Magdinaugon an mga depensiba nga aksyon san NPA kontra san makusog nga operasyon militar san AFP

Ka Amado Pesante
Tagapagsalita
Rodante Urtal Command
Bagong Hukbong Bayan -Northern Samar
Hulyo 30, 2004

Sa sulod la san tulo kabulan, masobra na usa ka-iskwad an namatay ngan nasamaran sa gapil san AFP sa Norte san Samar resulta san tulo nga magkasurunod nga magdinaugon nga depensiba nga aksyon san NPA kontra sa makusog nga pangatake san AFP. Una, kumpirmado nga nakaamkon sin mabug-at nga kaswalidad (namatyan ngan nasamaran) an yunit san 20th IB nga nagreyd sa usa nga yunit san NPA sa bukid san Brgy. Palanit, San Isidro sadton Mayo 5, 2004. Ikaduha, san inagi nga Hulyo 6, duha liwat an patay ngan may samaran pa sa militar san nahitabo nga esnayping operation san NPA kontra san nag-operasyon nga yunit san 20th IB sa kabukiran giutan san Brgy. Mabini, Catarman ngan Brgy. Makatingog, Oquindo District, Calbayog. Ikatulo, duha liwat an patay ngan mayda pa samaran sa 63rd IB resulta san kontra-reyd nga ginhimo san NPA san naglabay nga Hulyo 11 sa may Brgy. Cagdao, Silvino Lubos. Sini ngatanan nga panhitabo, waray bisan usa an namatay o nasamaran sa gapil san NPA.

Bisan kun sa balanse san pwersa nakakalamang pa sin dako an AFP kontra sa NPA sa aspeto san tawohan, treyning, higamit militar ngan rekurso, nakapaglansar gihapon an NPA sin magdinaugon nga taktikal nga opensiba ngan depensiba nga aksyon kontra sa AFP. Pinakadako nga hinungdan sini nga mga kadaugan san NPA an padayon nga pag-uswag san hiluag ngan hilarum nga suporta panmasa, an padayon nga pag-uswag san kabatiran sa ginerilya nga pakig-away ngan san mga taktika ngan teknik sa away san mga pwersa san NPA, an ira rebolusyonaryo nga kaisog ngan kaandaman sa away, ngan an ira kabatiran sa tereyn ngan katunaan.

Pira sini nga magdinaugon nga aksyon san NPA tikang pa san 1998 mao an reyd sa Provincial Mobile Group san PNP sa Brgy. Urdaneta, Lavesarez; an magkadungan nga reyd sa bungto san Mapanas ngan sa detachment san 19th IB sa Brgy. Burgos, Mapanas; an reyd sa mga bungto san Lope de Vega ngan Gamay; ngan an ambush sa Sityo Hibabawgan, Brgy. Washington, Catarman. Ini nga magdinaugon nga taktikal nga opensiba san NPA, upod na an magdinaugon nga depensiba nga aksyon sini kontra sa iba-iba nga yunit san AFP, mao in usa nga makusog nga tampalo sa pauro-utro nga deklarasyon san militar nga nagmamadinaugon an ira kampanya pagpoypoy sa rebolusyonaryo nga kagiusan dinhi sa Norte san Samar. Bisan an pabalik-balik nga mga operasyon san mga special operations team (SOT) san AFP madig-on na nga basaranan nga buwa an propaganda san militar nga nahimumulag na kuno sa katawhan an NPA. Kun ungod nga aada na sa gapil san militar an simpatiya san katawhan, kay ano man nga nagastos pa sira sin tagdako nga tropa, salapi ngan panahon para san ira mga SOT operation nga ginlalansar yana sa mga interyor nga baryo san Las Navas ngan Silvino Lubos? Kun ungod nga epektibo an dulot san ira mga SOT operation, kay ano man nga pira pala kabulan tikang nira gin-SOT an mga baryo sa Catarman, diretso la nakapaglansar an NPA sin madinaugon nga ambush sadton nakalabay nga Disyembre 2002 sa Sityo Hibabawgan, Brgy. Washington-pira la ka-kilometro tikang sa Headquarters san 803rd Army Brigade sa Camp Sumuroy, Catarman?

Kinahanglan karawton nala san militar an kamatuoran nga permi gud pakyas an ira kampanya pagmalapoypoy sa rebolusyonaryo nga kagiusan tikang pa san kapanahunan san diktadura nga US-Marcos. An kamatuoran, an sibilyan nga populasyon lugod an grabe nga naiigo san ira kampanya ngan mga operasyon kontra sa NPA. Sanglit dugang la an AFP nga nahimumulag sa katawhan, ngan napupukaw ug nahiduduso lugod an katawhan sa kinabuhi-ngan-kamatayon nga pagsuporta sa NPA ngan sa aktibo nga pagpartisipar sa pagpasulong san armado nga pakig-away.

Tungod sini, hul-os nga ginpapaabot san Rodante Urtal Command san NPA (NPA-RUC) sa Norte san Samar an hitaas nga rebolusyonaryo nga pagsaludar ngan pagpasalamat sa mga kaapihan san mga rebolusyonaryo nga organisasyon masa, mga yunit milisya, mga kasangkayan ngan katawhan nga waray hadok nga nasuporta sa rebolusyonaryo nga pakigbisog. An ano man nga porma san paggios ngan pagsuporta sa rebolusyonaryo nga kagiusan in may mahinungdanon nga amot para sa panalinguha nga maidaug an rebolusyonaryo nga pakigbisog agud matukod an tinuod nga demokratiko, mamurayaw ngan mauswag nga katilingban.

Mabuhay an tinuod nga kasundaluhan san katawhan-an NPA!

Magkaurusa, gumios, atohan ngan pakyason an nagtitikakusog nga militarisasyon sa kabaryuhan!

Back to top