AFP, nagbibinuwa na la agud matahuban an ira kahibangan ngan kaaluhan sa nahitabo nga agway sa Brgy. Palanit, San Isidro

Ka Amado Pesante
Tagapagsalita
Rodante Urtal Command
Bagong Hukbong Bayan -Northern Samar
Hunyo 20, 2004

Sadton aga-aga san Mayo 5, 2004, ginreyd san mga elemento san 20th IB PA an usa nga yunit san NPA nga nakabase sa usa nga parte san Brgy. Palanit, San Isidro, Norte san Samar. Kinabuwasan man ta nga adlaw, dayon nga nagpahayag sa midya si Maj. Gen. Glenn Rabonza, rehiyunal nga kumander san 8th ID PA, nga pito kuno nga kaapi san NPA an namatay ngan pira pa an nasamaran sa nasabi nga agway, samtang waray kuno kaswalidad sa gapil san militar.

Pero buwa, malisyoso, ngan waray basaranan an nasabi nga pahayag ni Gen. Rabonza. Ginkaklaro san Rodante Urtal Command san NPA-Norte san Samar an masunod nga mga punto:

1. Una, waray kaswalidad sa gapil san NPA. Waray namatay ngan waray bisan usa sa ira an nasamaran. Bisan kun nakada sa depensibo nga pusisyon, waray hul-os nga masurpresa an mga pwersa san NPA tungod kay harayo pa an naatake nga militar, nakit-an na ini ngan naunahan pagpabuto san maabtik nga mga gerilya. Labot pa, madagmit ngan hugot nga nakatinan san mga gerilya an inisyatiba ngan an maupay nga tereyn nga ira ginpusisyonan, kontra sa nagugupong ug demoralisado nga militar nga pirit pa ginpapadasdas san ira mga mayor.

2. Ikaduha, an militar lugod an nakatagamtam sin mabug-at nga kaswalidad ngan kaaluhan. Sa luyo san ira superyor nga armas ngan kadamo, waray nira makontrol an nasabi nga away. Sa sakob san duha kaoras nga agway nga nagtikang san alas-7 siton nga aga, usa nga sundalo san 20th IB PA an segurado nga namatay samtang masobra lima pa sa ira an grabe nga nasamaran. Testigos sini an mga taga-Brgy. Palanit mismo nga mao an nakakita sa militar nga mayda ginbabarayawan nga walo nga lawas san ira mga igkasi sundalo, kahuman san nasabi nga agway. Diri la maseguro san mga nakakita kun pira an patay sa nasabi nga walo.

3. Ikatulo, buwa san militar nga usa nga gidadakoi nga kampo san NPA an ira nareyd. Tungod nga naglalansar sa yana sin gerilya nga pakig-away an NPA, diri pa sini praktis an magkampo sin sugad katagdagko san iginlaladawan san militar. Relatibo pa nga nakadispers sa iba-iba nga yunit ngan paburubalhin sin kampo an mga pwersa san NPA agud magpatuman sin magkadurudilain nga buruhaton, sugad san pagbulig sa rebolusyon agraryo san mga parag-uma, pagtutukod san rebolusyonaryo nga base panmasa sa kabaryuhan, ngan paglalansar sin mga taktikal nga opensiba kontra sa mga pwersa han militar, paramilitar ngan pulisya. Dugang pa, diri dako nga kawarad-an para sa NPA an kareyd sa nasabi nga kampo tungod kay haluag pa kaupay an kabaryuhan san Norte san Samar kun diin hinigugma, ginmamayuyo ngan ginsusuportahan san masa an NPA.

Sa nasabi nga pahayag sa midya ni Gen. Rabonza, diri madidiwara an pagbirikis san militar sa tinuod nga mga panhitabo agud sarihan nga matahuban an ira kahibangan ngan kaaluhan. Kaparte ini san sistematiko pero desperado nga psywar san militar agud pakarauton, pakaaluhan ngan iladawan komo nagtitikaluya na an NPA, nga sa kamatuoran, mao in nagtitikakusog ngan nagtitikaabtik la lugod, sa ilarum san pamumuno san PKP ngan sa butnga san mapaso nga suporta san masa. Sa panhitabo sa Brgy. Palanit, klaro kaupay an kadaugan san NPA ngan an kapakyasan san AFP.

Kasumpay pa san nasabi nga insidente, dugang nga ginpakita san militar an tinuod nga kabangis, pagigin terorista ngan pagigin kontra-katawhan sini. Kahuman san nasabi nga agway, pwersahay nga ginpabungyod san mga sundalo ngadto sa lugar nga gin-agwayan an maabot 15 nga mga taga-Brgy. Palanit, agud piniritay nga pabuligon sa paghakot san ira mga higamit, sin hul-os nga waray-pagtagad sa seguridad o kalibrehan sini nga mga sibilyan. San nakadto na sa lugar nga gin-agwayan nga waray naman pangontra-sa pakabati la sin pira nga karasikas sa kasighutan-waray-alang nga nagpinabuto sin gidamoi nga bala an mga sundalo, nga nagresulta naman san kahikalasi ngan kahadlok san mga parag-uma nga pirit nira ginpabungyod. Klaro ini nga pagtalapas san 20th IB PA sa CARHRIHL, ngan ginlalauman san RUC-NPA nga pinaagi sa NDF-EV, mahisasang-at ini nga panibag-o nga kaso kontra sa AFP sa bag-o pala nga natukod nga Joint Monitoring Committee (JMC) nga nagtutumuyo nga bantayan an mga pagtalapas sa katungod pantawo san hainman sa mga nakikiggerra nga pwersa nga AFP ngan NPA. ###

Back to top