BHB SA MINDANAO NAKATIGOM OG DUGANG MGA KADAUGAN

Mindanao Commission
Communist Party of the Philippines
Marso 29, 2005

Ang mga yunit sa Bagong Hukbong Bayan sa Mindanao ug ang tibuok katawhang langkob sa rebolusyonaryong kalihokan tumang kalipay nga nagsaulog karon sa ika-36 nga anibersaryo sa pagkatukod sa Bagong Hukbong Bayan niadtong Marso 29, 1969 ubos sa pagpangulo sa Partido Komunista sa Pilipinas (MLM). Dakong kalipay ang atong gibati karon tungod kay mapadayunong giasdang sa BHB ang demokratikong rebolusyon sa katawhan nga nagtinguha sa hingpit nga kagawasan ug tinuod nga demokrasya sa nasud.

Mga Kalamboan sa Nasudnong Ang-ang

Sa tibuok Pilipinas ang BHB mapadayunon nga nag-angkon og mga kadaugan. Padayong nalihokan niini karon ang 128 ka natarang gerilya nga naglangkob sa hapit 70 ka probinsya, kapin 800 ka munisipalidad ug kapin 10,000 ka baryo. Napatunhay sa BHB ang demokratikong gobyerno sa katawhan sa nagkalapad nga bahin sa kabukiran. Minilyon ang baseng masa niini nga kadaghanan anaa sa kabaryohan kinsa nakabenepisyo sa tinuod nga agraryong reporma ug mga katilingbanong serbisyo nga gipatuman sa BHB. Ang ginsakpan sa mga yunit gerilya mokabat na sa liboan. Nakalunsad ang mga yunit og malampusong mga taktikal nga opensiba batok sa mga pasistang tropa sa AFP. Sa ingon, anam-anam nga ginapukan ang dunot nga sistemang giharian sa imperyalismong US ug mga dagkong burgesyang kumprador ug agalong yutaan nga kasamtangang girepresentahan sa rehimeng US-Macapagal-Arroyo.

Naangkon sa BHB ang mga kadaugan pinaagi sa walay kakapoy nga mga paningkamot ug mga sakripisyo nga gipakita sa mga Pulang manggugubat ug kumander niini. Mitampo usab dinhi ang pila ka martir ug bayani nga mihalad sa ilang kinabuhi diha sa mga pakigsangka batok sa mga pasistang tropa sa reaksyonaryong gobyerno; busa niining adlawa gipasidunggan nato sila.

Mga Kalampusan sa Mindanao

Dinhi sa Mindanao, ang BHB nakatigom og dugang mga kadaugan sa pagpaasdang sa malungtarong gubat sa katawhan, ug sa ingon, mahinungdanong nakatampo kini sa nasudnong pagkusog sa hukbong bayan.

Namentina sa BHB ang 38 ka natarang gerilya sa tibuok isla nga milangkob sa 19 ka probinsya, kapin 200 ka lungsod ug syudad, ug kapin 2,000 ka baryo. Sulod sa mga natarang gerilya adunay nagtunhay nga nagkalain-laing organisasyong masa sa mga mag-uuma, kababayen-an, kabatan-onan, sa Lumad, ug sa Moro. Mikabat sa kapin lima ka gatos ka libo ang baseng masa karon, usbaw kini gikan sa miaging tuig. Liboan sa masa ang nakatagamtam og ekonomikanhong benepisyo pinaagi sa gilunsad nga mga pakigbisog batok sa pyudal ug semipyudal nga pagpahimulos. Nakatagamtam usab sila og nagkalain-laing katilingbang serbisyo, sama sa libreng pagpanambal, literasiya, ug uban pa, nga gipatuman sa mga yunit gerilya.

Sa natad militar, padayong naka-angkon og mga kadaugan kun diin malampusong nalunsad ang 116 ka aksyon ug naipon ang ubay-ubay nga mga tag-as kalibre nga armas. Usbaw kini gikan sa 93 ka aksyon sa gisundan nga bag-ong milabayng tuig. Maayo usab kay nagkunhod na ang atong mga depensibang aksyon. Ug bisan sa mga depensibang aksyon, napakita ang kaisog ug kahanas militar sa mga Pulang kumander ug manggugubat kun diin sa ubay-ubay nga higayon naagaw pa nila ang inisyatiba gikan sa kaaway nga mga tropa.

Ang ginsakpan sa BHB sa Mindanao mokabat gihapon og pila ka libo. Naorganisa sila sa mga platun ug iskwad. Ginatos ang napasampa sa hukbong bayan sa miaging tuig, timailhan nga tabunok gihapon ang tinubdan alang sa mga Pulang manggugubat.

Padayon usab nga namentina ang atong pakigkontak ug pakighigalaay sa ubay-ubay nga sakop sa CAFGU ug mga indibidwal nga membro sa AFP-PNP nga nagsimpatiya sa atong gipakigbisogan nga mga isyu. Sekreto nga naghatag sila og nagkalain-laing suporta sa BHB. Kining tanan nga mga kalampusan nagpakita sa nagkalapad nga impluwensya sa BHB. Nagpakita kini sa kapadulngan sa BHB nga mao ang kadaugan. Sa karon nagatikang na kita sa pagsulod sa tunga-tungang yugto sa atong estratehikong depensiba.

