Nagapangilkil nga RPA gindakup sg NPA

Ka Esther Estrella
Spokesperson
Jean Pelle Command
New People's Army-Negros
Mayo 07, 2004

Duha ka katapu sg bandido nga Revolutionary Proletarian Army (RPA) ang gindakup sg isa ka yunit sg NPA sg gab-I sg Mayo 4, 2004.Nadakpan ang mga ini sa akto nga nagapatigayon sg ila extortion activities o pagpangilkil sa pila ka asyenda sa Silay kag Talisay City.

Nadakpan kag ara subong sa kustodiya sg NPA amo sanday Rizaldy Flores, nag-ako nga regular nga katapu sg RPA sa sulod sg isa ka tuig kag gin-atasan nga mangin kolektor sg bandido nga grupo. Ang isa pa amo si Richal Roldan, katapu sg insurrectionary force (IF) sg nasambit nga grupo.

Nakuha sa mga ini ang isa ka pistola, koleksyon nga kwarta, mga dokumento kag celfone. Upod na diri ang lista sg mga plantadores kag pumuluyo nga ila ginakilkilan kada bulan.

Madugay na nga ginareklamo sg pumuluyo sa nasambit nga mga lugar ang ila extortion activities sa NPA kag sg natiempohan, gilayon sila nga gindakup. Nangin praktis na sg ispesyal CAFGU nga RPA ang paghatag proteksyon sa mga despotiko nga asyendero kag pagpahug o pagharas sa mga mamumugon sa asyenda nga nagademanda sg ila demokratiko nga kinamatarung, husto nga sweldo kag benepisyo.

Paagi sa sini nga pag-aresto, konkreto nga napamatud-an ang kahustuhon sa mga pahayag ni Kaupod Frank Fernandez nga ang RPA nga nagapakuno-kuno nga mga �rebolusyonaryo� sa pagkamatuod mga extortionists, private armed goons kag aktibo nga nagapagamit subong sa eleksyon bilang mga mersenaryo. Masupog ang mga ini nga kontra-rebolusyonaryo kag naga-upod sa joint counter-insurgency operations sg Philippine Army kag PNP.

Magapabilin ang duha sa kostodiya sg NPA samtang ginabista ang ila kaso sa Rebolusyonaryo nga Korte sg Pumuluyo. Pagatagaan sila sg fair trial kag lubos nga respetuhon ang ila nga mga tawhanon nga kinamatarung.