|
PRESS RELEASE
Information Bureau
Communist Party of the Philippines
38th Special Forces Company Giambus sa NPA, Tulo Patay
October 3, 2004
Kabasalan, Zamboanga Sibuguey Province - Gibanhigan sa usa ka yunit sa Wilson Feliciano Command - New People's Army ang 13 ka tropa sa 38th Special Forces Company nga nagpatrolya niadtong Septembre 29, 2004 sa usa ka sityo sa Barangay Pe�aranda, sakop ning maong lungsod. Nagsugod ang binuthanay sa may alas 8:00 sa buntag dihang miagi ang mga sundalo nga kabahin sa maneuver force sa 102nd Infantry Brigade sa inandam nga killing zone sa mga gerilya sa WFC. Ang lugar nga gisangkaan 30 minutos lamang ang gilay-on kun lakwon gikan sa pinakaduol nga detatsment sa Philippine Army.
Sumala sa taho sa yunit nga milunsad sa maong taktikal nga opensiba, mikabat og kapin usa ka oras ang panagsangka diin miresulta sa tulo [3] ka tropa sa SFC nga diha-dihang namatay ug dili matinong ihap sa mga samaron. Walay nasamdan bisan usa sa mga Pulang manggugubat sa Wilson Feliciano Command. Miwidro ang gerilyang yunit sa WFC sa may alas 9:15 sa buntag.
Gumikan sa hilabihang kapungot sa nahiagomang kaswalidad sa maong elite AFP combat unit, gipahimungtan sa militar ang walay kalabutan ug walay ikasukol nga mga lumulupyong sibilyan. Niadtong Byernes sa buntag, Oktobre 1, 2004 gisugdan sa 102nd Infantry Brigade ang pagkanyon sa mga bukirong dapit nga ilang gituohang maoy giatrasan sa NPA. Tinuyo nga gitarget ang barangay sa Diampak, sakop gihapon sa Kabasalan. Paturagas ug walay pagkonsidera sa mga sibilyang lumulupyo nga gipaulanan sa mga bala sa 105mm howitzer ang bukirong bahin sa maong barangay.
"Usa ka walay ulaw nga tubag kini sa usa ka lehitimong panagsangka", matud ni Ka Ismael Marte, tigpamaba sa CPP-NPA sa Western Mindanao Region, nga mipadayag sa iyang kusganong pagsaway sa pinutong nga reaksyon sa militar. Sumala sa tigpamaba, ang gipahigayon nga taktikal opensiba sa NPA usa ka lehitimong operasyong militar batok sa pasistang yunit sa AFP, apan ang balus sa 102nd Brigade usa ka dakung kalapasan ug wala nahisubay sa tanang lagda sa sibilisadong pakiggubat.
Usa ka kalapasan sa Comprehensive Agreement on Respect for Human Rights and International Humanitarian Law [CARHRIHL] ug sa Protocols of War sa Geneva Conventions ang tinuyo nga pagtarget sa mga komunidad sa sibilyan sa mga operasyong militar.
Sa pikas bahin, namahayag ang 102nd Brigade ngadto sa lokal nga media nga usa lamang kuno sa ilang tropa ang namatay sa panagsangka ug laing usa usab ang samaron. Ug aron tabunan ang makauulaw nga kapildihan sa maong panag-engkwentro sa Pe�aranda, ilang gipakaylap nga mga trainee lamang ang tropang gibanhigan sa NPA. Apan ang labihan ka bangis nga reaksyon sa AFP mipanghimakak sa pagpamutbot sa mga tigpamaba sa militar. ###
Reference:
Ismael Marte
Spokesperson
CPP-NPA Western Mindanao
Back to top
| 