OPEN LETTER: Mga Operasyon Militar san AFP: Dugang nga Pakuri sa Katawhan san Norte san Samar

Ka Amado Pesante
Tagapagsalita
Rodante Urtal Command
Bagong Hukbong Bayan -Northern Samar
Agosto 09, 2004

An makusog nga mga operasyon militar yana sa Norte san Samar, labi na an mga SOT (special operations team) operation san AFP, dugang la sa kakurian nga daan na ginpapas-an san katawhan sa kabaryuhan. Labot san diri na mailob nga grabe nga kakurian sa panginabuhi nga epekto san krisis sa ekonomiya, biktima pa an masa nga parag-uma san nagtitikakusog nga militarisasyon sa kabaryuhan. Dako nga ulang sa mahimyang ngan mamurayaw nga pagpakabuhi sa kaumhan an makusog nga mga operasyon militar san AFP.

Ginbalik ngan otro ginpakusog san militar an mga SOT operation dinhi sa lalawigan san tuig 2001. Kada tuig may klaro nga target area an ira mga SOT operation. San 2001, nagtikang an mga SOT operation sa mga baryo nga sakop san mga bungto san San Isidro, Bobon ngan Catarman. Pag-abot san 2002, ginpadayon an mga SOT operation sa mga baryo nga sakop san mga bungto san Gamay, Lapinig, Catubig ngan parte san Las Navas sa Hagbay River; ngan san 2003, sa mga baryo naman san Lao-ang ngan Bobon. Yana nga 2004, otro nira nga ginbalikan an mga baryo san Las Navas ngan Silvino Lubos, kun diin nagpapadayon ngada yana an makusog nga mga operasyon militar.

Sa kada pagkusog san mga SOT operation san militar, kadungan nga nagkukusog liwat an mga human rights violation (HRV) san AFP. Diri gud malilikyan ini nga mga panalapas ngan pangabuso tungod kay an ngatanan nga plano san mga operasyon militar sa pagmalapoypoy sa rebolusyonaryo nga kagiusan nakaangkla sa estratehiya san militar nga "PAHUBSAN AN TUBIG BASI MAMATAY AN ISDA", kun diin an rebolusyonaryo nga kagiusan kuno an isda ngan an masa ngan katawhan naman an tubig. Kun sugad, klaro nga api an sibilyan nga populasyon sa target san militar sa pagmalabungkag san gintatawag sini nga pampulitika nga istruktura san CPP-NPA-NDF.

Nagigin ordinaryo nala nga binuhatan san kasundaluhan san AFP an pandakop ngan panginterogar sa mga sibilyan nano man nga oras nira karuyagon, an panarhog, pwersahay nga pagpagiya sa mga operasyon militar, ngan an piniritay nga pagrekluta sin mga CAFGU ngan mga sibilyan nga impormer. Pinakagrabe pa an pag-salvage nira sa ira mga suspetsado nga kaapi o suporter san NPA, sugad san ginhimo nira sa duha nga batan-on nga nakilala sa mga ngaran nga Marlon, 16 anyos, ngan Ricky, 17 anyos, nga ginsalvage san usa nga yunit san 63rd IB PA sa Brgy. San Vicente, Catubig sadton naglabay nga tuig 2003.

Pinaagi san mga SOT operation, pwersahay nga "ginpapasurender" san militar an mga sibilyan, nga an nag-iinsister nga diri masurender grabe nga gin-iipit ngan gintatarhog nga dadakpon, pepresuhon o papatayon. Sa kahadok san mga tawo, napipiritan sira nga "sumurender"-magpirma sin mga papeles nga "nagpapamatuod" nga nasurender sira ngan magpartisipar sin mga peke nga seremonya san pagpasurender. Sanglit damo nga parag-uma an tag-tulo ngada upat kabeses na nga "nagsurender", bisan man kun an simpatiya nira nagpapabilin sa rebolusyonaryo nga kagiusan.

Mas mabug-at an epekto san mga operasyon militar ngan SOT operation kontra san nano man nga natural nga kalamidad nga naeksperyensyahan na san masa dinhi sa lalawigan. Kun may bagyo o baha, an grabe la nga apektado mao an mga pananum, hayupan, bablay ngan, sa pira nga kaso, an kinabuhi mismo san tawo. Samtang, sa panahon san pagkusog san militarisasyon, diri la an mga tanum, hayop ngan kinabuhi san tawo an namimeligro, kundi pati an ira libre ngan murayaw nga panhunahuna, pag-ukoy ngan paggios. Damo an nagkakagutom nga parag-uma dara san kahadok nga tumukad sa ira mga uma basi kunta manhanap sin pagkaon ngan pagkakakitaan. Labot la san kahadok nga pagsuspetsahan sira nga kaapi o suporter san NPA, nahahadok liwat sira nga hiagian san militar sa ira mga umhanan o sa dalan ngan piriton nga maggiya sa mga operasyon militar, o abusuhon ngan pagngaranan naman nga NPA.

