PRESS RELEASE
Information Bureau
Communist Party of the Philippines

NPA sa Misamis Occidental Mipahamtang og Kaswalti sa 101st Brigade didto sa Sapang Dalaga
October 4, 2003

"Ang ihap sa mga kaswalti nga gipahamtang sa New People's Army ngadto sa 101st Infantry Brigade didto sa Sapang Dalaga nagpakita sa taas nga moral ug lig-ong panaghiusa sa mga Pulang kumander ug manggugubat bisan diha sa mga depensibang panagsangka ug bisan labihan silang nalabwan sa gidaghanon", kini ang pagtasa ni Ismael Marte, tigpamaba sa CPP-NPA sa Kasadpang Mindanao nga midayeg sa determinasyon ug kaisog nga makigsangka sa NPA ilalom sa Misamis Occidental Front Operations Command nga nanalipod ug nakig-away alang sa interes sa katawhan.

Si Marte nga mibase sa battle report sa Misamis Occidental Front Operations Command, mikompirmar karong adlawa sa gikatahong kaswalti nga gipahamtang sa NPA ngadto sa kaaway niadtong Oktobre 2 sa usa ka panagsangka didto sa Brgy. Manalac, Sapang Dalaga tali sa mga tropa sa Alfa Coy 5th Infantry Battalion ug 34th Military Intelligence Company nga gipangulohan sa 101st Brigade Command. Ang panag-engkwentro nagsugod nianang may alas 6:30 sa buntag dihang ang mga gerilya nga unang nakakita sa mga miatakeng tropa sa AFP, diha-dihang mimaniobra ug mipaulan og mga bala kanila. Ang panagsangka milungtad og 10 ngadto sa 15 ka minutos ug miresulta sa pagkamatay sa duha ka Army regulars ug tulo ka CAFGU.

Ang yunit sa mga Pulang manggugubat nga dunay kahanas sa tereyn ug nagatagamtam sa halapad nga suporta sa masa, tukmang migamit sa mga gerilyang taktika ug miatras nga luwas ug walay kaswalti nga naangkon.

Samtang sa pikas bahin, sa tinguha nga tabunan ang ilang palpak nga operasyon, ang 101st Brigade mipagarpar ngadto sa media nga nakapatay kini og 12 ka mga NPA. Apan gipanghimakak sa tigpamaba sa CPP-NPA ang maong pamahayag pinaagi sa pagsaysay sa taho sa lokal nga media nga ang kaswalti sa AFP mikabat gani sa unom ka tropang namatay.

Ang tigpamaba sa CPP-NPA sa Kasadpang Mindanao nagkanayon nga aron malikayan ang wala kinahanglanang mga kadaut, giawhag sa rebolusyonaryong kalihukan ang ordinaryong mga sundalo ug nahaubos nga mga upisyal sa AFP nga hunahunaon pag-ayo ayha mopatuman sa mga mando sa ilang mga labaw kinsa walay pagpakabana sa ilang kaayuhan ug kaluwasan. Gipunting ni Marte nga ang mga ordinaryong sundalo sa AFP ginabahog sa ilang mga abusado ug korakot nga upisyal ngadto sa mga takilid ug walay dag-anang panagsangka aron panalipdan ang usa ka dunot ug himalatyon nga sistema sa katilingban. Ang baratong sweldo, abusadong mga labaw, ang reaksyonaryo ug walay paglaum nga gubyerno ni Gloria Macapagal-Arroyo nga ilang ginapanalipdan tataw nga walay pulos pakamatyan, matod pa sa tigpamaba.

Si Ismael Marte hinuon miagni sa mga sundalo sa AFP nga modapig sa katawhan ug mosupak sa mga kontra-katawhang mando sa ilang mga labaw, o kaha mobiya sa pagserbisyo sa pasistang kasundalohan ug mokooperar sa NPA ug makigbisog alang sa usa ka makiangayon ug makatarunganong sistema sa katilingban.###

Reference:
Ismael Marte
Spokesperson
CPP-NPA Western Mindanao



Back to top