REYD SA MUNICIPAL POLICE STATION SA BAYUGAN, AGUSAN DEL SUR

Maria Malaya
Tigpamaba
NDF-Amihanan Sidlakang Mindanao
(Northeastern Mindanao)
Hunyo 22, 2004

Mapulang pagsaludo sa mabayanihong paghalad sa kinabuhi ni Ka Geryl Manggubat o Ka Binoy, Spokesperson sa Pulang Diwata Command sa Bagong Hukbong Bayan ug ni Ka. Johnny atol sa malampusong pagsulong sa PNP station sa Bayugan Agusan del Sur niadtong Hunyo 19, 2004 sa may alas 2:00 sa kahaponon.

Nakompiska sa Red Alimaong Platoon ang 7 ka M16, 5 ka M14 ug mga bala. Duha ka personel sa PNP ang napatay sa maong hitabo. Sa pikas bahin nakuha sa kaaway gikan sa nakalas nga mga Pulang Manggugubat sa BHB ang 3 ka tag-as nga pusil sa dihang naapsan sila sa reimporsment.

Malampuson ang maong pagsulong sa PNP station ug nakadugang kini sa arsenal sa BHB taliwala sa kasubo ug pagkaanugon sa pagkahanaw sa usa ka batan-ong kadre militar ug usa ka Pulang Manggugubat. Ang pagpanaw ni Ka. Geryl ug Ka Johnny wala makahugno sa mga Pulang Kumander ug Pulang Manggugubat hinunoa nahimo kining hagit sa pagpasubsob pa sa mga aksyong militar samtang kanunay kining nangandam sa kontra-atake sa AFP, PNP ug paramilitar.

Ang patayng lawas nilang Ka Geryl o Ka Binoy ug Ka Johnny gihaya karon sa Bollozos Funeral Homes sa Butuan City aron mahatagan og kahigayonan ang mga kaparyentehan, mga kaila ug kahigalaan sa pagpasidungog sa mipanaw nga mga rebolusyonaaryong martir.

Gihangyo ang mga intelligence, mga pwersa sa AFP, PNP ug paramilitar nga hatagan nila�g kahigayonan nga mahimong malinawon ang paglamay kang Ka. Geryl ug Ka Johnny.

Ang tibuok pwersa sa Red Alimaong Platoon ug tanang mga gerilyang yunit ubos sa Pulang Diwata Command sa BHB ug tanang mga rebolusyonaryong pwersa sa Amihanang Sidlakang Mindanao nagasaludo ug nagpasidungog sa mga natampo ni Ka Geryl ug Ka Johnny ug sa makausa pa nanumpa kining pursigidong ipadayon ang mga tahas nga ilang nasugdan ug ipalambo pa sa mas taas nga ang-ang.

SALUDOHAN ANG MGA REBOLUSYONARYONG MARTIR!

Back to top