Diri bisan kakan-o ibabalyo han katawhan an makatadungan nga kawsa han rebolusyon ha buwa nga kamurayawan

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Abril 26, 2005

Nagtitikadako an demanda han katawhan para ha rebolusyon, ngan natikakusog la an ira rebolusyonaryo nga pagkaurusa ha ika-32 nga anibersaryo han National Democratic Front of the Philippines hadin April 24. Ginpapakita kun sugad han 8th Infantry Division an habubo nga pagtagad hini ha katawhan ngan ha ira mga problema ha pagsering nga matatagamtaman an kamurayawan ngan kauswagan kun masurender an rebolusyonaryo nga kagiusan ngan diri na gamiton an ira mga armas. An kamurayawan diri nagtitikang ha pagmingaw han rebolusyunaryo nga pusil, kundi ha katumanan han demanda han katawhan ha tuna, trabaho ngan batakan nga mga serbisyo sosyal. An kauswagan diri nagtitikang ha pagsurender han rebolusyonaryo nga pakigbisog, kundi ha pagtalwas han nasyon ha langyaw nga dominasyon ngan ha pagtindog han nasyunal ngan pan-ekonomiya nga soberanya. An rebolusyonaryo nga gerra usa nga makatadungan nga kawsa ngan angay nga ipakigbisog tungod kay diri pa natutuman an kanan katawhan nasyunalista ngan demokratiko nga demanda.

An rehimen Arroyo diri nagduduso han kamurayawan o kauswagan, lugod an kabaliskaran: usa nga terorista nga gerra nga kabunyog an interbensyon militar han US kontra ha katawhan, ngan tipaatras nga ekonomiya pinaagi ha pag-undong han imperyalista nga �globalisasyon�. Imposible nga magkamay-ada hin tuna ngan trabaho ha ilarum han rehimen, samtang nagpinatakas ha panhuhuthot ha ekonomiya an langyaw ngan lokal nga magtiyupion ngan dagko nga burukrata. An katawhan diri na mahimo nga mabuhi hin disente ha ilarum han waray wantas nga paghataas han presyo han lana, kuryente ngan tubig, ngan mga presyo han batakan nga papliton. Naghahatag liwat an kanan rehimen �gerra kontra terorismo� hin pasasngilan ha militar ngan pulis agud maghimo hin haluagan nga mga pagtalapas han katungod pantawo ngan internasyunal nga makatawo nga balaud. Diri harayo nga mautro an balaud militar, ha pagbasura han mga kagawasan sibil ha usa nga anti-terrorism bill ngan an implementasyon han hadi hin usa nga national identification system.

An pinakadako nga ulang han kamurayawan ngan kauswagan diri kun sugad an rebolusyonaryo nga kagiusan kundi an niyutiyo, pasista ngan korap nga rehimen Arroyo. Waray iba nga hinungdan kun kay ano nga nagpapabilin nga nabiaw an pormal nga erestorya pankamurayawan giutan han NDFP ngan gobyerno nga Arroyo, kundi an klaro nga kawaray sinseridad han reaksyunaryo nga gobyerno ha pagbaton han mga araba han katawhan ngan pagresolba han gamot han gerra sibil.

Ha sugad hini nga konteksto, natikaklaro an kahamabaw ngan kamapan-uwat han 8th Infantry Division.

Ngan yana, amon naman pagpakiana ha 8th Infantry Division. Ginpakita ba nira an paghigugma ha kamurayawan ngan kauswagan, ha panmatay han mga aktibista ngan mga inosente nga sibilyan ha rehiyon nga waray rason nga ira ginsusumpay ha New People�s Army? Ginpakita ba nira an paghigugma ha kamurayawan ngan kauswagan, ha pirit nga pag-ebakwet ngan pagwara han panginabuhian han masobra 600 nga parag-uma, nga ira gintatahapan nga nasimpatiya ha mga NPA dida ha San Jorge, Weste Samar? Tiunano nira ginlalauman nga tuuron han katawhan an kan Hen. Jovito Palparan �Kamay, Ngiti, Bati� nga pakig-usa kunohay ha komunidad ngan pagliwat han imahe han sundalo, kun maaram na an ngatanan tikang ha eksperyensya nga an tinuod nga karuyag sidngon hini amo an �Suntok, Kulata, Banyak�?

Samtang naghihisgot kunohay an 8th ID han kamurayawan ngan kauswagan, ha kamatuoran aktibo hini nga gintatanum an gahi han rebolusyon pinaagi han haluagan nga abuso militar. An mga pagtalapas han katungod pantawo dugang nga nagpapangalas han haros waray na makaon nga katawhan. Tumba na ngan nagkukuri an katawhan, pero padayon hira nga waray-kaluoy nga ginbabanyakan han 8th Infantry Division. An mga abuso militar an nagtututdo ha katawhan nga dugang nga magin militante ha pagdepensa han ira mga katungod, ngan ha ultimo mapukaw nga ha pagkatin han pusil han rebolusyon mahihimo nga maperdi ngan mapaiwas an mga kaaway han katawhan. Sugad han ira pagkatanum, aanihon liwat han 8th Infantry Division ngan han rehimen Arroyo an bagyo han rebolusyon.//

Back to top