PRESS RELEASE
Information Bureau
Communist Party of the Philippines

Pagpasidungog ha ambus han NPA hadin April 8, Pagkondenar ha mga abuso militar kontra ha mga sibilyan
April 18, 2005

Ginpapasidunggan han NDF-Eastern Visayas yana nga adlaw an Arnulfo Ortiz Command (AOC) han New People�s Army ha ira madinaugon nga ambus hadin Abril 8 ha Calbiga, Weste Samar. Sumala han sumat han AOC, namatay hi 1Lt. Williamson Tan ngan lima nga sundalo tikang ha 62nd IB han pag-ambus ha ira han mga Pula nga mangaraway alas-dos han kulop ha erya giutan han Brgy. Canilungan ngan Brgy. Hindang. Tibalik an mga kaaway nga sundalo ha ira kampo kahuman hira namatron ha usa nga baryo samtang nag-ooperasyon. Nakaagaw an mga Pula nga mangaraway hin usa nga M60 machine gun, usa nga M203 nga riple, duha nga M14 nga riple ngan duha nga M16 nga riple.

Dati nga nakabase ha Eastern Samar an 62nd IB antes ini mabalhin ha Western Samar pira pa la kasemana an naglabay. Bantugan ini hira han magkadurudilain nga mga pagtalapas han tawhanon nga katungod ha Eastern Samar.

Samtang ginpapasidunggan an AOC, ginkondenar han NDF-EV an 8th Infantry Division ha ira makarimadima nga mga krimen kontra han mga waray kapas umato ngan inosente nga mga sibilyan kahuman han ambus. An AOC nagsumat nga duha nga mga parag-uma an ginpatay han militar komo bulos ha ambus. Dugang pa, usa nga balay an ginsunog han mga sundalo ngan ilegal nga gindetiner ngan ginharas an tulo pa nga mga parag-uma. Tikang 30-60% han mga molupyo han duha nga baryo ha Calbiga an napugos pagbaya tungod han kahadlok para han ira mga kinabuhi. Segun pa han NDF-EV, samtang an NPA naatake la ha mga lehitimo nga target ha ira mga taktikal nga opensiba ngan naghihirot nga dire makahibang hin sibilyan, an 8th ID klaro nga natalapas han katungod pantawo ngan internasyunal nga makatawo nga balaud ha tinuyo ngan pauro-utro nga pag-atake ha mga sibilyan ngan ha ira mga komunidad.

Sumala han NDF-EV, an nahitatabo nga mga pagtalapas han tawhanon nga katungod ha Calbiga diri nag-uusaan nga panhitabo. Ginsumat na ngani ha usa nga balita kahuman han ambus han NPA hadin Marso 3 ha mga elemento han 34th IB ha Tarangnan, W. Samar, nga 600 nga molupyo ha lima nga barangay nga amo an Sinit-an, Guadalupe, Hernandez, Bay-ang ngan Bungliw, an nangaro hin bulig ha mga opisyal han bungto han San Jorge tungod han mga pagtalapas han tawhanon nga katungod han special operations team han batalyon. Gin-akusar han mga sundalo an mga sibilyan ha pagbulig ha ginhimo nga ambus han NPA. Komo pagbulos, gintutuuhan nga nagsunog an mga sundalo hin usa nga balay nga nagin hinungdan han kamatay han mag-asawa nga parag-uma. Dugang pa, ginpusil hin gintatahapan nga mga sundalo hi Brgy. Chairman Benito Mabini han Brgy. Sinit-an siyam kaadlaw kahuman han ambus. An mga molupyo han lima nga baryo naatubang han padayon nga harasment ngan tarhug tikang ha mga sundalo. Nagsumat an mga molupyo han Brgy. Bungliw ha mga opisyal han bungto ha usa nga pakighimangraw hadin April 7 nga gintarhog han militar an mga molupyo nga ha kada sundalo nga mapatay han NPA, napulo nga mga sibilyan an papatayon han militar, ngan susunugon liwat an ira baryo kun diri hira magsumat mahitungod ha NPA. Tungod han makaharadlok nga kamutangan, damo nga molupyo han lima nga baryo an bumaya ha ira mga balay ngan pakabuhi.

Mahugot nga ginkundinar han NDF-EV an 8th ID ha ira paghahadi ngan pagsabrag han kahadlok ha kabaryuhan, sugad man ha mga bungto ngan kasyudaran ha padayon nga panmatay han mga aktibista ha ligal nga kagiusan. Hadin April 15 ha Mahaplag, Leyte, ginpusil han mga parupanmatay nga nakamotor hi Alfredo Davis, 45 nga nasuporta ha Bayan Muna. Samaran gihapon ha atake hi Imelda, an asawa ni Davis. Ha sugad nga pamaagi liwat ginpatay hadto hira Samuel Bandilla, lider han Anakpawis, ngan hi Atty. Felidito Dacut, panrehiyon nga tsirman han Bayan Muna.

Ha paghuman, nagsering an NDF-EV nga an tinagdagko ngan haluagan nga mga pagtalapas han tawhanon nga katungod ha rehiyon, ha ilarom han pasista nga parupanmatay ngan hepe han 8th ID nga hi Hen. Jovito Palparan, an nagduduso ha katawhan nga gumapil ha rebolusyunaryo nga kagiusan ngan naghahatag hin rason para ha dugang nga mga taktikal nga opensiba ngan demokratiko nga pakigbisog ngadto ha karumok han rehimen Arroyo.

Reference:
Roy Santos
NDF-EV Media Liaison Officer
Cellphone No. 0918-3112138
E-mail: [email protected]


Back to top