Aldaw Ita Dagiti Inna, Ngem Magunggundawayan kam' Latta!

Mayo 08, 2005

Maipaduyakyak iti adu a pabuya, diyaryo ken istasyon ti radio ita ti kinaindaklan dagiti inna ita nga aldaw, Mayo 8, ti Mother�s Day.

Naindaklan dagiti inna gapu ta isuda ti nangted-biag kadatayo, ti naganus a nangawit kadatayo iti uneg ti siam a bulan. Ngem saan laeng a panangipasngay ti inanusan dagiti inna. Iti panagtulid ti panawen, binaklay ken bakbaklayen da ti rumigrigat a biag gapu�t krisis iti kabiagan. Adayo a nalaklaka ti panangipasngay iti ubing ngem ti panagpanunot no kasano nga isakad ti panagpabasa, panangpaagas ken panagbirok ti panggedan tapno mapakan, makawesan ken mapadakkel dagiti inang ken tatang dagiti annak da.

Dimmanonen sadi langit ti presyo dagiti banag ken gagatangen�manipud bagas agingga�t kendi, asin ken plete. Rinibu ti matrikula ken gastos iti panagpaeskuela. Saanen a makaanay ti sapul ti pamilya manipud ti naluglugi a koman ken talon a nabagyo idi ken natikag ita, ti sapul kas drayber, mangmangged talon, ken mangmangged dagiti tatang. Awan latta ti katalgedan ti kabiagan uray nakasubsob ti ulo dagiti inna iti pannakitegged iti dasa, panaglako iti palengke, panaglabada; uray iti trabaho a kas maestro wenno propesyunal.

Naindaklan dagiti inna, pudno la unay. Gapu ta saan da laeng nga agpatingga iti panaganus iti kastoy a kasasaad. Am-amirisen itan dagiti kababaihan no apay a kumarkaro ti nabayagen a nakaro a kasasaad. Ti kinakapsut ti ekonomya, ti kinaawan ti daga dagiti mannalon, ket pagpatpatalinaeden ken pakpakaroen ti imperyalismo nga United States, nga isu�t kabusor dagiti inna ken umili a Pilipino. Tungpal-bilin kadagitoy a ganggannaet dagiti aso-aso da, nga idadauluan ni Gloria Macapagal-Arroyo.

Gapu iti kontrol ti US, naigalut ti Pilipinas kadagiti agrurutap nga utang a saan met a pagnamnam-ayan ti umili. Mapan amin a kuarta ti pagilian iti panagbayad ti utang ken panagpataray iti awanan-serbi a gobyerno. Saan a maikkan ti badyet ti panagadal, balay ken panagpaagas ti umili, gapu ta busbusen amin ti gobyerno iti bayad utang. Awanan bain ketdi ni Gloria Macapagal- Arroyo ta saanna nga ammo a salemetmetan ti interes dagiti annak na kas maysa nga ina ti pagilian a Pilipinas, rumbeng laeng kuma nga ipangrunana nga ipaayanna iti nasayaat nga biag dagiti annakna.

Naindaklan dagiti inna, gapu ta rumrummuar dan kadagiti nailet ken akiked a pagtaengan tapno singiren ken patapwaken manipud iti poder ti kontra-kababaihan ken kontra-umili a rehimen ni Gloria Macapagal-Arroyo�ti makunkuna nga Ina ti Umili ngem kangrunaan a mangparparigat kadakuada. Ammon ti kababaihan a saan a panawen itan ti panagulimek; ammo da ti adal ti pakasaritaan a saan a madalan iti panagpakaasi wenno panangnamnama iti gobyerno ti solusyon ti panagrigrigat.

Kakuyog dagiti asawa, annak ken pada da a kababaihan ken umili a magunggundawayan, pappapigsaen dagiti inna ti intar dagiti lumablaban nga umili. Agar-armas ti umad-adu a kababaihan, sumilsilpo ti New People�s Army wenno NPA, gapu ta nainkalintegan ti lumaban iti panawen ti krisis ken pannakagundaway.

Husto laeng nga agtignay iti naduma-duma a pamuspusan tapno rippuogen ti gobyerno a mangparparigat iti kababaihan ken umili, tapno mawaswas ti kontrol ti imperyalismo nga US. Gibusan tayo ti krisis babaen ti panangitakder ti baro a sistema ti gimong nga iturayan dagiti magunggundawayan nga umili.

Agbiag ti kababaihan!

Agtignay tapno salakniban ti biag ken karbengan iti panawen ti krisis!

Back to top