Kundenahon ngan tipahan an pasista nga republika ni Arroyo para han masaker han mga parag-uma ngan makarima-dima nga mga pagtalapas han kanan katawhan katungod

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Disyembre 07, 2004

Ha Sinirangan Bisayas sugad ha Hacienda Luisita ha Central Luzon, waray kalooy nga ginpapatay an mga parag-uma han militar ngan pulis han mga agaron may-tuna ngan dagko nga negosyo. Ginpapamatud-an hini ngan han iba pa nga mga porma han terorismo han estado kontra ha mga parag-uma ngan haluag nga masa han katawhan nga an ginsusuportuhan han US nga "Strong Republic" ni Gloria Macapagal-Arroyo in usa nga pasista nga republika. Haluagan an pagtalapas han mga sibil nga katungod diri la tungod kay brutal nga ginpapaseguro han reaksyunaryo nga naghahadi nga sistema an pagpreserba han kalugaringon. Ginseseguro liwat hini nga ipabilin an paniniyupi ngan panraraugdaug hini nga nagreresulta ha panalapas han mas haluag nga katungod sosyal, ekonomiko ngan kultural han katawhan. Ini an rason kun kay-ano ginbabandera han pasista nga republika ni Arroyo an "gerra kontra terorismo" kabunyog han pag-uundong hini han imperyalista nga "globalisasyon", nga amo an hinungdan han grabe nga ekonomiko nga krisis, piskal nga krisis ngan sosyal nga karigumok.

Gin-guguliat han dugo ngan paghihimakuri han katawhan han Sinirangan Bisayas an hustisya para han pinakabag-o nga mga krimen han reaksyunaryo nga estado kontra ha tawhanon nga katungod ngan internasyunal nga makatawo nga balaud. An masa nga parag-uma amo an nangunguna nga biktima han "gerra kontra terorismo", nga usa nga kontra-rebolusyonaryo nga gerra nga waray balaud ngan waray paglalain giutan han sibilyan, non-combatants ngan combatants han New People�s Army. Gintatatakan han pasista nga republika ni Arroyo komo "terorista" nga binuhatan an demokratiko nga mga pakig-away han mga parag-uma, trabahador, kablas ha kasyudaran, ngan iba pa nga mga klase ngan sektor .

Ha paglalansar han "gerra kontra terorismo" pinaagi han Oplan Kalinaw, an tinuod nga terorista waray iba kundi an 8th Infantry Division mismo tungod han pag-terorisa hini han mga komunidad han mga parag-uma ha Samar nga Leyte. Aton hinumduman an ira ginmasaker nga unom nga sibilyan ngan tulo nga nadis-armahan nga mangaraway han NPA ha Kananga, Leyte hadton Abril 2003 samtang nakada ha kostudiya han mga sundalo nga nagtikang ha 19th Infantry Battalion. Aton hinumduman hira Rogelio Nurcio, Bernardo Amado, ngan Freddie Rebato, ngatanan inosente nga mga sibilyan nga ginpatay han mga militar ha magkaiba-iba nga insidente ha Este Samar hadin Hunyo. Aton hinumduman an brutal nga pagpatay ha Catubig, Norte Samar hadin Agosto 8 kan Mely Conge, upat ka-bulan nga burod, tungod han 17 nga igo hin bala kahuman istrapingon an iya balay han mga sundalo ngan CAFGU han 63rd Infantry Battalion.

Gintatarget gihapon han pasista nga republika ni Arroyo an mga ligal nga kagiusan masa ha Sinirangan Bisayas. Sugad nala han pagpataya han lider-trabahador nga hi Samuel Bandilla hadton Oktobre 15 ha Tacloban City. Ginsususpetsahan nga responsable hini nga panhitabo an mga elemento han military intelligence ngan sinuhulan nga goons ni Ranulfo Feliciano, general manager han Leyte Metropolitan Water District. An mga lider han mga ligal nga organisasyon in iginkakaw-ing ha iligal nga armado nga kagiusan ngan ginhihimo nga target hin likidasyon han militar komo kaparte han Oplan Kalinaw. Ha naglabay nga reaksyunaryo nga eleksyon, ginsikmit ha Leyte hadton Pebrero han mga ahente han military intelligence an mga aktibista han Bayan Muna nga hira Jacqueline Paguntalan ngan Rolando Fortaliza, nga padayon nga waray kahitatad-i kutob yana. Biktima hin Red-baiting ngan pananarhug han militar an mga progresibo nga party-list sugad han Bayan Muna ngan Anakpawis. Ha Tacloban City, an mga komunidad han mga kablas ha kasyudaran in permi natatarhug hin mga bayolente nga demolisyon, sugad han nahitabo ha 300 nga pamilya ha Brgy. Rimas Colon han naglabay nga Septyembre 27.

