Editoryal:
Mga mananakop sa Iraq, layas!

Read this article in English

Gamit ang superyor na mga armas, walang pakundangang nilapastangan ng US ang pambansang soberanya at kasarinlan ng Iraq. Pilit pinagtatakpan ang katotohanan ng brutal na pana-nalakay at okupasyon ng palamuting "kalayaang Iraqi". Sa ikatlong linggo ng pananalakay, libu-libong sibilyang Iraqi, bukod pa sa mga sundalo, ang pinatay ng duwag at walang habag na pagpapaulan ng mga bomba at pamamaril ng mga mananalakay. Sa Baghdad pa lamang, mahigit 100 ang mga sugatang dinadala sa mga ospital sa bawat oras.

Tampok ang mga kaso ng pamamaril ng mga inosente sa mga tsekpoynt, pananakot, pwersahang panghahalughog sa mga bahay at walang piling pangaaresto ng mga kalalakihan.

Tampok din ang pangwawasak sa mga bahayan, palengke, ospital, gusali, kalsada, tulay, paliparan, instalasyon ng masmidya at komunikasyon at iba pang mahahalagang imprastrukturang sibilyan. Sa mga lugar na sinakop na ng mga mana-nalakay, lumalaganap ang kagutuman at pagka-uhaw. Sadyang winasak o inipit ang mga suplay ng pagkain at tubig na lalong nagpalala sa hirap nang kalagayan ng mamamayan.

TALIWAS SA INAKALA NG MGA MANANALAKAY NA magiging madali at mabilis ang kanilang pananakop, maraming kabiguan at sagabal ang sumalubong sa armadong agresyon ng US at UK.

Kahit pa gamit ang mas mahihinang uri ng mga sandata, na animo'y mga bato lamang sa harap ng mga high-tech na kagamitang pandigma ng mga mananalakay, nagpamalas ang mamamayang Iraqi ng kapuri-puring patriyotikong paglaban�kapwa sa pamamagitan ng armadong pakikibaka at mga protestang masa.

Tiyak na haharap pa ang mga mananalakay na pwersa sa higit na matinding paglaban ng mga Iraqi. Bawat araw na tumatagal ang labanan, lalong nahihirapan ang mga mananalakay hindi lamang dahil sa mga pag-atake ng mga regular at di regular na armadong pwersa at paglulunsad ng "people power" ng mga Iraq, kundi pati sa naiipong diplomatiko at pampulitikang presyur laban sa okupasyon.

Maitaguyod man ng US at UK ang kanilang armadong presensya sa mga syudad, makontrol man ang mga simbolo ng awtoridad ng rehimen ni Saddam Hussein, at makapagtayo man ng bagong pampulitikang awtoridad sa lubos nilang nakokontrol, tiyak na daranas ito ng higit pang kahirapan sa hinaharap.

KITANG-KITA NG BUONG MUNDO ang kawalang-katarungan, kawalan ng moral at ligal na batayan ng gera ng US sa Iraq; ang kasibaan ng US sa likod nito; ang kabikabilang pagsisinungaling ng US para mabigyang katwiran lamang ang gera; ang tindi at lawak ng pagpatay, pamiminsala at pangwawasak na idinudulot nito sa Iraq.

Ngayon pa lamang ay umaani na ang US ng walang kapantay na poot ng mamamayang Iraqi, ng mga Arabo at Muslim at ng malawak na mamamayan ng daigdig. Lumalaganap ang panawagang tumututol sa okupasyon ng US sa Iraq at para sa kagyat na pag-alis ng mga tropang Amerikano mula sa bansa.

Galit na galit sa US ang mamamayan sa Middle East. Ang kaugnay na kaisahang Arabo at Muslim laban sa sabwatan ng US at Israel laban sa Palestine ay higit pang pinahigpit at pinalawak ngayon ng kaisahan nila laban sa pananalakay ng US at UK sa Iraq. Maraming Arabo mula sa Syria, Egypt, Libya, Jordan, Lebanon at iba pang bansa sa Middle East ang nagpahayag ng kahandaang tumulong sa paglaban ng Iraq sa agresyon ng US at UK. Ang iba sa kanila ay nasa loob na ng bansa.

