Ang tinuod nga terorista mao ang naka-uniporme nga si Hen. Palparan

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Marso 14, 2005

Para ha kumpirmasyon, kontaka hi:
Roy Santos, NDF-EV Media Liaison Officer
Cellphone No. 0918-3112138

Ang bat� nga nawong sa pasismo ug terorismo sa estado gibuyagyag ni Hen. Jovito Palparan ngadto sa masmidya sa niaging Marso 5. Sa iyang syahan nga pag-atubang sa mass media sa syudad sa Tacloban, ang bag-ong hepe sa 8th Infantry Division nagpadayag sa iyang pagtamay sa kalibrehan sa pagbalita (press freedom) ug sa iyang pag-uyon sa censorship nga gihambala sa Armed Forces of the Philippines (AFP). Gipakita usab ni Palparan nga siya usa ka tinuod nga naka-uniporme nga terorista pinaagi sa paghinambog niini sa iyang kalibrehan (impunity) sa iyang mga krimen sa gubat, ug sa pagpanarhug sa paghitaas unya sa pasismong opensiba ug sa pagpuypoy sa mga "kaaway sa estado" � armado o dili � sa muaabot nga mga buwan.

Kami sa NDF-Sinirangan Bisayas nakighiusa sa kasuko sa masmidya ug sa publiko niining mga pahayag nga angayan lamang sa usa ka berdugo susama ni Palparan. Ang kumander sa 8th ID nagsubay sa linya sa mga mayor sa AFP nga ang midya angayan magpatuman ug kaugalingong censhorship ug nga kadtong nagpakabana sa mga gitawag nga terorista angayan nga silutan. Kini nga kiat nga paagi ni Palparan ug sa AFP nagpakita sa peligroso nga lakang ngadto sa way lipod-lipod nga pasista nga pagpanlupig sa rehimen Arroyo. Pinaagi sa pagsingabot sa pagpamomba sa Manila ug Mindanao ug sa giingo'ng "tarhug sa terorismo", giduso usab sa rehimeng Arroyo ang pagkutli sa sibil nga kagawasnon pinagi sa malinupigong kontra-terorismo nga balaudnon ug gisalmot nga national ID system. Ang pasista nga duon sa rehimen miduyog sa iyang pagpatuman sa maka-imperyalista nga globalisasyon nga nakahatag ug grabe nga pan-ekonomikanhong krisis, pan-katilingbang distabilisasyon ug pagsukol ngaduha armado ug dili armado.

Gustong pahilumon sa rehimeng Arroyo ang midya, pugngan ang giila niining kaaway nga iyang gibantog nga "terorista", ug way kalooy nga gipapas-an niini ang katawhan sa gidili, maka-imperyalista, pasista ug kurakot nga iyang administrasyon. Kini mao'y rason nganong ania si Palparan sa Sinirangan Bisayas aron buhion ang ka-pareho nga huyog sa kahadlok susama sa iyang gihimo gikan pa sa 1980 sa Cordillera, Central Luzon, ug hilabi na sa Southern Tagalog. Kini mao nga si Palparan lantaran nga naghimo ug ngil-ad nga kasuguanan nga ang midya dili magpanumbaling sa mga "terorista" ug mapahitas-ong himuon nga ang propaganda sa militar mao lang ang ug way dung-it nga hugaw nga kamatuuran. Tungod kay kanunay nga gisuhulan ug gipanalipdan sa rehimeng Arroyo, si Palparan mamahimong makalusot sa tulubagon sa human rights ug international humanitarian law, bisan pa sa iyang pagpamulong nga iyang wagtangon ang bisan unsa nga pagbabag sa reaksyunaryo nga gobyerno � ngaduha ang "manghagit" ug ang "armado nga kaaway sa estado".

Kini usa ka ngil-ad nga komidya ug tibuok nga pagtamay para sa usa nga gidili susama ni Palparan, usa nga way moralidad ug way pagpakabana sa mga balaud sa gubat, nga mutudlo sa midya bahin sa ethics ug responsibilidad. Nangyam-id si Palparan ngadto sa mga nagpanawagan ug hustisya alang sa iyang bayulasyon sa tawhanong katungod ug sa internasyunal nga mga balaudnon sa gubat. Niining paagiha iyang sistematiko ug way pagpakabana nga supakon ang Comprehensive Agreement on Respect for Human Rights and International Humanitarian Law (CARHRIHL) tali sa NDF ug sa gubyero sa Pilipinas, ang mismo nga balaud sa reaksyunaryo nga gubyerno, ug sa Geneva Conventions ug uban pa nga internasyunal human rights nga kasuguanan.

