas sa mga pangangailangan ng pandaigdigang sistemang kapitalista. Batay sa isang sarbey na pinondohan ng US, noong 1972 ay ipinataw ng diktadurang Marcos ang Presidential Decree 6-A o Educational Development Decree. Sa ilalim nito, binigyang-diin ang pagsasanay ng mga manggagawang teknikal at bokasyunal. Ipinalathala ang mga teksbuk sa Instructional Materials Corporation, isang institusyong pinondohan din ng US, upang matiyak na aayon sa dikreto ang nilalaman ng mga libro sa paaralan.

Noong 1974, upang itulak ang paparaming mag-aaral na kumuha ng teknikal o bokasyunal na kurso, nilimitahan ang bilang ng mga pumapasok sa kolehiyo sa pamamagitan ng National College Entrance Examination (NCEE). Bagaman paglao�y pinalitan ito ng National Secondary Achievement Test, nanatili ang NCEE sa esensya.

Nang ipataw ng rehimeng Marcos ang Education Act of 1982, tuluyan nang tinalikuran ng estado ang obligasyong bigyan ng serbisyong pang-edukasyon ang mamamayan. Lumiit na nang lumiit ang badyet sa edukasyon. Hinayaan ang mga pribadong paaralan na gawin itong negosyo sa pamamagitan ng walang-rendang pagtataas ng matrikula.

Ang mga hakbang na ito ay ipinagpatuloy lamang sa mga ipinatupad na programa sa sistema ng edukasyon ng mga sumunod na rehimen(sumusunod).

Hunyo 2002
Edisyong Pilipino

	Editoryal: Labanan ang mabilis na nag-iibayong armadong interbensyon ng US sa bansa
	Komedya sa Senado at Kongreso
	Basic Education Curriculum ng DepEd: Dagdag na salot sa sistema ng edukasyon
	Kolonyal na oryentasyon
	Matrikula muling tumaas ngayong pasukan
	Kampanya sa niyugan: Bikol, umaani ng tagumpay
	Tulungan sa pagsasaka: Ang lusong ni Mang Jose
	DYnastiya sa Isabela
	Mga anti-mamamayang negosyo ni Dy sa Isabela, poprotektahan ng CAFGU
	Pananalanta ng pasistang estado
	Tugon ng mamamayan sa mga lansakang paglabag sa mga karapatang-tao sa Oriental Mindoro
	Mga anti-globalisasyong pagkilos, sumusulong
	Mga kilusang masa laban sa mga imperyalistang dikta, lumalakas sa buong daigdig
	Palayain ang mga detenidong pulitikal sa buong mundo!
	Mga Balita