An militar, diri an NPA, an ungod nga tarhog sa bungto san Silvino Lubos

Ka Rocky Lucban
Tagapagyakan
Rogelio Bantilo Command
New People's Army-Prente Gerilya III
Norte san Samar
Agosto 05, 2004

Buwa ngan waray basaranan an nagin pahayag sa midya ni ex-mayor ngan yana Board Member Marites Gillamac nga natatarhog kuno san NPA an Silvino Lubos tungod san kabakante dinhi san lokal nga panggubyernohan. An kamatuoran, an militar lugod an may ungod nga tarhog sa bungto.

Sa isyu san Leyte Samar Daily Express sadton Hulyo 4, 2004, iginpahayag ni Gillamac nga samtang nag-iiha an kabakante san munisipal nga pamunuan sa Silvino Lubos, mas nagtitikapaso an bungto sa mata san NPA. Ginsugad pa niya nga natatarhog kuno an mga taga-bungto tungod san nakikit-an nira nga mga pwersa san NPA sa lugar.

Pero buwa ngan waray basaranan an nasabi nga pahayag sa midya ni Gillamac, nga waray iba nga tuyo kundi an pakarauton an NPA ngan igladawan ini komo terorista. Ginkaklaro san Rogelio Bantilo Command san NPA (NPA-RBC) nga nagios sa nasabi nga erya, nga waray bisan nano nga interes an NPA nga singabuton an kawaray sin munisipal nga panggubyernohan dinhi. Kasumpay sini an masunod nga mga punto:

Una, diri an NPA, kundi an AFP, an ungod nga tarhog yana sa kamurayaw san Silvino Lubos ngan sa panginabuhi san mga taga-dinhi. Sayod sa ngatanan nga may usa nga detatsment an 63rd Infantry Batallion san Philippine Army (63rd IB PA) nga aada mismo nakabase sa sakob san poblasyon san Silvino Lubos. Ini nga detatsment in may halaba na nga rekord san mga pangangabuso ngan pagtalapas sa katungod pantawo-nga an iba in basar sa mando ni ex-mayor Gillamac-nga puros nagbibiktima sa mga sibilyan san bungto ngan mga kahagrani nga baryo dinhi. Kaparte na sini nga mga terorista nga pangabuso san AFP an masunod:

panarhog sa mga sibilyan, labi na adton mga kaapi san mga progresibo nga organisasyon ngan partylist, mga ginsususpetsahan nga suporter san NPA, mga suporter san mga pulitiko nga diri nira ginpapaboran, ngan iba pa.
panhibang ngan pangawat sa mga propyedad ngan hayupan san mga taga-Silvino Lubos, labi na san mga parag-uma sa mga interyor nga baryo dinhi.
pangastigo sa mga sibilyan, panaga sin pusil, ngan iligal nga panginterogar o pangimbestigar, labi na sadton mga ginbubutangan nira nga kaapi o suporter san NPA.

Ikaduha, an nahitabo nga failure of elections sa walo nga barangay san Silvino Lubos in binuhatan mismo san AFP, partikular sini nga detatsment san 63rd IB PA. An pagkadelatar san eleksyon sa pira nga mga interyor nga baryo san Silvino Lubos in resulta san pagkalangan san mga sundalo sa pagdul-ong ngadto san mga orna (ballot boxes). Partikular sa Brgy. Imelda, nahiabot an mga orna san Mayo 11 na, sanglit waray na dinhi pakagkondukta sin eleksyon. Dugang pa, gidamoi liwat an mga nagin pagtalapas san militar sa mga balaudnon san eleksyon antes pa an eleksyon, sa adlaw mismo san eleksyon, ngan tubtob mahuman an eleskyon. Kaparte sini nga mga pagtalapas, nga an iba ginmando mismo ni Gillamac, an masunod:

iligal nga pangampanya kontra sa mga progresibo nga partylist sugad san Bayan Muna, Anakpawis, Gabriela, ngan iba pa.
pagtarhog nga papatayon an bisan sin-o nga mga kaapi sini nga mga partylist nga makadto sa Silvino Lubos para mangampanya ngan mag-organisa.
iligal nga pagsakob san mga sundalo sa adlaw mismo san eleksyon sa mga presinto sa bungto ngan sa iba pa nga baryo dinhi, sugad san Brgy. Hiparayan.
panaga sin pusil sa sakob san presinto samtang ginbabasa san mga taga-COMELEC/Board of Election Inspectors an mga balota. Damo an testigos nga kun an mga balota diri pabor kan Gillamac ngan sa iya bugto nga kandidato pagka-mayor, diri ini san mga sundalo iginpapa-sulod sa orna.
pangastigo sa sakob mismo san presinto sin usa nga taga-midya ngan paghibang san iya kamera ngan film, ngan pagtarhog sin usa nga taga-COMELEC sa sakob naman san singbahan san bungto. Ginhimo ini nga pangastigo ngan panarhog san mga sundalo, sa pamumuno san asawa mismo ni Board Member Gillamac nga si Maj. Edmun Gillamac, nga binaya la sa kun diin man siya nakadestino basi la pangunahan an pag-terrorize san eleksyon sa Silvino Lubos.

Ginpapanhimuwa liwat san NPA-RBC an pahayag ni Col. Bernard de Luna, kumander san 803rd Army Brigade, nga pareho san pahayag ni Board Member Gillamac, nasugad liwat nga an kawaray sin munisipal nga pamunuan sa Silvino Lubos in usa nga sitwasyon nga poyde singabuton san NPA. Sa kamatuoran, mas makaharadok yana sa Silvino Lubos tungod kay baga-baga yana dinhi in martial law kun diin naghahadi an terorismo san 63rd IB. Damo nga testigos an nakabati san pagsugad mismo san mga pinakaabusado nga elemento san militar ngan CAFGU nga magkakamayaon sira sin military takeover tungod san kawaray pa sin munisipal nga upisyales dinhi. Nagresulta ini sa grabe yana nga kabaraka ngan kahadok san mga sibilyan sa bungto ngan mga baryo san Silvino Lubos, nga an iba ngani nga pamilya in adto na nag-ebakweyt sa bungto san Pambujan.

Sanglit, supak sa pahayag nira Board Member Gillamac ngan Col. de Luna, diri himumurayaw an Silvino Lubos samtang aada an terorista nga detatsment san 63rd IB, ngan samtang ginhahadian an bungto sin mga reaksyunaryo nga pulitiko nga militarista ngan kontra-katawhan.#

Back to top