An tinuod nga terorista amo an naka-uniporme nga hi Hen. Palparan

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Marso 14, 2005

Para ha kumpirmasyon, kontaka hi:
Roy Santos, NDF-EV Media Liaison Officer
Cellphone No. 0918-3112138

Ginpakita ni Hen. Jovito Palparan ngadto ha masmidya an maraut nga nawong han pasismo ngan terorismo han estado hadin Marso 5. Ha iya syahan nga pag-atubang ha midya ha Tacloban City, an bag-o nga hepe han 8th Infantry Division nagpahayag han iya pagtamay ha libre nga pagpahayag (press freedom) ngan han iya pag-abuyon ha censorship nga ginproponer han Armed Forces of the Philippines (AFP). Ginpakita gihapon ni Palparan nga usa hiya nga naka-uniporme nga terorista ha iya paghinambog han iya katalwas ha iya mga krimen ha gerra ngan pagtarhug han pagpapintas han pasista nga opensiba ngan pagpuypoy han mga "kaaway han estado"�armado ngan diri�ha tiarabot nga mga bulan.

Kami ha NDF-Sinirangan Bisayas naduyog han kangaralson han masmidya ngan han publiko hini nga mga pahayag nga angay nga nagtitikang ha usa nga pasista nga berdugo sugad kan Palparan. Ginpapasamwak han kumander han 8th ID an linya han pamunuan han AFP nga kinahanglan himuon han midya an self-censorship ngan angay sirutan adton mga naghahatag hin higayon ha mga "terorista" nga makagpahayag ha midya. Ini nga pwersahay nga daop ni Palparan ngan han AFP nagpapakita han peligroso nga huyob han rehimen Arroyo ngadto ha hul-os nga pasista nga represyon. Ha pagsingabot han mga pamomba ha Manila ngan ha Mindanao ngan han ginsesering nira nga mga "tarhug han terorismo", ginduduso liwat han rehimen Arroyo an pagpugong han mga kagawasan sibil (civil liberties) pinaagi han pagproponer han mga matiyupion nga kontra-terorista nga balaud ngan hin usa nga national ID system. Ini nga pasista nga duso han rehimen igo la han iya implementasyon han imperyalista nga globalisasyon nga nagdudurot han grabe nga krisis ha ekonomiya, destabilisasyon han katilingban, ngan pag-ato ngaduha armado ngan diri.

Karuyag han rehimen Arroyo nga pugngan an midya, puypuyon an iya mga gintudlok nga kaaway nga ginpakaraut komo mga "terorista", ngan pagtamas-tamasan an katawhan han iya kontra-katawhan, maka-impeyalista, pasista ngan korap nga administrasyon. Ini an hinungdan kun kay-ano nga adi yana hi Palparan ha Sinirangan Bisayas agud magsabrag hin klima hin kahadlok sugad han iya ginhimo han dekada 1980 ha Cordillera, Central Luzon ngan ilabi na ha Southern Tagalog. Ini an hinungdan kun kay-ano nga butad nga ginhimo ni Palparan an malaw-ay nga proposisyon ha midya, nga baliwarayon an mga "terorista" ngan dogmatiko nga ipagawas an propaganda han militar komo asya la ngan klaro nga kamatuoran. Tungod kay permi ginpapasidunggan ngan ginpapaluyuhan han rehimen Arroyo, masayon kun sugad para kan Palaparan an magmaniobra ngan makaalinggawas ha mga kurukayaknon han katungod pantawo ngan internasyunal nga makatawo nga balaud, bisan pa ngani ha yana nga nagpapahayag ini hin paglipol han hin-o man nga nakontra ha reaksyunaryo nga gubyerno�pareho an "mga ahitador" ngan an "mga armado nga kaaway han estado".

Kun sugad, usa nga maraut nga entremis ngan hul-os nga pagtamay hin usa nga diri ginkakarawat sugad kan Palparan, nga waray batasan ngan waray pagtagad han mga balaudnon ha gerra, nga magpostura nga maaram ngan magtutdo ha midya kabahin han tukma nga kabatasanan ngan responsibilidad. Ginyayam-iran la ni Palparan adton mga nagdedemanda hin hustisya ha iya mga pagtalapas ha katungod pantawo ngan mga internasyunal nga pagsurundon han gerra. Ha sugad nga paagi niya waray pagtahod ngan sistematiko nga gintalapas an Comprehensive Agreement on Respect for Human Rights and International Humanitarian Law (CARHRIHL) giutan han NDF ngan han gubyerno han Pilipinas, an mismo nga mga balaud han reaksyunaryo nga gubyerno, ngan an Geneva Conventions sugad man an iba nga internasyunal nga pagsurundon ha katungod pantawo.