Mismo sa mga baryo diri mamurayaw an pag-ukoy ngan pagpahuway san mga tawo. Damo an ira kinakaritan kun ada an militar sa ira baryo. Una, delikado an mga sibilyan sa crossfire in kaso mag-aragway tungod kay natig-ob la an mga sundalo sa mga tawo sa baryo. Ikaduha, nahahadok liwat sira kun nagkakahubog an mga sundalo kay damo na an kaso nga sira-sira ta an nagpupurusilay. Kongkreto nga pananglitan sini an pagkamatay sadton 2000 sin sayo nga Sgt. Husayan san 19th IB PA sa Brgy. Capacuhan, Palapag. Naninilikado liwat an mga tawo kun nagkakahubog an mga sundalo tungod kay bisan nala ngain gintatadong an mga pusil sini. Ikatulo, may tala la nga madiri-an sa mga sibilyan, armas dayon an baton san militar. Pira nga kaso sini an grabe nga pagkastigo san mga sundalo kan Marsing Durin, usa nga may diperensya sa panhunahuna, sa Brgy. Bolao, Las Navas, ngan an pagpusil ngan pagpatay kan Agosto Capoquian sa atubangan san mga tawo sa Brgy. Dolores, Las Navas sadton Hulyo 2003.

Kun diin man nga baryo an may mga sundalo, dida naulbo an kasamukan. Nasamwak an huroygo ngan irignum kay an mga sundalo mismo an nangunguna, sugadman an pangawat sin kamanukan nga igsusumsum. Eksperyensya san mga tawo sa Brgy. Hiparayan, Silvino Lubos ngan Brgy. San Vicente, Catubig an mga kaso nga an militar mismo an nagtutukod sin grupo nga parupanngawat karabaw, nga an pira nga kaapi mga CAFGU. Grabe an kabaraka san kalalakin-an nga magkabibiktima san militar an ira kaasaw-an ngan mga anak o kauropdan nga babaye, tungod kay samwak na ini nga eksperyensya sa damo nga mga baryo. Maaram liwat an masa nga damo nga sundalo an nagamit sin igindidiri nga droga.

Ini nga mga panhitabo, daan man o bag-o, klaro nga mga pagtalapas san AFP sa CARHRIHL (Comprehensive Agreement on the Respect for Human Rights and International Humanitarian Law) nga ginpirmahan san gobyerno san republika san Pilipinas (GRP) ngan san National Democratic Front of the Philippines (NDFP). Pagpamatuod la liwat ini nga an AFP sayo san mga dagko nga ulang sa negosasyon pangkamurayawan sa giutan san GRP ngan NDFP. Dinhi ginpapakita san militar an iya ungod nga kolor komo mga mersenaryo ngan pasista nga hukbo nga nagseserbi diri sa interes san nasud ngan katawhan kundi sa interes san imperyalismo nga US, dagko nga kumprador burgesya ngan dagko nga agaron maytuna. Sanglit, waray gud bisan nano an katawhan kun waray an Bagong Hukbong Bayan (NPA) nga mao an magseseguro sa pagprotiher san interes san nasud ngan katawhan.

Kinahanglan magin maungod an katawhan, kaupod na an NPA-an ungod nga hukbo san katawhan-sa pakig-away agud pakyason an maitum nga larang san kaaway sa pagmalapoypoy san makatadungan nga pakigbisog san katawhan. Kinahanglan atohan ngan supakon an nagtitikakusog nga militarisasyon sa kabaryuhan. Kinahanglan hiluagan nga pukawon ngan organisahon an haluag nga katawhan para sa pagsuporta sa kontra-imperyalista, kontra-pyudal ngan kontra-pasista nga mga pakig-away. Kaupod liwat nga angay organisahon an mga kauropdan ngan kasangkayan nga mga kaapi san AFP, PNP ngan CAFGU, agud diri sira sumunod san mga kontra-katawhan nga mando san ira mga labaw, ngan gumapil lugod sa interes san katawhan. Abyerto an rebolusyonaryo nga kagiusan sa pakig-usa sa sin-o man sa ira nga may paghigugma ngan pag-ugop sa nasud ngan katawhan nga rinaugdaug.

Sa ngaran san rebolusyonaryo nga kagiusan
ngan katawhan sa Norte san Samar,

Ka. AMADO PESANTE
Tagapagyakan, Rodante Urtal Command
New People's Army
09 Agosto 2004

Back to top