PAHINUNGOD KANG KA ORLAN, USA KA MAAYONG PULANG KUMANDER NGA GIMAHAL SA KATAWHAN

Adan Sindapan
Spokesperson
National Democratic Front-Western Mindanao
Oktubre 31, 2004

Sa ngalan sa rebolusyonaryong kalihukan dinhi sa Kasadpang Mindanao gipadangat sa NDF-WMR ang pahasubo ngadto sa katawhan, mga higala ug alyado, mga myembro sa mga rebolusyonaryong organisasyon ug mga ginsakpan sa Bagong Hukbong Bayan sa wala damhang pagkamatay ni Ka Orlan, Mario Bagondol ngadto sa iyang mga kaparyentihan, ang atong Ka Dorik ug Ka Jalee nga labing nailhan ug gimahal sa masa. Namatay siya niadtong Oktobre 28 sa may alas 11:45 sa udto gikan sa naangkong mga samad human gipangulohan ang mabayanihong tahas sa pakigsangka isip pagsanong sa nasudnong panawagan sa Partido Komunista sa Pilipinas sa pagpakusog sa armadong rebolusyon nga maoy hustong tubag sa wala-hitupnging krisis ug aron paninglan ang gikasilagan ug itoy sa imperyalismong US nga rehimeng Macapagal-Arroyo.

Namatay siyang nakig-away alang sa interes ug tinguha sa katawhang dinaugdaug ug pinahimuslan. Ang mga higala, kaila ug kaubanan nga nakasinati sa pagkasumbanan ni Ka Orlan sa kaisog ug disiplina anaa sa iyang kiliran sa ulahing mga gutlo sa maalagaron niyang kinabuhi.

Pipila lamang kanato ang dunay kahigayunang makapili o bisan mangindahay man lamang sa kinabuhing buot natong tagamtamon niining kasamtangang katilingban nga labihan ang gintang sa kabus ug adunahan. Labaw nang talagsaon kadtong dunay kahigayunang makapili sa matang sa dungganong kinabuhi nga buot pakamatyan. Ang bantugang Bukid sa Malindang nagapahinumdom kanato sa kabililhon sa pag-alagad ug paghalad sa kinabuhi ni Ka Orlan. Tinuod nga mas bug-at pa sa Bukid Malindang ang iyang kamatayon.

Sumala sa usa ka rebolusyonaryong pagtulon-an, "kun hain adunay pakigbisog didto adunay sakripisyo" ug ang kamatayon usa ka kasarangang panghitabo, usa ka sakripisyo nga gikinahanglan aron kab-uton ang gitinguhang kagawasan ug tinuod nga kaangayan. Gipakita ni Ka Orlan ang rebolusyonaryong sumbanan sa pag-atubang sa sakripisyo ug kamatayon, wala'y kahadlok nga iya kining giatubang.

Si Ka Orlan nga naggikan sa sabakan sa hut-ong mag-uuma usa sa mga nangandoy sa gawasnon ug makiangayong kaugmaon. Misalmot siya sa rebolusyonaryong armadong pakigbisog ug mitampo sa iyang kalantip ug katakus alang sa nasudnon-demokratikong tinguha sa katawhan pinaagi sa pagpahisakop sa Bagong Hukbong Bayan - ang tinuod nga kasundalohan sa katawhan.

Gikan sa pagka-yanong manggugubat nahimo siyang usa sa labing maayong Pulang Kumander nga nasulayan sa daghang mga panagsangka ug nakapangulo sa mga kadaugan ubay sa liku-liko ug malisod nga dalan sa paglunsad sa armadong rebolusyon dinhi sa Kasadpang Mindanao.

Nagpagarpar ang binayrang mga berdugo sa AFP sa pagkahanaw ni Ka Orlan. Apan haw-ang ang maong paghinambog gumikan kay padayon ang pagkadunot sa reaksyonaryong estado ug pagkatibulaag sa pasistang kasundalohan nga nanalipod niini gikan sa kaugalingong kadun�t ug demoralisasyon.

