Sniping operation san NPA: Baton sa makusog nga operasyon ngan pangangabuso-militar san 20th IB PA

Ka Amado Pesante
Tagapagsalita
Rodante Urtal Command
Bagong Hukbong Bayan -Northern Samar
Hulyo 10, 2004

Madinaugon nga gintapo sin sniping operation san Rodante Urtal Command san NPA an usa nga yunit san 20th Infantry Batallion san Philippine Army (20th IB PA) nga nag-operasyon sa kabukiran giutan san Brgy. Mabini, Catarman ngan Brgy. Makatingog, Oquendo District, Calbayog, dapit alas-11:30 an aga san nakalabay nga Hulyo 6, 2004. Diri mamenos sa usa (1) an namatay ngan pira pa an nasamaran sa tropa san militar.

Ginhimo ini sin usa la nga snipers team san NPA-RUC kontra sa maabot usa ka-platun nga tropa san 20th IB. May madig-on nga panmilitar ngan pampulitika nga basaranan ini nga sniping operation san NPA:

1. Una, usa ini nga pitad san NPA sa aktibo nga pagdepensa sa kalugaringon kontra san pangangatake san AFP. Pinaagi sini, gin-ulang ngan ginpakyas san NPA-RUC an mga larang san 20th IB sa paglanat ngan pag-atake sa hainman nga yunit san NPA nga agpeki sa nasabi nga erya. Labot pa nga naipreserbar san NPA an kalugaringon, nakapagdurot pa ini sin seryoso nga kaswalidad sa militar. Dapit alas-4:00 siton kulop san Hulyo 6, ginkuha sin duha nga helikopter an mga patay ug samaran nga sundalo san 20th IB didto mismo sa bukid kun diin gin-snipe sira san NPA.

2. Ikaduha, kaparte liwat ini sa pagsirot san NPA-RUC sa 20th IB ngan paghatag sin rebolusyonaryo nga hustisya sa mga biktima san pagtalapas sa katungod pantawo nga ginhihimo san AFP kasumpay san mga operasyon-militar sini. Tikang umabot an 20th IB sa Norte Samar sadton Mayo 2004, damo na an nahirekord nga mga pagtalapas sini sa katungod pantawo ngan sa mga internasyunal nga makatawo nga balaud.

Usa san pinakagrabe nga ginhimo san 20th IB mao an pagkaptura sin 15 nga parag-uma sa Brgy. Palanit, San Isidro, Norte Samar sadton Mayo 6 kahuman nira makaaway an usa nga yunit san NPA san Mayo 5. Pwersahay nga ginpaupod san mga sundalo ini nga mga parag-uma ngadto sa kampo san NPA ngan pirit nga ginpapanhanap san mga gamit san NPA ug sa mga kaapi mismo san NPA.

Dugang pa, an mga panarhog, pandakop ngan pirit nga pagpagiya san 20th IB sa ira mga operasyon mao in nagreresulta sa karinggal yana san panginabuhi san mga parag-uma sa mga interyor nga baryo san Bobon ngan San Isidro sa Norte Samar ngan sa Oquendo District sa Calbayog, Weste Samar.

Tikang san Mayo 2004, ikaduha ini nga sniping operation san magdinaugon nga kontra-opensiba nga aksyon san NPA-RUC kontra sa mga atake san 20th IB. Nahitabo an una sadton aga san Mayo 5 sa usa nga bukid san Brgy. Palanit, San Isidro, Norte Samar, kun diin gin-atake ngan ginsulod san 20th IB an usa nga taktikal nga base san NPA, pero waray bisan usa an namatay o bisan la nasamaran sa gapil san NPA; ngan lugod, an mga tropa san 20th IB an nahiagum sin mabug-at nga kaswalidad. Testigos sini an mga taga-Brgy. Palanit mismo nga mao an nakakita sa militar nga may ginbabarayawan nga walo nga lawas san ira mga igkasi sundalo, kahuman san nasabi nga agway. Diri la maseguro san mga nakakita kun pira an patay sa nasabi nga walo. Pero klaro kaupay nga buwa ngan waray basaranan an nahiuna nga ginpasamwak ug iginhambog san militar nga pito (7) kuno nga NPA an namatay sa nasabi nga agway.#

Back to top