Mga Kahuyangan sa Kaaway

Bunga niining atong mga kadaugan ug ubos sa dikta sa imperyalismong US, gipakusog sa rehimeng Macapagal-Arroyo ug pasistang AFP-PNP ang mga operasyong pagpanumpo sa BHB ug tibuok rebolusyonaryong kalihokan. Adunay dugang mga batalyon sa AFP nga giplastar sulod sa atong mga natarang gerilya ug nagkasubsob ang mga dagkong operasyon militar, ilabina sa mga lugar nga kusog ang atong pwersa ug sa mga buot palaparan sa mga korporasyong gipanag-iyahan sa mga imperyalista ug dagkong burgesya kumprador aron huthuton ang natural nga kahinguhaan ug bahandi sa isla.

Apan, bisan pa sa superyoridad sa AFP-PNP sa hisgutanan sa ginsakpan ug kahimanan panggubat, ang BHB dili mabuntog. Gawas nga makatarungan ang kawsa nga gidala sa BHB ug nagbaton sa halapad nga suporta sa katawhang Pilipino, ang atong kaaway nga AFP-PNP nagpas-an og batakang mga kontradiksyon nga sa iyang kaugalingon dili masulbad. Ang gidaghanon ug teknikal nga superyoridad sa AFP-PNP dili mapahimuslan og maayo tungod kay kontra-katawhan ang mga lakang ug palisiya niini. Siguradong mahiagom kini sa hingpit nga kapildehan sa lahutay.

Dili makayang mapuo sa AFP-PNP ang BHB nga naglunsad og gerilyang pakiggubat sa halapad nga kabukiran. Panahon nga magkonsentra ang kaaway og hilabihan ka dakong pwersa sa pila ka lugar, mabiyaan niini ang halapad nga lugar kun diin makapadayon paglihok ang mga yunit gerilya. Ug sa panahon nga magkatag ang mga kaaway nga tropa sa lapad nga lugar, mahimong sayon nga mga target sila sa mga taktikal nga opensiba sa BHB. Magkapuliki gyud ang kaaway kay kita ang gatakda kun kanus-a ug asa kita makigsangka.

Ang giatubang usab sa AFP-PNP dili lang ang BHB kundili ang ubang mga pwersang Moro nga nagdala og ubang linyang pangpulitika apan nakigbatok sa kasamtangang reaksyonaryong gobyerno sa Pilipinas. Busa nakatag ang mga pwersa sa kaaway.

Ang AFP-PNP napuno sa mga panagbangi sa sulod mismo bunga sa lumbaanay sa mga kadagkoang opisyales sa kaylap nga pangurakot sa pondo sa AFP-PNP ug adunay iya-iyang mga sindikatong kriminal nga gidumala. Daghan sa mga yanong sundalo ug ubos og ranggo nga mga opisyal ang grabeng nayugot sa ilang mga opisyales. Tataw nga makita nila ang pagpangawkaw nga ginahimo sa ilang mga labaw nga nagpuyo sa mga mansyon ug nanahimong mga bilyonaryo samtang sila ang ginapaon sa mga pakiggubat nga nagsilbe lamang sa pagpanalipod sa dunot nga sistema sa katilingban. Kasagaran ginalimbongan sila sa ilang batakang mga rasyon ug ubang mga benepisyo. Bisan ang mga pangmilitar nga kahimanan naga-adto sa tago nga baligyaanan. Nagtunhay ang mga paksyon sulod sa AFP-PNP nga adunay iya-iyang gidapigan ug/o kakunsabo sa lain-laing mga nagbanging pangpulitikang pundok sa mga nagharing hut-ong. Dili kini solido. Dugang pa, may panagkumpetinsyahay sa nagkalain-laing serbisyo sa AFP-PNP kun diin nagpahuyang kini sa tinabangay sa isig kaaway nga mga tropa.

Kapadulgan sa Atong Pakiggubat

Ubos niini nga mga kahimtang, huyang ang mga tropa sa AFP ug PNP ug kayang mabuntog sa BHB. Siguradong mahiagom kini sa hingpit nga kapildehan sa umaabot. Hinoon, seryosong gitagad gihapon sa mga yunit gerilya ang mga taktikal nga sitwasyon tungod kay gamay ug huyang pa kini itandi sa mga kaaway nga tropa. Ginapahapsay niini ang pagpaniktik sa kahimtang ug lihok sa kaaway. Nagakonsentra og superyor nga pwersa ang mga yunit gerilya sa pag-atake sa kaaway nga mga tropa aron paspas nga mapuo sila. Nagalunsad ang mga yunit gerilya og mga pakigsangka nga siguradong magmadaugon. Padayon usab nga ginapalapad ug ginapalalom ang baseng masa niini aron buta ug bungol ang kaaway sa kahimtang ug lihok sa mga yunit gerilya.

Niining mosunod nga tuig sa pakiggubat, pahimuslan sa BHB ang nagpadayong paborableng kahimtang sa nasud ug sa tibuok kalibutan alang sa lagsik nga pagpaasdang pa sa malungtarong gubat sa katawhan.

Komisyon sa Mindanao
Partido Komunista sa Pilipinas,
Marso 29, 2005

Back to top