Ang kamatayon sa usa ka rebolusyonaryo o bisan sa gatusan pang sama ni Ka Orlan dili makapukan sa rebolusyonaryong kalihukan ug kawsa sa katawhan tungod kay ang dunot nga sistema sa katilingbang semipyudal ug semikolonyal nga nagpaantus kanila samot nagkaunlod ug nagatukmod sa nagkadaghang ihap sa mga kabus ug dinaugdaug ngadto sa dalan sa rebolusyonaryong armadong pagsukol. Mahanaw man gumikan sa kamatayon ang usa ka rebolusyonaryo aduna pay liboan gikan sa masang iyang gialagaran nga mosunod sa mga tunob ug mopadayon sa dalan nga iyang gisubay.

Samtang wala pay hingpit nga kasulbaran sa mga batakang suliran sa lanyaw'ng pagpanglupig ug pagpahimulos; samtang nagkasamot ang kakabus bunga sa kawalay yutang matikad sa katawhang mag-uuma; samtang padayong gihikawan ug giilogan sa yutang kabilin ang katawhang lumad; samtang kuyanap ang kawad-on gumikan sa kawalay disenteng kapanarbahoan sa mga mamumuo -- padayong motumaw ang labing maayong mga anak sa nanaghagong masa nga andam mosagubang sa kinatas-ang sakripisyo, mohalad sa ilang kinabuhi, makigbisog aron kab-uton ang tinuod nga hustisya ug kaangayan ug ilingkawas ang nasud gikan sa mga nagharing madaugdaugon ug hakugan. Pinaagi sa ilang sakripisyo ug paningkamot mahimong posible ang makiangayon ug gawasnong sosyalistang kaugmaon.

Ang kaylap nga kasubo ug kahingawa sa katawhan sa pagkahanaw sa usa ka Pulang Kumander angayang makapahinuklog sa batan-ong mga opisyal ug ordinaryong mga ginsakpan sa AFP-PNP nga maoy gipabugno sa mga nanaghari batok sa katawhan ug sa rebolusyonaryong kalihukan. Demoralisado sila tungod sa kalibog ug kalagot sa patiurok nga dagan sa ilang organisasyong naputos sa kahiwian ug panag-unay-unay. Sukwahi sa mga kurakot ug abusadong kadagkoan sa AFP-PNP, aniay usa ka lider ug kumander nga nakig-uban ug nangulo sa mga ginsakpan sa kaharuhay ug kalisdanan. Usa ka sumbanan sa demokratikong tradisyon sulod sa Bagong Hukbong Bayan nga personal nangulo sa mga panagsangka ug misuong sa mga peligro ug kakuyaw uban sa mga ginsakpan aron ipakig-away ug panalipdan ang rebolusyonaryong tinguha ug interes sa katawhan. Namatay si Ka Orlan nga nagadapig ug nagalaban sa mayoriyang dinaugdaug ug hinikawan - lakip na niini ang mga ordinaryong elemento ug sundalong sama sa kinabag-an nag-antus usab ug gipahimuslan sa madaugdaugong sistema.

Gihangyo sa NDF-WMR ang mga ahente sa intelidyens ug mga ginsakpan sa AFP-PNP-CAFGU, alayon sa makitawhanong mga lagda, nga hatagan og kahigayonan ang mga kaparyentihan, higala ug ang katawhan nga magpadayag ug mohatag sa ilang pasidungog sa rebolusyonaryong martir. Gilauman sa katawhan nga mahimong malinawon ang paglamay ug paghatod sa lubnganan sa minahal nila nga Pulang bayani.

Bisan wala na sa atong kiliran si Ka Orlan, ang iyang handurawan magpabiling inspirasyon ug hagit sa tanang rebolusyonaryong masa ug manggugubat nga nakauban niya sa pakigbisog.

Atong ipakita pinaagi sa dinaghang pagtambong sa martsa sa paghatod ngadto sa lubnganan sa atong bayani nga bisan kita nahasubo sa iyang pagkahanaw kita magpadayon ug magpursige sa dalan sa bag-ong demokratikong rebolusyon pinaagi sa malungtarong gubat sa katawhan hangtod sa hingpit nga kadaugan.

Ang rebolusyonaryong mga pwersa sa Kasadpang Mindanao nagayukbo ug nagapasidungog sa mga natampo ni Ka Orlan ug sa makausa pa nanumpa nga ipadayon ug ipalambo sa mas taas nga ang-ang ang mga tahas nga iyang nasugdan.

Mapulang pagsaludo alang kang Ka Orlan!
Mabuhay ang katawhang nakigbisog alang sa tinuod nga kagawasan ug demokrasya!
I-asdang ang armadong rebolusyon sa mas taas nga ang-ang!

Back to top