NPA raid sa Police Outpost Madinalag-on

Ka JB Regalado
Spokesperson
Leonardo Panaligan Command
Mayo 06, 2004

Ang New People�s Army (NPA) sa idalum sg Leonardo Panaligan Command madinalag-on nga nakatigayon sg raid nga wala lupok sa Police outpost nga nahamtang sa Sitio Inayawan, Bo. Masulog, Canlaon City; sg Mayo 5, 2004, mga ala 1:00 sg kaagahon.

Natigayon nga mapalapitan ang outpost nga wala nakamutik ang mga pulis nga naka-station diri. Matawhay nga nadis-armahan ang 4 ka pulis kag nakuha ang mga armas nga 1 M-14, 3 M-16 kag 2 45 cal nga pistola. Ang mga pulis gingapos para indi dayon maka-report kag ang Pulang hukbo nga nag-raid matawhay nga naka-atras.

Ang kadalag-an sg sini nga raid nakasandig sa precise intelligence data, element of surprise kag suporta sg malapad nga masa. Nagapakita man ini sg ikasarang sg NPA sa pagpakig-away sa lain-lain nga taktika pareho sg mga nalunsad na nga mga taktikal nga opensiba (TO) : ambus kay Ondo Cardenas, Chief of Police Gallego sg Vallehermoso kag kay Lt. Regner. Lakip na diri ang mga Sparrow operations kag iban pa.

Ang bag-o lang nga raid ginkomposar sg 4 ka tawo nga commando team nga may kasupog kag kakahas.

Ang mga natigayon na nga mga TOs nagapamatuod lang nga ang rebolusyonaryo nga kusog sg CPP/NPA sa Negros nagadaku kag nagabaskog. Kabaliskaran ini sg ginapapati sg nagahari nga sahi nga mga kontra-rebolusyonaryo nga nagahuyango na kuno ang NPA sa Negros.

Sa padayon sini nga pagbaskog, wala ini nagapangduha-duha sa pagpatuman sg rebolusyonaryo nga hustisya para pangapinan ang interes sg masa nga ginapigos kag ginahimuslan.

Ang pagpadaku sg NPA, upod diri ang pagpadamo sg armas nga kuhaon paagi sa TO. Pero ginapaabot namon sa tanan nga regular nga katapu sg Army kag Police nga armas lang ang amon tuyo. Ang sin-o man nga wala sg sala sa pumuluyo indi mapatay basta indi lang magbato. Magsurender kamo sg matawhay kag ihatag ang inyo pusil agud kamo mabuhi.

Sa mga CAFGU, indi na kamo magpagamit sa mga nagahari nga sahi para sa pagpangapin sa ila interes. Magbiya na kamo sa serbisyo kag isurender ang inyo armas sa amon kag magpangabuhi upod sa inyo pamilya.

Sa mga naga-organisa sg armado nga grupo kag nagahimo sg kontra-pumuluyo nga buhat pareho sg Galvan Brothers kag ni Wagner Cardenas, bungkagon na ninyo ang inyo nga grupo kag isurender ang inyo nga armas sa NPA. Ang sin-o man nga magpadayon sini indi kami magpangduha-duha sa pagbungkag kag pagsilot sa mga may sala.

Sa malapad nga pumuluyo, padayon nga pabaskugon ang aton paghiliusa kag kusog agud wasakon ang garuk nga sistema kag itukod ang katilingban nga may matuod nga kahilwayan kag demokrasya.

Mabuhay ang CPP/NPA/NDF!
Mabuhay ang masa!