Komo kumander han 24th Infantry Battalion ha Central Luzon tikang han urhi nga parte han dekada 1980 ngadto han 1991, hi Palparan gintudlok nga responsable han pagsikmit ngan pagtortyur han mga organisador han mga parag-uma ngan iba pa nga mga aktibista, tinagdamo nga pan-aresto ngan mga peke nga pagsurender han mga "NPA", ngan pamomba hin usa nga sibilyan nga komunidad. Han 1992 la, samtang nakadto ha Mountain Province, Cordillera, kun diin utro hiya nga gindeploy, nahidabi an iya kumand ha unom nga kaso hin iligal nga pag-aresto, lima nga kaso hin harasment, usa nga kaso hin pagkawara, usa nga pagsalbeyds, usa nga kaso hin pagsamad ngan duha nga kaso han ebakwasyon. Komo namumuno han Task Force Banahaw ha Rizal ngan Laguna, 61 nga mga kaso hin pagtalapas ha katungod pantawo ha urhi nga nasabi nga probinsya an nairekord han 2001. Ha sulod la han kulang duha ka tuig komo commanding officer han 204th Infantry Brigade ha Oriental Mindoro tikang han urhi nga parte han 2001 ngadto han Abril 2003, an iya tropa responsable han pagpatay han 27 nga mga inosente nga sibilyan ngan aktibista, upod na an lider han tag-undong han katungod pantawo nga hi Eden Marcellana nga nag-iimbestiga han mga pagtalapas.

Daan na nga pasasngilan an gin-iinsister han kumander han 8th ID nga inosente hiya sugad han karnero ha iya mga krimen ha gerra, tungod kay waray nahingadtuan ngan nabiaw an iya mga kaso ha mga korte han reaksyunaryo nga gubyerno. Lugod, ini nga kamatuoran diri nag-aabswelto ha iya, kundi usa nga dako nga pagkundenar ha reaksyunaryo nga gubyerno: nga an usa nga grabe nga paragtalapas ha katungod pantawo ngan internasyunal nga balaud han gerra waray gud nasirutan, kundi ginpapabay-an nga makasaka ha pusisyon kabalyo an kinabuhi han iya mga biktima. Tungod kay waray hustisya ilarum han reaksyunaryo nga gubyerno, an rebolusyonaryo nga gubyerno han katawhan an magpapaseguro han hustisya ha paglanat, pag-aresto, pagbista ngan pagsirot kan Palparan ngan han mga sugad ha iya.

Kundi, an nagtitikagrabe nga paniniyupi diri magmamanilampuson ha Sinirangan Bisayas, sugad man ha iba nga dapit kun diin nadestino hi Palparan. An rebolusyunaryo nga kagiusan dinhi ha rehiyon ngan ha bug-os nga nasyon umungbaw ha sulod han masobra 30 ka tuig ha mga reaksyunaryo nga rehimen, ngatanan ginpaluyuhan ngan gin-armasan han imperyalismo nga US. Ano pa ba an mas mariigdiig nga rehimen Arroyo, nga naabat han pinakagrabe nga krisis ha kasaysayan han Pilipinas, upod an iya armado nga pwersa nga ginkukutkot tikang ha sulod han korapsyon ngan pagkabuhag-buhag? Ha pag-uundong hin usa nga makatadungan nga gerra, diri mababantad an pagkaurusa han katawhan ngan rebolusyunaryo nga kagiusan, kundi padayon nga magkukusog atubangan han kanan kaaway mga pagpapanobra ha ira diri makatadungan nga gerra ngan kahingadto ha kaperdihan. An Bagong Hukbong Bayan, nga waray kapeperdi ni Palparan ha bug-os niya nga serbisyo militar, padayon nga natikakusog ngan andam nga papintason an mga gerilya nga opensiba komo baton ha nagtitikagrabe nga krisis ngan pasismo.

An masmidya ngan katawhan kinahanglan magpabilin nga mabinantayon ngan militante agud pakyason an kan Hen. Palparan pirit nga pagpuypoy ha libre nga pagpahayag ngan ha iba pa nga demokratiko nga katungod. Ha iya mga pakaraut ha mga "kaaway han estado" ngan pagtarhug ha mga taga-midya ha rehiyon, ginbubuksas la ni Palparan nga ha tinuod nakontra hiya ha katawhan han Sinirangan Bisayas ngan ha ira mga demokratiko nga isyu, ngan ha ngatanan nga sumat han midya nga nagapil ha katawhan ngan diri ha rehimen Arroyo. Sanglit, kaangayan la nga tawagon hi Palparan kun ano hiya ha tinuod: usa nga kaaway han katawhan. Ngan sugad man han mga nahiuna ha iya ngan ha mga masunod pa, an katawhan ngan an rebolusyonaryo nga kagiusan ha Sinirangan Bisayas may usa la nga masesering hini nga mga hambog nga pasista.

Permi hira masakob nga may buto kundi magawas nga nagngunguyngoy.#

Back to top