Gihagit sa NDF ang Rehimeng US-Arroyo sa pagdeklara og Log Ban sa Mindanao

Jorge "Ka Oris" Madlos
Spokesperson
NDF-Mindanao
Pebrero 02, 2005

Ang pinakadaku ug pinakagrabeng tig-guba sa kalasangan sa Mindanao mao ang ginatawag nga "legal loggers" sama sa:

1. PICOP Resources Incorporated nga kontrolado sa pamilyang Bernardino nga naglangkob sa 270,000 ka ektarya sa Agusan del Sur, Surigao del Sur, Davao Oriental, ug Compostela Valley;

2. Nasipit ug Anakan Lumber Company nga naglangkob sa 171,700 ka ektarya sa Agusan del Norte, Agusan del Sur, Misamis Oriental ug Bukidnon;

3. Woodland Domain Incorporated nga milangkob sa 54,000 ka ektarya sa Agusan del Sur;
4. Surigao Development Corporation sa Surigao del Sur;

5. Aras-asan Timber Corporation, Surigao del Sur;

6. ug daghan pang mga igo-igong gidak-on nga mga kompanya sa logging sa ubang bahin sa Mindanao.

Ang Integrated Forest Management Agreement (IFMA), Community Based Forest Management Agreement (CBFMA) ug uban pang malinglahong programa sa rehimen maoy mga dagkung takoban sa mga illegal logging. Kining iligal loggers dili makatunhay kun walay proteksyon gikan sa mga militar, pulitiko ug opisyales sa DENR. Ang kadaut nga nahimo sa mga mag-uuma sa "kaingin" dili dinagku, busa, dili angayang pasanginlan sa kasal-anan sa mga "legal" ug iligal nga mga loggers.

Sa miaging kapin 50 ka tuig, ang grabeng pagpangguba sa atong kalasangan pinaagi sa "ligal" ug iligal nga logging labing dakung nakabenipisyo mao ang mga dagkung burgesyang komprador, mga pulitiko, dagkung opisyales sa DENR ug militar, ug ilang amo nga mga imperyalistang US ug Japan. Ang walay pagkatagbaw nga kahakog niining gamay nga de-pribilihiyong pundok maoy hinungdan sa disbalansi sa ekolohiya nga miresulta sa kinaiyanhong kalamidad nga midangat sa kamatayon sa linibo nga kasagarang kabus nga Pilipino, ug kadaut sa binilyong kabtangan.

Kun ang rehimeng US-Arroyo seryoso sa pagpaundang sa nagapadayong pagka-upaw sa atong nanga-upaw na nga kalasangan sa Mindanao ug sugdan pagpahiuli ang balansi sa ekolohiya sa tibuok isla, gihagit sa National Democratic Front-Mindanao ang rehimen sa paghimo sa mosunod nga mga aksyon:

1. Una, ideklara ang log ban sa tibuok nasud ug bawion diha-diha ang tanang Timber License Agreement ug undangon ang tanang programa sa DENR nga nahimong takoban sa mga iligal nga logging sa Mindanao. Sa paghimo sa ingon, minilyon ka ektarya sa kalasangan ug salin sa logging nga mga erya sa Mindanao ang posible pang malibre sa diha-dihang kadaut.

2. Ikaduha, seryosong undangon ang kalihokan sa illegal logging pinaagi sa pagtaral sa tanang illegal loggers, AFP ug PNP, pulitiko ug opisyales sa DENR nga nalambigit sa iligal logging o tig-protekta sa iligal loggers.

3. Ikatulo, sinserong ipatuman ang reforestation pinaagi sa pagpahiuli sa mga lumad nga kakahoyan ug dili kadtong mga komersyal ug langyaw nga mga kakahoyan nga mopasamot sa kadaut, inay, mopahiuli sa paspas nga nagakawala natong orihinal nga kalasangan.

4. Ikaupat, diha-dihang i-implementar ang tinuod nga reporma sa yuta nga kaatrasan alang niadtong mga nagasandig sa industriya sa kahoy ug i-implementar ang nasudnong industrialisasyon aron mosagop sa mga natangtang nga mga mamumuo gikan sa industriya sa logging ug ubang industriya nga nakabase sa kahoy.

Ang rebolusyonaryong kalihukan adunay kaakuhan sa pagpanalipod sa atong kinaiyahan, subay sa kapasidad taliwala sa kamatuoran nga kining mga big time nga legal ug illegal loggers direktang ginapanalipdan sa mga pwersa ug mga batalyon sa Armadong Kusog sa Pilipinas ug sa mga para-militar. Ginalunsad usab namo ang mga kampanyang reforestration ug mga pagpasabot nganha sa masang mag-uuma alang sa sustainable forest product utilization and management ug sa pagpakunhod, kundili man, paglikay sa mga makadaut nga epekto sa pag-kaingin.

Naga-awhag ang National Democratic Front-Mindanao sa katawhan sa Mindanao nga makighiusa sa tibuok katawhan sa nasud sa pagbutyag ug pagsupak sa malinglahong iskema sa rehimeng US-Arroyo batok sa nagapadayong pagpangdaut sa atong kalasangan.###

Back to top