Pamahayag sa PKP Mindanao Commission Sa Istatus sa Upat ka Espiya sa Far South Region

Mindanao Commission
Communist Party of the Philippines
Abril 05, 2005

Nakakuha og kadaugan ang rebolusyonaryong kalihukan sa dihang gipatawan sa Far South Region sa Mindanao og rebolusyonaryong hustisya ang upat ka espiya nga gidakop niini kaniadtong Setyembre 2, 2001 alang sa mga krimen nga ilang gihimo batok sa katawhan ug sa rebolusyon. Tungod sa maong pagpataw, among napugngan ang kaaway sa paggamit sa intelligence data nga nakuha sa mga espiya, sa paghimo og kadaut batok sa reboluyonaryong kalihukan, ug sa paghimo og dugang pang kadaot sa kinabuhi ug kabtangan sa katawhan sa mga apektadong erya.

Ang upat ka espiya sa kaaway gipahamtangan og maksimum nga silot kamatayon kaniadtong Setyembre 6, 2002 sa Valentin Palamine Command sa Far South Region. Ang sentensya gipatuman pagkahuman sa usa ka makuting imbestigasyon ug pagtaral sa pangrehiyonal nga korte sa demokratikong gobyerno sa katawhan sa Far South Region. Unanimous ang maong desisyon ug unanimous nga giuyunan sa mas hataas nga korte sa demokratikong gobyerno sa katawhan nga maoy nirebyu sa maong kaso ug nikonsidera sa apela nga gipasang-at sa nakumbikto nga mga bihag.

Napamatud-ang sad-an beyond reasonable doubt ang upat nga akusado sa paghimo og pagpang-espiya batok sa katawhan ug sa rebolusyonaryong pwersa. Panahon sa ilang pagtaral, gihatagan sila og mga abogado nga sila mismo mipili ug gihatagan sila og katungod nga gawasnong mupadayag sa ilang mga punto. Panahon sa ilang detensyon ug pagtaral, gihatagan sila og makitawhanong pagtratar.

Ang pag-uyon sa hataas nga korte sa desisyon sa ubos nga korte ug ang wala pag-uyon niini sa apela sa upat nga kumbiktado nakabase sa musunod:

Ang upat dili mga ordinaryong tig-hatag og impormasyon sa kaaway sa baryo nga wala o dunay gagmay'ng krimen lamang batok sa rebolusyonaryong kalihukan. Dugay na silang mga aktibong kontra-rebolusyonaryong elemento nga nanguna ug nagpatuman sa usa ka dako nga proyektong intelligence aron muhimo og kadaot ug bungkagon ang New People's Army ug ang rebolusyonaryong kalihukan.

Napamatud-an ug gi-angkon ni Sgt. Rosete nga siya usa ka intelligence officer sa Military Intelligence Group 12, Intelligence Service sa AFP, ug naglihok ubos sa mando ni Col. Victor Corpuz, nga maoy hepe sa ISAFP niadtong panahona. Gi-angkon usab ni Rosete nga siya maoy responsable sa pagtukod og intelligence network sa mga erya sa Columbio ug Tampakan, sakop sa probinsya sa South Cotabato.

Napamatud-an usab nga ang uban pang tulo ka bihag dugay na nga naglihok kauban ni Rosete sa gimbuhatong pagpang-espiya. Pinaagi sa ilang mga kutay, nahimo sa pasistang AFP ang dakong dagok sa pipila ka kauban ug rebolusyonaryong mag-uuma. Ang ubang mga mag-uumang simpatisador sa rebolusyon nga gibutyag nila ngadto sa kaaway dili na makapadayon sa ilang normal nga panginabuhian.

Gikan sa ilang pagkadakop, ilang gipadayon ang pagkuha og mga impormasyon kabahin sa rebolusyonaryong kalihukan ug pagsabot-sabot sa matag-usa aron sila makaeskapo. Giawhag ni Sgt. Rosete ang tulo nga mueskapo, ug gimandoang ibutyag sa kaaway ang tanan nilang nahibaw-an sa erya ug lugar sa ilang detensyon. Ilang gitiman-an ang mga nawong ug pangalan sa mga kauban, ngalan sa mga erya, ihap sa mga armas ug personel, ug ang tereyn.

Ang pagsulay ni Malcedir ug Sorongon nga mueskapo kaniadtong Hunyo 4, 2002 tataw nga nagpakita sa ilang kriminal nga salaod ug tinguha nga ipadayon ang ilang dautang laraw batok sa rebolusyonaryong kalihukan.

Ang upat wala nagpakita og paghinulsol sa ilang gibuhat o kaabrihan nga tul-iron ang ilang binuhatan. Sa mga imbestigasyon ug court proceedings, tataw nga daghan silang gipugngang impormasyon ug ilang gipasalaag ang mga kauban sa ilang mga pamahayag.

Sa wala pa gitaral ang upat ka espiya, nanawagan na ang National Democratic Front (NDF) alang sa negosasyon tali sa GRP (Government of the Republic of the Philippines) kabahin sa istatus sa upat. Amo usab gihangyo ang tabang sa mga lider sa Simbahang Katoliko ug media aron mapapaspas ang proseso. Apan wala gitagad sa GRP ang among panawagan, ug gani, nilunsad pa kini og dinagkong rescue military operations sa mga erya nga niresulta sa kamatayon sa pipila ka kauban ug mag-uuma ug grabeng kadaot sa mga masa sa erya, ug mibutang sa peligro ang mismong kinabuhi sa upat ka bihag sa gubat nga ila man unta nga kaugalingong mga tawo. Nahimong martir ang musunod nga mga simpatisador ug kauban: Ka Ligaya ug Ka Asyed, Roland Bacus, Ronel Bacus, Rolando Neros, Ricardo Dulay, Mostillo Gabay, ug Leonardo Sagot. Ang mga nasamdan mao sila Ka Juliet, Marivic Ayuba, ug Juanito Solitrino.

Sa kadaghang higayon gibombahan sa kaaway og 105 howitzer ug helicopter gunship rockets ang lugar sa nahimong malihokong kampong pangdetensyon. Dagkong patrolya sa kaaway ang niduol sa lugar apan gipaneguro sa NPA custodial force ang kinabuhi ug seguridad sa upat ka bihag nga mga espiya.

Nagpasagad ang GRP ug ang AFP sa ilang kaugalingong mga ahente.

Nadelatar kining maong pag-anunsyo tungod sa mga sirkumstansya nga gawas sa among kontrol. Ang mga limitasyon sa gubat maoy nakatukmod niini. Gihunahuna lamang namo ang interes ug kaayuhan sa katawhan sa mga apektadong erya nga dili angay nga labaw pang mag-antus tungod sa kadaut sa mga atake sa kaaway.

Buot usab namong iduso sa makausa pa ang kamatuoran nga sa nasud karon, adunay duha ka gobyerno nga nagtunhay nga may kaugalingong sistemang panghustisya-ang GRP, nga nagasilbe sa interes sa imperyalista ug dagkong burgesya-komprador ug hut-ong sa agalong yutaan ug, sa pikas bahin, ang demokratikong gobyerno sa katawhan, nga nagasilbe sa lapad nga masang gidaugdaug, gipahimuslan ug gipang-uyamot nga katawhan. Ang sistema sa rebolusyonaryong hustisya nga gipatuman sa mga erya nga sakop sa demokratikong gobyerno sa katawhan naghupot sa interes sa lapad nga masa sa katawhan ug nagtamod sa mga protocol sa gubat. Sa pikas bahin, ang GRP notoryus sa pagka-bayaran, kurakot ug kontra-kabus.