Tungod han pagbuksas han kanan militar panalapas han tawhanon nga katungod ngan mga kriminal ngan korap nga aktibidad hini, gin-initan han mga nangunguna nga upisyal han pasista nga militar an mass media ha rehiyon. Gintarhug mismo ni Maj. Gen. Glenn Rabonza, commanding general han 8th Infantry Division, an mass media ha publiko hin pira kabeses tungod han ira pagbabalita hiunong han rebolusyunaryo nga kagiusan, sugad man han ira tipatip nga pagbabalita han mga pangangabuso han militar. Ginpapakita hini nga mga higwaos nga may kapas an militar nga makaamot ha listahan han 12 nga mamamahayag nga ginpatay ha bug-os nga nasud yana nga tuig.

An waray-wantas ngan haluagan nga pananalapas han kanan katawhan katungod in mas urog nga nagduduso ha katawhan nga mag-urusa agud papagbaydon hin mahal an pasista nga republika ni Arroyo. Nakikighiusa an masa nga parag-uma ha iba pa nga mga demokratiko nga klase ngan sektor para depensahan an ira tawhanon nga katungod ngan ig-undong an ira demokratiko ng pakig-away para ha tuna. An mga tawo ha simbahan, mga abogado ngan iba pa nga aktibista nga nag-uundong han tawhanon nga katungod in mahugot nga nagkukundina han "gerra kontra terorismo" ngan terorismo han estado han rehimen nga Arroyo. Ginkukundina han katawhan Pilipino an pasista nga republika ni Arroyo para han pagsuporta hini han kanan US pan-kalibutan nga "gerra kontra terorismo" ngan han pagsusulsol han panginginlabot militar han US ha Pilipinas.

Padayon an pagsang-at han mga biktima han panalapas han tawhanon nga katungod ngan internasyunal nga makatawo nga balaud han ira mga kaso didto ha Joint Monitoring Committee (JMC) han NDFP ngan Government of the Republic of the Philippines. An JMC an gintuinan manginano han pagpapatuman han CARHRIHL. Kundi ginsasadhan han rehimen ni Arroyo an purtahan para han negosasyon pankamurayawan ha NDFP ngan ginpapa-pintas pa hini an "gerra kontra terorismo". Sanglit, diri hirayo nga magtikagrabe la an mga panalapas han tawhanon nga katungod ngan internasyunal nga makatawo nga balaud.

Kun igpadayon han pasista nga republika ni Arroyo an pangangatake ha mga katungod han katawhan, hiaagum ini han buhawi han pag-aalsa han katawhan nga ura-ura na an kangaralson tungod han nagtitikagrabe nga sosyo-ekonomiko nga krisis ngan korapsyon han naghahadi nga rehimen. An kanan katawhan pag-araba kontra han tinagdagko nga pagtalapas han ira mga katungod in mas urog la nga makakagpadagmit han pagbutho hin usa nga gamhanan nga kagiusan nga magpapalagpot kan Arroyo antes pa mahuman an iya termino. Kundi, pinaagi la ha mas hiluag nga partisipasyon ngan pagpapintas han gerra han katawhan mapapakyas an "gerra kontra terorismo." Ha pagrurumok la han naghahadi nga sistema pinaagi han nasudnon demokratiko nga rebolusyon nga may sosyalista nga perspektiba, hul-os nga matatagamtaman han masa han katawhan an bug-os nga lupgop han mga katungod pantawo ha balayan han usa nga bag-o nga sosyal nga kaayusan nga nag-gagarantiya hin hustisya, kamurayawan nga demokrasya. #

Para han kumpirmasyon, kontaka hi:
Roy Santos, NDF-EV Media Liaison Officer
Cellphone No. 0918-3112138