Sumusulong: Sa Cagayan-ApayaoPatuloy ang pag-unlad ng gawaing masa at ng rebolusyonaryong kilusang masa sa kanayunan, lunsod at mga sentrong bayan ng Cagayan-Apayao. Ihinayag ito sa komunike ng Komite ng Partido sa rehiyon matapos ang kumperensya nito sa paglalagom na ginanap noong kalagitnaan ng 1998.
![](../../angbayan/images/990506/cagv.gif)
Tinukoy sa kumperensya ang malaking naitulong ng gabay na binalangkas noong 1995 ng Komiteng Tagapagpaganap ng Komite sa Rehiyon (KTKR) para sa pagsisiyasat sa konsolidadong baryo, sa binabalikang baryo at sa baryong target sa pagpapalawak.
Nagsilbing mabisang armas ang resulta ng mga panlipunang pagsisiyasat sa pagtatakda ng linya at panawagan sa mga kampanyang masa at sa gawaing propaganda.
Bunga ng ganitong mga pagsisikap, sumusulong ang mga antipyudal na pakikibaka na umaani ng mga tagumpay para sa masang magsasaka sa mga sonang gerilya. Ayon sa mga ulat, naibaba nang 25% ang upa sa lupa at ilang porsyento rin ang nabawas sa interes sa pautang sa ilang baryo. Naitaas ang sahod ng mga manggagawang bukid at naharap ang ilang problema sa lupa sa pagitan ng mga mamamayan. Bumabangon na ang mga organisasyong masa na nagbubuo ng mga pangkat-tulungan upang mapagaan ang gastos ng mga magsasaka sa pagpapatrabaho.
Patuloy na naglulunsad ng mga pakikibakang masa laban sa militarisasyon, iligal na pagtotroso at mga tiwaling burukrata sa mga konsolidadong baryo ng rehiyon.
Naitatayo o napapamunuan ang mga ligal na organisasyon sa baryo na siyang daluyan ng mga ligal na pagkilos ng masa.
Walang puknat ding inilantad at tinutulan ang karahasang militar at sapilitang pagpapalikas ng mga taumbaryo sa Marag Valley. Kabilang sila sa libu-libong pinalikas dahil sa malakihang operasyong militar noong unang bahagi ng dekada '80. Ipinagpatuloy ang kampanya hanggang sa makabalik na ang masa sa kanilang lugar at bahayan.
Naging tuluy-tuloy ang gawaing propaganda. Bukod sa mga rebolusyonaryong babasahin, namaksimisa ang ligal na masmidya bilang daluyan ng paninindigan at panawagan ng rebolusyonaryong kilusan sa rehiyon hinggil sa General Agreement on Tariffs and Trade (GATT), mga dagdag na buwis na pabigat sa bayan tulad ng EVAT, ang Anti-terrorism Bill, pagtaas sa presyo ng langis, ang krisis sa bigas at iba pang usapin. Gayundin, binatikos ang lansakang pagpapabaya ng pamahalaang pamprubinsya ng Cagayan sa kapakanan ng maliliit na mangingisda. Inilantad ang sabwatan ng noo'y gobernador ng Cagayan na si Kol. Rodolfo Aguinaldo sa iligal na pangingisda ng malalaking mangingisdang Taiwanese at sa laganap na pagpupuslit ng ipinagbabawal na droga at iba pang kontrabando sa mga baybayin ng lalawigan.
Sa lunsod at sentrong bayan, nakapagkamit na ng makabuluhang pagunlad ang gawaing masa at ang demokratikong kilusang masa. Di tulad ng dati ay binibigyang-pansin na ang konsolidasyon sa ideolohiya ng mga kasapi ng mga hayag at lihim na organisasyong masa.
Malawak-lawak na ang erya at sektor na naabot ng gawaing masa sa puting purok sa rehiyon. Naabot na ang mga kabataan-estudyante, kabataan sa baryo, magsasaka, kababaihang magbubukid, mga taong simbahan, propesyunal at kawani ng gubyerno at mga pambansang minorya. Mula noong 1997, may naitala nang paglaki sa bilang ng mga kasapi ng Kabataang Makabayan at mga organisadong guro sa eskwelahan na kaanib ng rebolusyonaryong kilusang lihim. Kasalukuyang pinauunlad ang pagbubuo ng mga hayag na organisasyon at pagkilos sa mga tradisyunal na organisasyong sektoral.
Sustenido ang mga mobilisasyong masa tulad ng mga rali at porum. Isang mahusay na karanasan ang pagtatalumpati at paglulunsad ng palabas pangkultura (mobile theater) ng mga mobile prop team sa mga kabayanan at tuwing dapon (araw ng tiangge sa palengke).
Itinaguyod rin ng demokratikong kilusan sa lunsod at sentrong bayan ang mga pakikibakang magbubukid laban sa pang-aagaw sa kanilang lupa at iba pang isyu.
Samantala, nitong huling mga taon ay tumagos na sa puting purok ang oryentasyon ng pagsuporta sa armadong pakikibaka. Maramirami nang kadre at kasapi ng Partido ang sumapi sa Bagong Hukbong Bayan. Gayundin, may naabot nang isang antas ng kamulatan sa pagsuporta sa iba't ibang pangangailangan ng armadong pakikibaka sa kanayunan.
21st IB, pinatalsik sa Isabela
Tanda ng patuloy na pag-unlad ng mahigpit na koordinasyon ng rebolusyonaryong kilusang masa sa kanayunan at mga sentrong bayan, nitong ikatlong linggo ng Pebrero ay matagumpay na napatalsik ng mamamayan ng Isabela ang abusadong 21st IB. Ang 21st IB na sangkot sa maraming kaso ng pagpaslang, panggagahasa, pagnanakaw, arson at iba pang paglabag sa karapatang-tao, ay pinangalanang "Best Battalion" ng Armed Forces of the Philippines noong Disyembre 1998.
Ang matagumpay na pagpapalayas sa pusakal na batalyon ay kulminasyon ng serye ng mga pakikibakang masa mula pa noong Nobyembre. Libu-libong batayang masa sa kanayunan at mga panggitnang pwersa sa mga sentrong bayan ang kumilos upang mailantad ang militarisasyon at paglabag sa karapatang-tao sa rehiyon. Rurok ng kampanya ang isang martsa-demonstrasyon ng libu-libo sa Lunsod ng Santiago sa Isabela noong Disyembre 5.
![](../../angbayan/images/textend3.gif)
|