Isip kumander sa 24th Infantry Battalion sa Central Luzon gikan sa uwahi nga parte sa 1980s ngadto sa 1991, dabe si Palparan sa panikmit ug torture sa mga organisador sa mag-uuma ug uban pa nga mga aktibista, daghan nga pan-aresto ug pagpasurender sa mga peke nga NPA ug pampamomba sa mga puy-anan sa mga sibilyan. Niadtong 1992 samtang nakadestino sa Mountain Province, Cordillera, ang kabangis ilawm sa iyang mando nagdabi ug unom nga kaso sa ilegal nga pag-aresto, lima nga kaso sa pang-harass, usa nga kaso sa pagkawa, usa nga dayon nga pagpatay, usa nga kaso sa pagsamad ug duha nga kaso sa pagbakwet. Isip mangulo sa Task Force Banahaw sa Rizal ug Laguna, 61 ka kaso sa pag-bayolar sa tawhanon nga katungod sa uwahi nga probinsya ang naibutang sa rekord sa 2001 ilawm sa iyang mando. Kuwang ug duha ka-tuig isip kumander sa 204th Infantry Brigade sa Oriental Mindoro gikan sa uwahi sa 2001 ngadto sa Abril 2003, gipanmatay sa militar ang 27 nga way laban nga mga sibilyan ug aktibista, uban na niini ang lider sa human rights nga si Eden Marcellana nga nag-imbistiga sa mga kabangis nga nahitabo.

Ang kumander sa 8th ID way uwaw nga nag-amkon nga siya inosente susama sa karnero sa iyang mga krimen sa gubat tungod kay ang mga kaso batok kaniya wa muuswag sa mga korte sa reaksyunaryo nga gubyerno. Hinuon, kini nga kamatuuran dili panigamnan nga wa siya'y sala kundi usa ka dakong pagkundena sa gubyerno: nga ang usa nga grabe nga mibayolar sa tawhanon nga katungod ug internasyunal nga balaud sa gubat wa mapatuki, hinuon misaka sa hagdanan sa promosyon bawbaw sa kalabera sa iyang mga biktima. Tungod kay way hustisya ilawm sa reaksyunaryo nga gubyerno, ang rebolusyunaryo nga gubyerno sa katawhan maoy mupaseguro sa hustiya pinaagi sa pag-apas, pag-aresto, paghusgar ug pagsilot kang Palparan ug sa iyang mga kapareho.

Apan ang nagkanayon nga pagsupil dili magmalinapuson sa Sinirangan Bisayas sama sa ubang dapit, apil ang kanhi na-destinuhan ni Palparan. Ang rebolusyunaryo nga kalihukan dinhi ug sa tibuok nasud nagmadinaugon sa sobra 30 ka-tuig batok sa mga reaksyunaryo nga gubyerno nga gipaluyuhan ug gi-armasan sa imperyalismo nga US. Unsa pa kaha batok sa usa nga luya susama sa rehimen ni Arroyo, taliwa sa pinaka-grabe nga krisis sa kasaysayan sa Pilipinas, ug sa militar niini nga gilumos sa kurapsyon ug pagkabuwag? Sa pakig-away sa usa ka makatarungan ug tukma nga gubat, ang panaghiusa sa katawhan ug sa rebolusyunaryo nga kalihukan dili mapukan, hinuon, kini magtubo nga mas lig-on atubangan sa pagpanubra sa dili-makatarungan nga gubat sa kaaway ug nagkapildi nga direksyon. Ang Bagong Hukbong Bayan, nga wa mapildi ni Palparan sa kinatibuka-an sa iyang karera isip sundalo, nagpadayo'g pagtubo sa kakusgon ug andam sa pagpakusog pa sa ginerilya nga mga opensiba isip tubag sa nagkagrabe nga krisis ug pasismo.

Ang mass media ug katawhan kinahanglang magpabilin nga mabinantayanon ug masukulon alang sa pagpakyas sa buladas ni Hen. Palparan nga pagpugong sa kalibrehan sa pagpahayag ug uban pa nga mga demokratiko nga katungod. Sa iyang pagkasaba sa mga "kaaway sa estado" ug pagpang-hadlok sa mga tigbalita sa rehiyon, gipakita lamang ni Palparan nga siya mukontra sa katawhan sa Sinirangan Bisayas ug sa ilang mga demokratiko nga nga mga isyu, ug sa tanang tigbalita nga miugop sa gapil sa katawhan imbes nga sa rehimen ni Arroyo. Mao nga tama lang nga tawgon si Palparan kun unsa gud siya: usa ka kaaway sa katawhan. Ug susama sa mga nauna pa niya ug kadtong musunod pa, ang katawhan ug ang rebolusyunaryo nga kalihukan sa Sinirangan Bisayas makasulti ug usa ka komon nga butang nianing mga pasista nga hambog.

Pirmi sila musulod nga naay but� ug mugawas nga nag-nguyngoy.#

Back to top