Labis na kagalit-galit ang asalbuwitreng pagsakmal ng mga kumpanyang US sa lahat ng mga kontrata para diumano sa rekonstruksyon ng Iraq. Para rin umano rito ang pagsamsam ng US ang P1.9 bilyong deposito ng gubyerno, negosyante at mamamayang Iraqi sa mga bangko sa US. Buong-takaw na kinakamkam ng US ang lahat ng pakinabang�kahit ang UK, ang pangunahing alyado nito sa gera, ay nangangamba na pagtitirhan lamang ito ng mumo ng US.

ANG PANANALAKAY NG US SA IRAQ ay dinadala sa sukdol ng kaigtingan ng kontradiksyon sa pagitan ng malawak na mamamayan at nakararaming bayan sa daigdig at ng nangungunang imperyalismong US.

Ang sukdulang unilateralismo ng US ay sumagasa sa dating sistema ng pakikipag-ugnayan nito sa France, Russia, Germany, China, mga bansang Arabo at iba pang malalaking bansang may malalaking interes din sa Iraq at Middle East. Pinalalala ng unilateralismong ito ang interimperyalistang kontradiksyon at gayundin ang kontradiksyon sa pagitan ng superpower na US at iba pang mga bansa.

Binabago nito ang inabot nang sistema ng pandaigdigang relasyon ng mga bansa. Lantarang binalewala ng US ang United Nations nang salakayin nito ang Iraq. Sa gayon, naging inutil at naiwan na lamang itong tagaligpit ng kalat at tagapunas ng dugo ng pananalanta ng nagsosolong superpower. Sa harap nito, kahit ang NATO, ang alyansang militar ng US at Europe, ay nawalan ng katuturan liban sa pagkokoordina ng "humanitarian assistance".

Sa kabilang panig, makabuluhan na muling nabuhay ang Non-Aligned Movement at tumindig ang Arab League laban sa sukdulang agresyon at unilateralismo ng US. Tiyak na hahantong ang lahat nang ito sa ibayong kaguluhang pandaigdig.

Walang araw na lumilipas na walang demonstrasyon sa iba't ibang panig ng mundo, pati na sa US at mga pangunahing imperyalistang bansang kasapakat ng US, laban sa agresyon sa Iraq. Kapantay at, sa maraming lugar, hinihigitan ng mga demonstrasyong ito sa mga gahiganteng protesta laban sa gerang agresyon ng US sa Vietnam noong 1965-75. Binuhay ng gera sa Iraq ang muling pag-ibayo ng kasiglahan ng kilusang anti-imperyalista sa daigdig. Sa kagyat, marapat na pagibayuhin ang paglaban upang palayasin ang mga mapanalakay na tropang Amerikano at UK sa Iraq. Nagsisilbing matabang lupa ang kasalukuyang lumalalang kalagayan ng krisis, represyon at gera para sa pagsulong ng mga pakikibaka para sa pambansang pagpapalaya, demokrasya at sosyalismo sa buong daigdig.

07 Abril 2003
Edisyong Pilipino

	Editoryal: Mga mananakop sa Iraq, layas!
	Madugong pananalakay at pananakop sa Iraq
	Mga patriyotikong grupo, tuluy-tuloy na nagprotesta
	Mga pambobomba sa Davao
	Ulat Koresponsal: Nandito na naman ba si Michael Meiring?
	Ulat Koresponsal: Presyo ng saging, napataas
	Ulat Koresponsal: Isang tagumpay sa propaganda at edukasyon
	Ulat Koresponsal: Cassava Plantation Project: Higit pang pahirap at pagsasamantala sa mga magsasaka
	Matatagumpay na opensiba ng BHB
	Pasada sa mga Balita