Mabuhi ang ika-36 nga anibersaryo sa Bagong Hukbong Bayan kun New People's Army

Allan Juanito
Spokesperson
Julito Tiro Command
New People's Army - North Central Mindanao
Marso 29, 2005

Sa ngalan sa North Central Mindanao Regional Command sa NPA akong ipadangat ang labing mainiton ug madasigong pagtimbaya sa ika-36 ka tuig nga kasumaran sa pagkatukod sa Bagong Hukbong Bayan (BHB) o New People�s Army (NPA) niining adlaw sa Marso 29.

Atong saludohan ug dayegon ang mahinungdanong mga kadaugang nakab-ot sa BHB sa paglunsad sa gubat sa katawhan sa kabukiran ug sa ilang mainantusong pagtrabaho ug mabayanihong sakrispisyo. Pila ka mga pananglitan sa mga kadaugan mao ang malampusong taktikal nga opensiba sa bukid sa Buenavista, Agusan del Norte ug San Fernando, Bukidnon ug sa Salay, Misamis Oriental nga nakasakmit og mga armas ug daghang kaswalti sa kaaway nga tropa. Daghan usab ang kaswalti sa pasistang tropa sa mga depensibang aksyong nahitabo ug nalungsad nga mga isnayping harasmento sa Nasipit ug Buenavista, Agusan del Norte, Claveria, Misamis Oriental ug Quezon, Bukidnon.

Laing pananglitan mao ang pagtabang sa mga mag-uuma nga mapakunhod ang abang sa yuta sa agalong yutaan, mapataas ang presyo sa ilang produkto ug suholan ug mamenosan ang usura. Daku sab ang natabang sa BHB sa pagbatok sa pagpangilog og yuta, paghusay sa mga lain-laing bangi sa han-ay sa katawhan ug pagsilot sa kriminal nga mga elemento sama sa murderer, rapists ug bandido o tulisan sa kabukiran diin nabawi pa ang ubang kinawat ug nauli sa hingtungdan.

Pasalamatan nato ang tanang katawhang misuporta ug mitabang sa BHB kay kung wala ang ilang suporta dili modaku, molig-on ug molahutay ang BHB. Atong pasidunggan ang mga kaubang nakalas sa armadong pakigsangka sa pasistang tropa sa AFP, PNP, CAFGU ug sa illegal nga teroristang Wild Dogs sa kabukiran sa San Luis, Agusan del Sur, Buenavista ug Nasipit, Agusan del Norte ug Misamis Oriental. Pasidunggan usab nato ang mga mag-uumang gipatay nila tungod lang kay misupak sa pasismo ug militarisasyon sa kabukiran ug mibarug sila sa ilang demokratikong katungod.

Ang paspas nga nagkagrabeng krisis sa panginabuhi sa katawhang Pilipino nga gidulot sa pagkontrol ug pagpahimulos sa atong nasud sa langyaw�ng imperyalista ug sa lokal nga nagharing hut-ong sa dagkung burgesya komprador, agalong yutaan ug burukrata-kapitalista maoy mopahigmata ug mopalihok sa tanang katawhang naglisud aron makigbisog sa unsa mang porma ug paagi nga makatarunganon walay labot ang pagtarget sa inosenteng sibilyan. Ang unsa mang pasistang balaod ug operasyong miltar nga himoon sa reaksyonaryong estado nga gipangulohan karon nila Gloria Macapagal-Arroyo dili makapugong sa pag-asdang armadong pakigbisog sa BHB ug sa ubang porma sa pakigbisog sa katawhan.