NDF: Ang VAT nagatukmod sa katawhan ngadto sa armadong pakigbisug batuk kang GMA

Rubi Del Mundo
Spokesperson
National Democratic Front-Southern Mindanao
Pebrero 02, 2005

Si Gloria Macapagal-Arroyo nahimong "maayong" magtutudlo sa katawhan arun palagputon ang iyang rehimen pinaagi sa militanteng pakigbisug ug pakigrebolusyon. Ang iyang rehimen nagdumili sa pagpausbaw sa suholan sa mga mamumuo; nagtugot sa kahakug sa mga kumpanya sa lana pinaagi sa way puas nga pagsaka sa presyo sa mga produkto niini; naghatag sa mga bililhong yutang minahan ngadto sa mga langyaw, ug niining bag-ohay lang, nagapahamtang og dugang buluhisan sa mga pagkaon ug uban pang batakang panginahanglan sa katawhan.

Nagatuo ang National Democratic Front-Southern Mindanao nga ang pagsingil og dose porsyento nga VAT (Value Added Tax) isip dugang pundo alang sa gobyerno dili makatarunganon. Grabe ang kasuko sa katawhang Pilipino sa mga lakang nga patas-an gikan sa napulo ngadto sa dose porsyento nga VAT ug nagtukmod kini kanila nga mualsa arun pakgangon ang rehimen.

Sukwahi sa gipasiatab sa mga tigpamaba sa rehimeng US-Arroyo, ang dose porsyento nga VAT dili makasulbad sa kakulangon sa badyet (budget deficit) sa reaksyunaryong gobyerno nga syento otsenta (P180) bilyones ka pesos matag tuig. Ang pagsingil og kwarta gikan sa masang Pilipino dili sulbad sa problema nga hinimoan sa globalisasyon ug resulta sa "export-oriented" ug "import-dependent" nga kinaiya sa ekonomiya. Sa simpleng pagkasulti, nagkagamay ang makuha nga buhis ug uban pang pondo sa gobyerno gikan sa mga lokal nga mga industriya. Tungod kini sa pagkalugi sa mga lokal nga industriya tinukmod sa mahal nga inangkat nga himan sa produksyon samtang, sa pikas bahin, nagbaha ang mga imported nga produkto sa lokal nga merkado.

Samtang ang katawhang Pilipino nag-antos sa kakulangon sa serbisyong panglawas ug uban pang serbisyong pangkatilingban, ang rehimeng Arroyo nagpadayon sa iyang way puas nga pagbayad sa utang. Nag-usik kini og otsenta porsyento (80%) sa kita sa nasud ngadto sa pagbayad og utang matag tuig. Ang rehimen nagpabilin nga inutil diha sa paggukod sa mga dagkong kapitalista nga naglikay og bayad sa buhis.

Arun mamenusan ang nagkagrabeng kayugot sa katawhan, ang mga sipsip nga alipures ni Arroyo nag-ingon nga "sobra" ra kuno ug dili husto ang mga punto nga gibuhian sa mga mibatok sa VAT. Timailhan sa walay pagpakabana ang gibuhiang punto pananglit ni Congressman Prospero Nograles sa unang distrito sa Davao, sa dihang namahayag kini nga dili kuno ingon niana kadako ang mahimong epekto sa VAT, tungod kay kuno dili ra kaabot og piso ang mahimong tubo sa presyo sa tinapa, noodles ug asukar.

Ang mga pesante sa kabanikanhan, halos maglisud man gani og sarang sa nagkamahal nga presyo sa mga gamit sa panguma, ug halos dili na kini makabaligya sa ilang produkto tungod sa mahal nga transportasyon. Dinhi sa Habagatang Mindanao, ang kaylap nga pagpahimulos ug pagpangilog og yuta sa kabanikanhan nagkasamot hilabi na tungod kay pinal na nga nagdesisyon ang Korte Suprema sa GRP nga tugutan ang hingpit nga pagpanag-iya sa mga langyaw nga monopolyo sa mga dinagkong mina pinaagi sa Mining Act.

Ang mga mamumuo dinhi sa rehiyon nadismaya sa katorse pesos (P14) lamang nga usbaw sa minimum wage nga gihatag, kantidad nga dili pa gani paigo ipalit og usa ka kilo nga bugas. Nagkagrabe ang "cybersex" dinhi sa syudad sa Davao ug uban pang dagkong syudad--timailhan nga nagkadaghan ang mga babaye ug batan-on nga nahisugamak sa prostitusyon arun lamang maluwas sa krisis.

Musamot pa ang krisis sa katawhan tungod kay ang balayranan sa kuryente ug tubig buot na usab patas-an ngadto sa saysenta porsyento (60%). Ang Sangguniang Panlungsod sa Davao aduna pa gayuy plano nga bag-ohon ang lokal nga tax code arun patas-an ang buhis ug uban pang balayronon nga singlon gikan sa katawhan.

Makatarunganon lamang nga magkahiusa ang katawhang Pilipino arun palagputon ang rehimen nga nagpahimulos ug wala naghatag og bili sa kaayuhan sa katawhan. Ang mga propesyunal ug peti-burgesya sa kasyudaran padayon nga naaghat sa pagsalmot sa nagkalapad nga kalihukang kontra-Arroyo arun batukan ang mga kontra-katawhang palisiya niini.

Tungod kay wala kini nakitang kaayuhan sa kasamtangang sistema, ang hut-ong mamumuo ug ang mga kabus nga mag-uuma mas naaghat pa nga mosalmot sa armadong pakigbisug. Ilalum sa kasamtangang pait nga kondisyon, nagkataas ang moral sa mga Pulang Manggugubat ug ang rebolusyonaryong masa arun pakusgon pa ang pakigbisug ug ang armadong taktikal nga opensiba alang sa paggun-ob sa rehimeng US-Arroyo sa umaabot nga panahon. ***