Ka Jolly - Bantugang Pulang Kumander sa Zamboanga, Bayani sa Katawhang Pilipino

Ismael Marte
Spokesperson
CPP-NPA in Western Mindanao
Nobyembre 03, 2004

"Iasdang ta ang gubat
Sa pulong man o buhat
Hingpit nga maunongon
Sa kawsa ta matinud-anon"

-gikan sa awit sa usa ka Pulang manggugubat nga nakalas sa usa ka raid niadtong Nobyembre 29, 2000 sa Brgy. Datagan, Sindangan, Zamboanga del Norte

Nakat-onan ni Ka Jolly ang paglaylay sa awit sa kinabuhi-ug-kamatayon nga pakigbisog sa Bagong Hukbong Bayan, sa katawhang gialagaran, ug panimalos alang sa nahaunang mga martir nga napukan. Ang kinaulahiang gubat sa Brgy. Datagan niadtong 4:50 sa kabuntagon sa Oktubre 27, 2004 nga gipangunahan ni Ka Jolly mipatay sa 4 ka pasistang tropa ug miangol sa 8 mao ang katapusang sangka niya uban sa Bagong Hukbong Bayan batok sa tibuok dunot nga nagharing sistemang semikolonyal ug semipyudal.

Gipangunahan ni Ka Jolly ang reyd-asult sa 14-man detachment sa Datagan nga sagad mao ang tatak ug kolor sa iyang pagpangulo sa mga panagsangka nga iyang gipamunoan sa miaging mga katuigan - gubat sa Siloy, gubat sa Canao-Canao, gubat sa Tuburan, atake sa Sinaad, atake sa Calabat ug daghan pang uban.

Human sa 30 minutos nga sinukliay sa bala, gibana-bana ni Ka Jolly nga talitapos na ang panagsangka ug mimando nga paabuton ang kahayag sa kabuntagon ayha ilunsad ang pinal nga pagkubkob sa kampo. Apan mipakita siya sa pagmenor sa iyang normal nga lihok ug mobilidad. Kadto ang kritikal ug patal nga sitwasyong napunting siya sa usa sa mga nahibiling tropa nga nakatago sa foxhole.

Nadala si Ka Jolly sa mga kaubang misibog sukwahi sa pasangil sa militar nga gibiyaan lamang siyang samaron. Giinstruksyonan sa mga kauban ang masa nga tabangang malugsong sa tambalanan si Ka Jolly apan nahulog gihapong giharang sa pasistang tropa ang pasyente isip dinakpan.

Notado ang Sindangan Emergency Hospital sa taas nga mortalidad sa iyang mga pasyente. Bisan sa ordinaryong mga samad ug sakit, daghang masang pasyente ang nangaangin sa pagkamatay bunga sa kawalay-badyet, tambal ug pasilidad. Ang mga paningkamot sa demokratikong pwersa ug mga alyado, apil na sa mga human rights advocates, nga mapadali ang pagdapat sa hustong medical attention o mabalhin sa mas arang-arang nga hospital si Ka Jolly gilangan-langan ug gibabagan sa pasistang mga upisyales-militar. Ulahi na sa kagabhion nga na-operahan si Ka Jolly didto sa Dipolog City apan human na nga hapit mahutdi og dugo sa iyang kalawasan.

Mipakpak ang pasistang rehimeng US - Arroyo ug itoy nga kasundalohan sa AFP sa kamatayon ni Ka Jolly. Nagpista sila sa nagpaabot nga 500 ka libo ka pesos nga ganting salapi ug promosyon alang sa pipila ka pasistang upisyales. Gibansagan nila si Ka Jolly nga terorista ug kriminal uban sa upat ka standing warrants gikan sa mga korte sa kagamhanan.

Gikondena sa CPP-NPA ang arogante ug hugaw nga psywar tactics sa rehimeng US-Arroyo sa pagtratar sa mga samaron sa gubat. Nagpakaylap kini og tinumo-tumo nga istorya nga "posibleng biktima si Ka Jolly sa foul play para dili na makapanug-an pa kinsa-kinsa ang iyang mga kauban ug mga alyadong pulitiko . . ." Gitabonan niini ang tinuod nga mga isyu sa kabangkarote ug kaatrasado sa mga public hospitals tungod sa burukratikong pagpasagad, korapsyon ug krisis sa panalapi. Gitabonan niini ang tinuod nga isyu ug responsibilidad sa diha-diha nga pagdapat sa hustong atensyong medikal sa mga samaron sa gubat alayon sa kasabotan sa CARHRIHL ug international protocols, ug dili ang pagpanglutos sa mga human rights advocates nganong interesado kini nga hustong mapanalipdan ug maluwas ang matag pasyenteng samaron sa gubat.

