Ang NDF Mindanao Mikondena sa Panglimbong ug Terorismo sa Eleksyon

Jorge "Ka Oris" Madlos
Spokesperson
NDF-Mindanao
Mayo 17, 2004

Ang NDF-Mindanao miduyog sa katawhan sa pagkondena sa kaylap nga panglimbong ug kabangis nga mihulagway sa Mayo 10 nga eleksyon. Kini nga mga kahiwian nag-unang hinimoan sa rehimeng US-Arroyo. Miduyog usab kami sa awhag alang sa dugang kamabinantayon ug aktibong pagsalmot sa katawhan sa pagbutyag niining pagpanglimbong ug kabangis.

Sa makausa pa, ang hugaw ug bangis nga kinaiya sa reaksyonaryong eleksyon miabot sa kinapungkayan ning miaging eleksyon. Ang kabangis tataw nga gipakita sa sistematikong kampanya sa terorismo sa pormang pagdagit ug pagpatay sa mga lider sa partylists, sama sa gihimo niini sa Southern Tagalog ug Bicol Regions, ang direktang paggamit sa armadong kusog sa estado batok sa oposisyon sa probinsya sa Isabela, ug ubang mga porma sa kabangis sa ubang bahin sa nasud.

Ang pagmonitor sa NDF-Mindanao Information Bureau sa 20 ka probinsya sa Mindanao, wa'y labot ang mga erya sa Bangsamoro gikan sa Abril hangtod sa Mayo 12, tin-aw nga nagpakita nga ang numero unong nagahimo sa kabangis sa eleksyon mao ang mga armadong aparatos sa estado ug politikanhong partido nga kaalyado ni Gloria Macapagal Arroyo. Dunay total nga 47 ka indibidwal ang namatay gikan sa nareport nga 82 ka mga insidente sa pagpang-ambus, raids, pagdagit ug iligal nga pagdakop, pagpatay, strafing, pagdagmal, grabeng paghulga ug uban pa.

Sa 82 ka mga insidente, 65 ka insidente � kun diin dunay 37 nga namatay, ang hinimoan sa mga armadong pwersa sa estado ug sa partido sa administrasyon. Tataw nga ehemplo niini mao ang pagpatay sa tulo ka myembro sa Bayan Muna sa Laac, Bayan Muna barangay chairman Rodolfo Gogo sa Monkayo ug Boy Galang, chairman sa Mount Diwata Alliance, tanan sa Compostela Valley ug ang sunod-sunod nga pagpatay sa upat ka barangay kapitan sa ikaduhang distrito sa Zamboanga del Sur.

Sa nareport nga 82 ka insidente, 15 ang hinimoan sa NPA nga misangpot sa kamatayon sa 10 ka mga indibidwal. Niini nga 15 ka insidente, upat lang ang kalambigit sa eleksyon. Ang uban pa mga aksyong militar batok sa lehitimong mga target ug kalambigit sa pagpatuman sa rebolusyonaryong hustisya.

Walay insidente nga mapasangil sa sobrang pagpanghadlok nga "Jemaah Islamiyah." Gipakita lang dinhi nga ang pagkondisyon sa publiko sa wala pa ang eleksyon kalabot sa posibleng pagsabotahe gikan sa NPA ug diay walay kamatuoran kundi usa lang ka pasangil aron magdeploy og dugang mga armadong pwersa sama sa gihimo gyud sa rehimen aron ipahigayon ang kadaugan ni GMA.

Ang tanang mahunahunaan nga pamaagi sa hugaw nga maniobra ug panglimbong gigamit sama sa: itom nga propaganda ug panghulga ilabina sa mga progresibong partylist, ug maniobra nga dili makaboto, pag-usab sa listahan sa mga botante ug pag-apil sa listahan sa mga nangamatay, pagpalit sa boto, tinuyong paglangan sa iphanay sa mga kampo sa militar ilabina sa mga erya sa Moro, pagpuli sa mga balota o pagpuli sa mga ballot box, pag-usab o pagpuli sa mga certificate of canvas o "dagdag-bawas", pagsuhol sa mga opisyal sa COMELEC, paggamit sa mga pondo, personel ug pasilidad sa gobyerno, paggamit sa relihiyosong pundok, sobra kaayo nga media mileage ug uban pa.

Bisan kun ang oposisyon may kalabutan sa mga panglimbong sa eleksyon, ang rehimeng US-GMA maoy dunay gahum ug rekurso sa paghimo sa kaylap nga panglimbong ug kabangis batok sa oposisyon, apil na ang mga progresibong partylist, ug mga indibidwal. Ang rehimeng US-Arroyo maoy manubag niining nagapadayon nga kabangis ug pagpamatay sa mga myembro ug lider sa mga progresibong partylist ug ubang mga oposisyon nga partido.

Sa makausa pa, atong nasaksihan ang usa ka bangkarota nga eleksyon kun diin walay mapilian sa pagkapresidente ang katawhan. Ang katawhan walay ilusyon kalabot kang FPJ, ang dili andam nga kandidato ug alyado sa gipalagpot nga Estrada ug mga Marcoses, apan nabantog nga maoy makapildi kang Arroyo. Mahimong mipili ang katawhan kang FPJ aron lang gyod pagpahungaw sa ilang kasuko batok sa usa ka rehimen nga napamatud-an na sa kaylap nga korapsyon, kalapasan sa tawhanong katungod, ug pagkaitoy sa imperyalistang US. Apan sa makausa pa ang katawhan gikawatan na usab sa ilang katungod sa pagpili. Mao kini ang giingon sa rehimen nga demokrasya. Sa pikas bahin, ang katawhan mipahimulos na lang gikan niining min� nga eleksyon. Sa Mindanao, bisan pa sa makamatay nga intriga, panglimbong ug kabangis ug sa limitado kaayo nga rekurso, ang katawhan mipili sa mga progresibong pundok sa partylist ug pipila ka matarong nga mga indibidwal apan kinahanglang isustiner nila ang kamabinantayon aron panalipdan ang unsamang limitadong kadaugan sa katawhan batok sa mga nagkadaiyang maniobra sa reaksyonaryong rehimen.

Ang unsamang nakab-ot sa katawhan ning milabay nga eleksyon limitado lang kaayo. Kung ugaling man kining mga progresibong partylist ug mga kandidato makatungtong sa ilang mga posisyon sa reaksyonaryong kagamhanan, makatabang sila sa pagbutyag sa mga kahiwian sa katilingban ug makaduso sa demanda sa katawhan apan sa limitado lang nga kinutuban. Dili nila mahimong usbon ang tibuok sistema gikan sa sulod sa reaksyonaryong gobyerno.

Ang Mayo 10 nga eleksyon nagtudlo kanato, sa makausa pa, sa panginahanglan sa usa ka rebolusyonaryong proseso aron makab-ot ang batakang katilingbanong kausaban pinaagi sa malungtarong gubat sa katawhan.#

Back to top