An kamatuoran sa luyo san pagtambak sin mga sundalo ngan pagkusog san operasyon militar sa Silvino Lubos

Ka Amado Pesante
Tagapagsalita
Rodante Urtal Command
Bagong Hukbong Bayan -Northern Samar
Agosto 05, 2004

An Silvino Lubos sayo san duha nga bungto sa Norte san Samar kun diin waray pa naiproklamar nga munisipal nga upisyales tungod san deklarasyon san "failure of elections" sa walo nga barangay dinhi. Kasumpay sini, waray kamatuoran an naipublikar sa Hulyo 4 nga isyu san Leyte Samar Daily Express (LSDE) nga mga akusasyon nira Col. Bernard de Luna, commanding officer san 803rd Brigade san Philippine Army, ngan Board Member Marites Gillamac, ex-mayor san Silvino Lubos, nga may tarhog an NPA pag-atake sa nasabi nga bungto agud pahimulsan an sugad nga sitwasyon sini. Mas labi nga waray kamatuoran an mga nagsarang nga istorya nga may tarhog an NPA sa pamilya ni Gillamac o sa iya bugto nga si Noel Jarito, nagkandidato pagka-mayor sa Silvino Lubos.

An kamatuoran, mga hinimo-himo la ini nga istorya basi tagan-katadungan an pagdamo san tropa ngan pagkusog san mga operasyon militar sa Silvino Lubos, ngan hasta sa bug-os nga probinsya. Antes pa an naglabay nga eleksyon san Mayo 10, gintambakan na an Silvino Lubos sin mga sundalo san 63rd IB PA ngan ginpakusog na an mga operasyon militar dinhi, nga nagpapadayon pa tubtob ngada yana. San Abril 2004, igindugang sa tropa san 803rd Brigade nga nakabase sa Camp Sumuroy, Brgy. Dalakit, Catarman an duha pa nga batalyon - an 20th IB PA ngan an 52nd IB PA - nga san pagkaabot la, diretso nagtikang san ira makusog nga operasyon militar sa haros bug-os nga probinsya. Gin-galugad san militar an mga baryo ngan kagugub-an san Catarman, Bobon, San Isidro, Las Navas ngan Silvino Lubos sa Norte san Samar, ngan tubtob sa Oquindo District, Calbayog, Weste san Samar.

Duha an mayor nga katuyuanan san una nga abansada san mga operasyon militar antes an Mayo 10 nga eleksyon: Una, nyutralisahon an NPA ug pugngan an mga progresibo nga kandidato ngan partylist agud diri epektibo nga makagios sa panahon san eleksyon, ngan sa luyo nga bahin, ig-undong an mga kadidato ngan partylist nga ginsusuportahan san militar. Ngan ikaduha, hawanan an dalan para sa epektibo nga pagpapatuman san mga SOT (special operations team) operation agud bungkagon an ginsesering nira nga pampulitika ngan panmilitar nga istruktura san CPP-NPA-NDF.

Kun sugad, an pagdagsa san mga sundalo ngan pagkusog san mga operasyon militar sa Silvino Lubos diri tungod kay may plano an NPA nga atakehon an nasabi nga bungto, kundi tungod kay kaparte ini san implementasyon san 803rd Brigade dinhi sa probinsya san Phase-II san Campaign Plan "Kalinaw-Visayas" nga gindisenyo san Central Command (CENTCOM) san AFP nga nakabase sa Camp Lapu-lapu, Cebu City. An katuyuanan sini nga ira kampanya mao an pagnyutralisa san gintudlok nira nga tulo nga aktibo nga prente-gerilya sa Samar pinaagi san pagbungkag san pulitiko-militar nga istruktura san CPP-NPA-NDF ngan pagtutukod san gintatawag nira nga Integrated Territorial Defence System (ITDS).

Sanglit, an mga Nortehanon kinahanglan hugot nga mag-ikmat ngan diri magpauwat sa militar. Kinahanglan nga umato ngan kaptan an mga leksyon sa naglabay nga mga eksperyensya sa pag-atubang san militarisasyon sa kabaryuhan. Lab-as pa sa huna-huna san mga Nortehanon an magpakangingirhat nga agi san mga SOT operation nga gindumara nira sadto-anay Maj. Danilo Bilion ngan Capt. Jovito Solima, diin damo kaupay an pinanngastigo ngan pinanmatay, pinanlugos nga kababayen-an, pinan-ugmaran dara san grabe nga panarhog ngan pamwersa, ngan nag-erebakwet sa iba-iba nga lugar dara san grabe nga kahadok. Waray iba nga pagpipilian an katawhan kundi an umato pinaagi san rebolusyonaryo nga armado nga pakigbisog agud matalwas sa luon-luon nga kakurian nga ginpapas-an, sa ilarum sini nga baga-kolonyal ngan baga-pyudal nga sistema san katilingban.#

Back to top