Si Ka Jolly, ang samohante

Si Ka Jolly natawo isip Mario Bagondol niadtong Nobyembre 30, 1963 sa lungsod sa Plaridel, Misamis Occidental. Anak sa mamumuong panguma, nagdako isip samohante sa basakan, wala makatongtong sa hayskol apan bata pa nga nahimong responsable sa panginabuhian sa pamilya. Nahimong gabasero, manuloay sa alimango sa katunggan sa Plaridel, nananom og gulay ug namuhi og hayopan alang sa panginabuhian. Nabata siya sa singot ug buhat, dili usikan og istorya apan mahuman ang iyang trabaho nga dili magdugay. Ug bisan nga dugay na siyang nahimong upisyal sa Bagong Hukbong Bayan, siya pa gihapon ang nailhang Ka Jolly nga naumol sa kahago ug singot: nanguna sa pagpananom sa lagutmon bisan panahon sa gubat, mobugha og sugnod, mopas-an sa sinako nga bugas ug bug-at nga dal-onon, magkabo para sa kusina, magluto og makaon para sa kadaghanan. Nahimong respetado ug tinamod si Ka Jolly sa mga kauban sa iyang paghigugma sa manwal nga gimbuhaton ug pagpatulo sa singot gikan sa paghago.

Sentimental si Ka Jolly, bisan magtan-aw sa salida, sa daghanang mga kasaysayan sa masa sa kabukiran nga nawad-an sa yuta ug panginabuhian tungod sa pyudal ug semipyudal nga pagpahimulos. Sa usa ka higayon, nakahilak siya nga misaysay sa grabe ka ubos nga termino sa bahinay sa gibasak nilang luna sa yuta, giunsa sa ilang pamilya sa pagbaton sa kaisog nga moreklamo atubangan sa agalon apan ang tubag mao ang pagpalagpot kanila sa basak nga gisaopan. Ang kapait sa pinahimuslang samohante ug kawalay katilingbanong kasigurohan sa mga kabus nga mamumuong panguma napatik sa iyang linghod nga panumduman hangtod nga miabot ang rebolusyonaryong armadong kalihokan sa lungsod sa Plaridel sa hinapos nga bahin sa dekada 70. Ang nag-aliwaros nga panghunahuna nahatagan og katin-awan nga ang rebolusyonaryong armadong pakigbisog lamang ubos sa pagpangulo sa hut-ong proletaryado ang mopalingkawas sa hut-ong mag-uuma ug tanang samohante sama kaniya ngadto sa nasudnong demokrasya ug sosyalismo.

Ka Jolly, proletaryadong kadre ug manggugubat

Misampa si Ka Jolly sa BHB niadtong 1984 gikan sa han-ay sa yunit milisya sa baryo. Sulod sa 20 anyos gikan niadto, nahimong buhing simbolo si Ka Jolly sa usa ka kabus nga mag-uuma ug samohante nga naumol sa teorya ug praktika sa malungtarong gubat sa katawhan ngadto sa usa ka proletaryadong upisyal ug manggugubat. Gamay lamang ang iyang masabtan sa dilang Inengles apan aduna siya'y kanunay andam nga bolpen ug notebook para isulat ang importanteng mga detalye sa iyang rebolusyonaryong mga tahas. Gikan sa pagka-SLT, nabalhin siya sa armadong yunit gerilya sa distrito, panggubatan ug niadtong 1988 isip CO sa Subregional Guerilla Unit nga naglihok sa Misamis Occidental ug Zamboanga del Norte. Sukad niadtong 1994, miakto siya isip pangulong kumander sa BHB sa rehiyon human siya madasigong misalmot sa kalihukang pagtul-id nga gipatuman sa Komite sa Rehiyon niadtong 1993. Kun aduna may solidong mga basihan nganong natural nga dawaton ni Ka Jolly ang pagsaludo sa mga kauban kaniya s a dihang buhi pa, kini nagsumikad sa iyang kaisog sa pakigsangka, sa iyang kapasidad nga momando dili bunga sa iyang pusisyon kun dili pinaagi sa ehemplo sa disiplina, kamapahiubsanon ug sa iyang absolutong debosyon sa PKP ug kaayohan sa masa.

