Pakisimpatiya ha kamatayon ni Atty. Dacut ngan pagkondenar ha kan Arroyo pagsabrag hin kahadlok

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Marso 19, 2005

Para ha kumpirmasyon, kontaka hi:
Roy Santos, NDF-EV Media Liaison Officer
Cellphone No. 0918-3112138

An NDF-Sinirangan Bisayas nakikiusa han kasubo han pamilya, katrabaho ngan kasangkayan han human rights lawyer ngan rehiyunal nga tagapangulo han Bayan Muna nga hi Atty. Felidito Dacut. Mahugot namon nga ginkukondenar an brutal nga pagpatay kan Atty. Dacut han naglabay nga Marso 14 ha Tacloban City. Nasusubo an katawhan han pagkawara hin usa nga maisog ngan makanasud nga abogado. Ginhalad ni Atty. Dacut an iya kinabuhi ngan propesyon ha pagbulig ha mga parag-uma, trabahador, kablas ha kasyudaran ngan iba pa nga nagkukuri ngan rinaug-daug. Komo usa nga makanasud ngan tagdepensa han kanan katawhan katungod, an iya mga katrabaho ngan an masa nagmamayuyo ngan naghigugma ha iya. Kun sugad, aton masesering nga an kaaway nga nangangalas ngan nagpatay kan Atty. Dacut waray iba kundi an kaaway han katawhan, ngan ini amo an reaksyunaryo nga estado.

Ini nga bag-o nga balitang han kabangis kontra ha mga ligal nga mga aktibista ha Sinirangan Bisayas nagpapamatuod han kanan rehimen Arroyo nagtitikapintas nga pasismo ngan terorismo han estado. Ha partikular, an sunod-sunod nga atake ha mga progresibo nga mga aktibista ha rehiyon amo an mga tinalawan, dunot ngan desperado nga mga gios han pasista nga berdugo nga hi Hen. Jovito Palparan ngan han 8th Infantry Division. Han naglabay nga Pebrero 18 ha Abuyog, Leyte, ginhimo liwat an pag-atentar ha kinabuhi han usa nga padi han Iglesia Filipina Independiente nga hi Fr. Allan Caparro ngan ha iya asawa. Hi Fr. Caparro bantugan nga kontra ha pagmimina nga aktibista ha Samar ngan ikaduha nga tagapangulo han Promotion of Church People's Response-Sinirangan Bisayas. Sugad man hadin Marso 6, butad-butaran nga gin-harass ngan gin-barikadahan hin usa nga armored personnel carrier ngan mga tropa han 63rd IB an upisina han mga progesibo nga grupo nga Bayan Muna ngan Katungod ha Catarman, Norte Samar.

Waray lipod-lipod an rehimen Arroyo ha pag-atake ha ligal nga demokratiko nga kagiusan, sugad man ha mga sibilyan ha kaumhanan nga gintatahapan nga mga tagsuporta han New People's Army. Mapapakyas an tinguha han rehimen Arroyo ha paghahadi pinaagi hin kahadlok, nga mapamingaw an kanan katawhan pagtipa ngan ha tidaraon mapaluya an rebolusyunaryo nga kagiusan. Kundi, mas magkukusog pa an rebolusyunaryo nga kagiusan tungod han kanan rehimen grabe nga kabangis ngan kawaray hustisya ngadto ha katawhan. An panmatay hin mga aktibista ngan iba pa nga mga pandarahug mas nga nagpapadagmit la han proseso han kapukaw han katawhan ha kamatiyupion han reaksyunaryo nga estado ngan han panginahanglan hin paglalansar hin armado nga pakigbisog agud pukanon ini. Hi Arroyo ngan an "gerra kontra-terorismo" ha yana in magtututdo han dalan ha yukot-yukot nga rekluta ngadto ha New People's Army, sugad han ginhimo ni Marcos ngan han balaud-militar ha naglabay. Dugang la nga nakaklaro ha mata han katawhan nga an NPA amo an tinuod nga hukbo ngan sangkay han katawhan, ngan an pagpapapintas han ginerilya nga mga opensiba nagseserbe agud sirutan an mersenaryo ngan ginkakangalsan nga Armed Forces of the Philppines.

Ibirik naton an aton kasubo ngan kangalas ha pagpataya kan Atty. Dacut ngadto ha kamaisog ngan kamadig-on agud iundong tipaunhan an makanasud ngan demokratiko nga kagiusan han katawhan. An karuyagon para ha hustisya ngan pagbulos para kan Atty. Dacut ngan han mga martir han katawhan mapakusog pa ha kontra-pasista nga kagiusan han masa ha pagbuyagyag ngan pagtipa ha pasista nga demonyo. Ha pag-ato ha pagpanalumpigos, an katawhan gin-aaghat nga atuhan liwat, pinaagi han kontra-pyudal ngan kontra-imperyalista nga mga kagiusan masa, an nagtitikagrabe nga kakurian ilarum ha rehimen Arroyo. Pinaagi la han demokratiko nga pakigbisog han katawhan, kanay iya gintindugan ngan gindepensahan, makakab-ot an hustisya para kan Atty. Dacut ngan para ha ngatanan. Samtang gin-gagamit han katawhan an iba-iba nga porma han murayaw nga pakigbisog, an ira rebolusyunaro nga armado nga pakigbisog an magseseguro han pagrumpag han reaksyunaryo nga estado nga nagdudurot hin grabe nga pag-antos, ngan magrereyalisar hin hustisya, kagawasan, demokrasya ngan panmaihaan nga kamurayaw.#

Back to top