Press Statement

Karlos Manuel
Spokesperson
Efren Martires Command
New People's Army-Eastern Visayas
Abril 18, 2005

Nagtikagrabe la an problema han katawhan Pilipino. Padayon nga nahiluludlod an katawhan ha grabe nga krisis ha ekonomiya ngan pulitika. Diri na la ordinaryo nga mga tawo an naaraba han grabe nga katiniyupi ngan katinalumpigos kundi pati na an butnga nga saray han katilingban upod na an gudti nga mga negosyante. Nahinunugad ini tungod han diri-makatawo ngan kontra-Pilipino nga pagpalakat ni Gloria Macapagal-Arroyo han gubyerno. Imbes nga an interes han katawhan Pilipino, mas nga gin-uundong ngan ginpapanalipdan hini an interes han dagko nga agaron maytuna, komprador burgesya ngan langyaw nga interes labi na gud an imperyalismo nga US. Hul-os na nga gintalikdan ni Arroyo an iya mag-upay nga mga saad ngada ha masa han katawhan han nagmamalaposisyon pa hiya ha poder.

An mga araba, pagsuson ngan panawagan han katawhan para hin tinuod nga reporma ginbabaton la hin grabe nga pasismo ngan militarisasyon. Natatagamtaman yana han katawhan an kanan estado terorismo nga alagid-agid o mas grabe pa han martial law ha panahon ni Marcos. Landaw an otoridad han militar kontra han sibilyan nga gahum. Nagdadamo an mga pasista nga balaud nga nagbabalewaray han mga demokratiko nga proseso ngan nagtatamak han batakan nga mga katungod pantawo. An buta ngan paturapak nga "kontra-terorista" nga kampanya han gubyerno ni GMA in nagigin lisensya han grabe nga pangangabuso militar.

An pagtudloka han "Berdugo ha Mindoro" nga hi Brig Gen Jovito Palparan komo bag-o nga commanding general han 8th ID PA diri urusahon. Natuo an rehimen ni Arroyo nga an mga tipo ni Palparan - nga master ha abduction ngan extra-judicial nga panmatay - amo an makakapahuyo ha ligal nga oposisyon ngan makakapoypoy han rebolusyonaryo nga kagiusan. Usa ini han damo nga desperado nga mga pitad han rehimen nga Arroyo agud mapugngan an pag-ato han katawhan ngan magpabilin ha poder. Nagpakita dayon hi Palparan han iya abilidad komo paborito nga berdugo ni Arroyo. Kahuman magpahayag ha publiko nga popoypoyon niya an oposisyon ha sakob la han unom ka bulan, sunod-sunod na an mga hitabo an mga panmatay ha mga lider han mga militante nga hugpo labi na gud an sakop han Bayan Muna. Sinamwak liwat an mga kaso hin abduction ngan haluagan nga panarhug. Ginpakusog liwat an mga kampanya militar ha kabaryuhan nga nagresulta hin grabe nga pangabuso militar. Waray la hira sasabot nga hini nga mga pamaagi ira ginduduso ha pader ngan ginpupukaw an daan na gutom ngan desperado na nga katawhan nga kumatin hin armas ngan makigrebolusyon.

An grabe nga mga pagtalapas ha katungod pantawo han militar diri mahibubulag ha kabug-osan nga kontra-insurehensya programa ni Arroyo nga nakaangkla ha pagsuporta niya han kan Bush "gerra ha terorismo" ha bug-os nga kalibutan. Ngani nagtikadamo an mga kaso hin pagtalapas ha katungod pantawo ha nasud tikang la magdeklarar hin pagsuporta hi Arroyo ha " gerra ha terorismo" ni Bush. Ini an nagduduso han gubyerno ni Arroyo nga maglansar hin militarista ngan pasista nga pananalakay kontra han katawhan nga waray iba nga ginhihimo kundi an tumindog la para ha tinuod nga kagawasan ngan demokrasya.

Ha sugad hini nga sitwasyon, nanawagan an Efren Martires Command (EMC) han NPA-Sinirangan Bisayas han ngatanan nga mayda paghigugma ha tinuod nga demokrasya ngan katalwasan nga tumindog ngan diri mahadlok atubangan han terorismo han presente nga estado. Makigbisog kita para ha pagpapanalipod han aton sibil libertad ngan demokratiko nga mga katungod. Diri kita mahadlok han pakigbisog kontra han pangangabuso han militar ha pangunguna ni Palparan. Ilansar naton an usa nga madig-on nga kagiusan protesta nga magpapatalisik han diri makatawo ngan anti-Pilipino nga rehimen ni Arroyo. Nanawagan liwat an EMC ha ngatanan nga may kakayahan kumatin hin armas, babaye man o lalaki nga naedad hin dire menos ha 18 anyos, nga umapi ha NPA ngan dumuyog ha paglalansar hin armado nga rebolusyon. Ini la an tama nga dalan ngan prinsipal nga pamaagi han pagpapabagsak han reaksyunaryo nga gubyerno agud masaliwnan hin bag-o nga sistema nga tinuod nga magbabaton han nasyunal ngan demokratikanhon nga interes han katawhan Pilipino.

Back to top