Baton sa buwa nga pahayag san 803rd Brigade kabahin san nahitabo nga agway giutan san AFP ngan NPA san naglabay nga Agosto, 2, 2004

Ka Amado Pesante
Tagapagsalita
Rodante Urtal Command
Bagong Hukbong Bayan -Northern Samar
Agosto 09, 2004

Sobra nga pagbaliko sa kamatuoran an report san 803rd Brigade san Philippine Army sa DYSM Aksyon Radyo kabahin san nahitabo nga agway sa giutan san NPA-RUC ngan 20th IB PA san nakalabay nga Agosto 2 didto sa giutan san Brgy. Mabini, Catarman ngan Brgy. Makatingog, Oquindo District, Calbayog. Desperado ini nga maniobra san 803rd Brigade basi tahuban an diri makarawat nga kaperdihan san maabot 80 nga tropa san 20th IB PA nga nag-atake sa haros duha la ka-iswad nga pwersa san NPA-RUC.

An kamatuoran, waray namatay o bisan la nasamaran sa gapil san NPA sa sakob san masobra sayo kaoras nga away. Diri ini maililikaw sa masa nga parag-uma tungod kay aktibo sira nga nabulig sa pagtimangno in kaso may gud man patay o samaran an NPA. Sa luyo nga bahin, an 20th IB PA lugod an klaro nga may tulo nga patay ngan lima nga grabe nga nasamaran. Testigos sini an mga tawo mismo sa nasabi nga erya nga nakakita san pagkarga san militar san ira mga kaswalti sa helikopter nga linanding apeki sa baryo. Dugang nga pagpamatuod sini an mga duguon nga agi sa pag-atras san mga sundalo ngan an nakit-an nga mga bayawan (stretcher) nga ginkargahan san mga patay ngan samaran nga sundalo sa apeki san ginlandingan san helikopter. Maaram gad sini nga kamatuoran an mga ordinaryo nga sundalo san 20th IB PA, kundi pirit nala nga nagpapakabuta-bungol tungod san desperasyon san ira mga mayor ngan upisyales nga tahuban an ira kaaluhan ngan kapakyasan.

Duha an mayor nga hinungdan kun kay nano nga ginbirikis an kamatuoran san 803rd Brigade sa pamumuno ni Col. Bernard de Luna: Una, kaparte ini san ira psywar basi uwaton ngan patuohon an katawhan nga nagigin madinaugon an ira mga strike operation kontra sa NPA. Ikaduha, basta-basta la liwat nga tinuod si Col. de Luna sa buwa nga report san CO san nasabi nga yunit san 20th IB PA tungod kay pabor para sa ira nga tahuban an kaperdihan ngan baliktaron an kamatuoran.

Sa luyo nga bahin, nagin madinaugon an ginhimo nga depensa ngan kontra-atake san NPA tungod kay temprano ini nga nakaandam. Pag-abot pala san 20th IB PA sa Brgy. Makatingog, dayon na nga nahibaro an mga pwersa san NPA tungod san pagpasabot san damo nga parag-uma nga nakakita sa mga sundalo. Sanglit pagsaka pala san militar sa bukid san Brgy. Makatingog, direkta na sira nga nasubaybayan san NPA, tubtob nga umabot sira sa usa nga sityo san Brgy. Mabini san Agosto 1. Labot pa san maupay nga intelligence ngan aktibo nga bulig san masa sa NPA, maupay liwat an tereyn nga nahimumutangan san mga gerilya, sanglit nakurian gud sa pag-atake an militar. Nagtikang an away alas-tres-dyes san kulop (3:10 PM) san Agosto 2, pero temporaryo nga inatras tipaubos san bukid an naatake nga militar tungod san maupay nga depensiba nga mga taktika ngan maniobra san NPA. Dugang pa, napahimulsan ngan nagin paborable liwat sa NPA an kamatalaw san CO san 20th IB PA nga namuno sa nasabi nga pag-atake. Diri maaram ini nga CO san kongkreto nga kamutangan san iya tropa ngan san kamutangan san NPA nga ira gin-aatake, tungod kay naghihinatag siya sin mga mandasyon ngan order samtang sobra kahirayo an iya pusisyon sa pusisyon san iya tropa. Nakasulod an militar sa kampo san NPA pasado na alas-singko (5:00 PM) siton nga kulop, san mamingaw na tungod kay talwas ngan organisado na nga nakabalhin an mga gerilya nga NPA.

Sini nga panhitabo, pira la nga gamit sa kusina an nakuha san militar sa NPA. An mabug-at lugod nga naapektuhan sini nga operasyon militar mao an mga parag-uma sa agpeki nga baryo. Una, antes sira umatake, nag-istambay ngun-a an 20th IB PA sa usa nga sityo nga may pira nga bablay nga waray tawo, kun diin ginpangawat nira an kamanukan ngan ginhalungkat an mga gamit san mga parag-uma. Ikaduha, bisan kun waray na kaaway, nagpinabuto pa sin mortar an mga sundalo tubtob san kinabuwasan nga aga, nga nagresulta naman sa kahadok san mga tawo dinhi. Ikatulo, dugang yana an paghimakuri san mga parag-uma sini nga mga baryo tungod kay limitado an ira pagtukad-tukad sa uma dara san ira kahadok sa mga operasyon militar, nga ginigiyahan naman sin mga kriminal nga CAFGU nga daan na may kontradiksyon sa mga sibilyan sa nasabi nga mga baryo.#

Back to top