Editoryal:
Paiigtingin ng Bagong Hukbong Bayan ang mga armadong opensiba

Read this article in English

Ilulunsad ng Bagong Hukbong Bayan (BHB) ang paparaming mga armadong opensiba laban sa rehimeng US-Arroyo. Ito ang sagot ng BHB sa panawagan ng Komite Sentral na paigtingin ang armadong rebolusyon bilang tugon sa walang kapantay na krisis na kinasasadlakan ngayon ng bansa. Ito rin ang tugon ng BHB sa mahigpit na kahilingan ng mamamayan na parusahan ang rehimeng Arroyo.

Mismong ang rehimeng US-Arroyo ang nagtutulak sa mamamayan sa landas ng rebolusyon. Walang hangganan ang pagpapakatuta nito sa imperyalismong US. Masugid nitong ipinatutupad ang pinakamasasahol na patakaran ng liberalisasyon, pribatisasyon at deregulasyon. Kasabwat ito ng malalaking dayuhang korporasyon na tuluy-tuloy na pumipiga ng supertubo mula sa naghihirap na mamamayan. Inilalantad nito ang sariling baho at kabulukan sa walang tigil na girian sa kanilang hanay at serye ng nabubunyag na mga anomalya at kurakutan. Hangal nitong sinusuportahan ang imperyalistang agresyon at bukambibig nito ang litanyang "gera kontra-terorismo" ng US upang bigyang-katwiran ang pasistang pananalakay nito sa mamamayan at imbitahin ang panghihimasok ng US sa bansa.

Tiyak ang paglakas ng kilusang masa ng mamamayang wala nang masusulingan kundi ang kumilos at lumaban. Yayanigin nito sa kaibuturan ang dati nang mabuway na paghahari ng rehimeng US-Arroyo. Kasabay nito, maglulunsad ng paparami, papatindi at mas madalas na mga taktikal na opensiba ang BHB bilang suporta sa paghihiwalay at pagpapabagsak ng rehimen.

Palalawakin at paiigtingin nito ang pakikidigmang gerilya upang abutin ang mas maraming distrito at munisipalidad, batakin ang armadong pwersa ng kaaway sa mas maraming bahagi ng bansa at pahinain ang kapit nito sa mga estratehikong larangang gerilya na kinokonsentrahan ngayon ng AFP.

Makailang beses nang napatunayan ang epektibidad ng kombinasyon ng malalaking demonstrasyon at paglakas ng mga armadong opensiba sa pagpapabilis ng pagbagsak ng nakaupong rehimen. Hindi nito maibabagsak ang buong sistema ngunit palalawakin at patatatagin nito ang demokratiko at rebolusyonaryong kilusang tuluy-tuloy na kikilos at lalaban sa naghaharing sistema hanggang sa tagumpay.

Ang paglulunsad ng digmang bayan sa balangkas ng bagong demokratikong rebolusyon ang pinakamaaasahan at pinakaepektibong paraan ng paglutas sa krisis. Sa tagumpay lamang nito maipatutupad ang mga batayang patakarang magwawakas sa paghahari ng imperyalismong US at ng lokal na malalaking burukrata-kapitalista at panginoong maylupa sa bansa.

07 Oktubre 2004
Edisyong Pilipino

	Editoryal: Paiigtingin ng Bagong Hukbong Bayan ang mga armadong opensiba
	Matatagumpay na Opensiba ng BHB
	Arturo Tabara, pusakal na kriminal at kontra-rebolusyonaryo
	Ang tambalan ni Tabara at ng reaksyunaryong rehimen
	Pasistang dahas at panlilinlang, katambal ng imperyalistang pagmimina sa Samar
	Tanggalan sa Hacienda Luisita, nilalabanan
	Laganap na kagutuman at karalitaan sa bansa
	Sigaw ng mga taga-GSIS: Patalsikin si Garcia!
	Pagbabayaran ng rehimeng Bush ang pananalakay at pananakop nito sa Iraq
	Patung-patong na kaswalti ng US sa Iraq
	Balita