Gitaak ni Ka Jolly ang kabukiran sa Malindang, Paraya, Pinokis, Matungkol ug Timolan isip propagandista-ahitador, medikal, aktibistang kultural, isip lider ug magtutuon, isip manggugubat. Kumpare siya sa ordinaryong mag-uuma ug Subanen, uncle sa kabataan nga iyang gipangtuli, gitupihan o kaha gikaligoan tungod sa mga nuka sa kalawasan, ug gitawag siyang "Bapa Abdul" sa mga masang Moro.

Pagbangotan ngadto sa rebolusyonaryong kaisog

Ang dunot nga katilingbanong sistemang semikolonyal ug semipyudal mihunos na usab sa kinabuhi ni Ka Jolly ug Ka Marlo, labing maayong mga anak sa mga kabus nga mag-uuma, pinalangga sa ilang mga pamilya ug gimatuto sa sabakan sa katawhang nakigbisog. Matag adlaw, liboang kabataan sa Pilipinas ang mamatay tungod sa sakit ug malnutrisyon nga nag-unang bunga sa kawad-on. Liboang kahanas ug pangutok ang molalin aron manglangyaw sa ubang kanasuran aron mabuhi ang ilang pamilya. Matag adlaw, liboan ang mawad-an og panimalay ug panginabuhian bunga sa retrenchment, land-grabbing, militarisasyon ug pagpanglapas sa tawhanong katungod sa ngalan sa anti-katawhang palisiya sa deregulasyon, pribatisasyon ug liberalisasyon sa itoy ug pasistang rehimeng US-Arroyo.

Liboan pang Ka Jolly ang molutaw gikan sa maong bangkarote ug dunot nga sistema. Ang iyang kamatayon dugang nagapahinumdom ug nagahaling lamang sa pagpadayon sa rebolusyonaryong kawsa ug mithi aron tapuson na kining dili-makatarunganon ug kontra-rebolusyonaryong gubat nga gilunsad sa mga dagkong burgesya komprador, dagkong agalong yutaan ug mga imperyalistang gahom batok sa nakigbisog nga katawhang mamumuo ug mag-uuma ug ubang demokratikong sektor nga hugot gisilbihan ug gipanalipdan ni Ka Jolly ug liboang martir sa kapin usa ka siglo nang kasaysayan sa rebolusyong Pilipino.

Napatay man sa pasistang mga mersenaryo ug kriminal si Ka Jolly apan dili ang kawsa ug mithi sa minilyong katawhang Pilipino nga hingpit lumpagon ang tibuok dunot ug hupas nang sistemang madaugdaugon ug mapahimuslanon. Gibilin ni Ka Jolly ang rebolusyonaryong armadong pakigbisog sa rehiyon sa Kasadpang Mindanaw nga mas maisugon ug determinadong mopukan sa kaaway human sa nagkadaiyang mga suliran bunga sa miaging dekadang mga pagsimang ug kaparotan. Ang iyang gipakitang kaisog ug kamatayon nagtimaan sa mapadayonon ug militanteng pakigsangka sa tanang natad sa pakigbisog, ma-armado man o legal, batok sa konserbatismo, pasipismo ug repormismo nga padayong gipakaylap sa imperyalismo ug lokal nga mga reaksyonaryo.

Ang Komite sa Rehiyon sa CPP-NPA sa Kasadpang Mindanaw, mga pulang kumander ug manggugubat sa mga natarang gerilya, mga organisasyon sa Partido sa kapatagan ug kabaryohan nagapadangat niining labing taas nga pagsaludo sa kinabuhi ug kamatayon ni Ka Jolly ug Ka Marlo. Sa tanang katawhan sa Mount Malindang, Matungkol, Pinokis, Paraya ug Timolan, ibandera nato ang pakigbisog sa malungtarong gubat sa katawhan hangtod sa kadaugan.

Komite sa Rehiyon
CPP-NPA
Kasadpang Mindanaw
Oktubre 30, 2004

Back to top