Aldaw ti lagip, rambak, ken dangadang

Simeon "Ka Filiw" Naogsan
Spokesperson
Cordillera Peoples' Democratic Front
an allied member of the NDFP
Abril 24, 2003

Nabara a rebolusyonaryo a kablaaw manipud iti Cordillera Peoples' Democratic Front kadagiti amin nga umili nga adda ditoy naindaklan nga Aldaw ti Kordilyera!

Napnuan pateg daytoy nga aldaw aldaw ti pananglagip kadagiti martir, aldaw ti panagrambak kadagiti nagun od a balligi, ken aldaw ti panangpasingked manen iti pakinakem tayo nga iyabante ti dangadang.

Iti daytoy nga aldaw, lagipen tayo dagiti naimbannuaran a martir a nangipaay ti ultimo a sakripisyo, nangidaton ti biag da para iti umili ken rebolusyon - manipud kenni Macliing Dulag a pinatay dagiti pasista a militar idi 1980, ken inggana itay nabiit, ni Isabelita del Pilar alias Ka Elvira a nagtignay idiay Abra ken Ifugao kas kameng ti New People's Army. Kadagdagsen ti Kordilyera ti pannakatay dagiti ipatpateg tayo a martir, gapu ta ti biag da ket awanan panagkedked a nagserbi kadagiti umili.

Iti daytoy nga aldaw, rambakan tayo dagiti balligi a nagun od ti tignayan ti umili ditoy Kordilyera. Umuna unay, pasaraboan tayo iti palakpak dagiti umili ti Lamag ken intero a Quirino. Pagwadan tayo ti urnos ken kinapinget da a mangilablaban iti kalintegan. Sumaruno, padayawan tayo ti naimbalitukan a balligi ti welga dagiti mangmangged ken empleyado ti Lepanto a nangpilay iti higante a korporasyon ti minas. Ditoy a nakita ti higante a bileg ti nagkaykaysa a panagtignay ti mangmangged a sinuportaan dagiti mannalon ti Mankayan ken dadduma pay a sektor iti syudad. Padayawan tayo met dagiti kameng ti KM Datako ken dadduma pay a kabataan estudyante a nagturong iti kaaw awayan tapno tumipon iti NPA. Selebraran tayo dagiti balligi ti tignayan ti mannalon. Agarup 50,000 umili ti nakagun od kadagiti pang-ekonomya ken pampulitika a benepisyo babaen kadagiti kampanya ken dangadang iti rebolusyonaryo a reporma iti daga. Bigbigen tayo ti dumakdakkel ti bilang dagiti titser, abogado, empleyados ti gobyerno, kameng ti simbaan, ken dadduma pay a propesyonal a tumiptipon ken sumupsuporta iti rebolusyon. Bigbigen tayo ti lumawlawa manen nga organisasyon dagiti pupungor, panglakayen, ken lider a binodngan.

Kagiddan dagiti balligi a nagun od ti rebolusyonaryo a tignayan ti umili, saluduan tayo met dagiti narimat a balligi a nagun od ti soldados ti umili iti tay ak ti armado a pannakidangadang. Nasurok 100% ti dimmakelan ti NPA. Naparegta met dagiti taktikal nga opensiba iti 88%. Ti bilang dagiti baryo a matigtignayan ti rebolusyon ket limmawa iti 50%. Ti bilang ti masa kadagiti rebolusyonaryo nga organisasyon ket dimmakel iti nasurok 100%.

Dagitoy a balligi ti nagkaykaysa a prente ken armado a pannakidangadang ket nagun od iti sango ti kumarkaro a nailian a panangidadanes kadagiti umili ti Kordilyera. Daytoy ti partikular a problema nga iyab ablat ti managgundaway ken manangidadanes a turay ti imperyalista ken komprador apo't daga kadatayo a nailian a minorya. Makita daytoy iti rumungrungsot a panagraut ti kabusor kadagiti il ili tayo babaen kadagiti proyekto kas iti dam ken minas a mangperdi ken mangagaw iti ansestral a daga ken kinabaknang tayo. Agmauyong ti kabusor nga agpampanunot kadagiti taktika tapno buraken ti integridad dagiti ili, klan, ken tribu. Daldalapusen na dagiti nainsigudan nga istruktura a sosyo politikal kas iti dap ay, ato, ken bodong. Us usaren na ti proyekto, IRA, eleksyon, ken tribal war tapno paglalabanen dagiti ili, baryo, ken tribu. Pagkwartaan na ti nainsigudan a kultura tayo babaen kadagiti festival ken proyekto a pangturista, ken isaksaknap na ti kinabulok ti burges ken pyudal a kultura. Agtultuloy ti diskriminasyon a maisaksaknap babaen iti masmidya, eskwelaan, ken simbaan. Gapu iti panagkurakot, barya latta ti dumandanon a pondo ken proyekto kadagiti baryo, ken maus usar pay ketdi a pangallilaw ken pangawis. Pilpiliten na ti umili nga ag CAFGU. Agrekrekluta iti Barangay Intelligence Network wenno BIN nga agsipsip ken agtraydor. Impauneg na ti CPLA iti AFP. Agipatpatakder ti nagadu a detachment. Agiwaywayat kadagiti terorista nga operasyon militar a mangdidigra kadagiti il ili ken manglabsing kadagiti pangtao a karbengan tayo.

Ngarud, napalalo a naluom ti panawen para iti panagabante ti rebolusyon iti nangatngato ken nadurdur as a tukad. Kasapulan a gammatan tayo dagiti adu a nakalukat a gundaway tapno mariing, maorganisa, ken mapatignay ti ginasut a ribu pay nga umili ti Kordilyera. Kasapulan ti ginasut pay a bilang ti kabataan ken estudyante a sumampa iti NPA. Kasapulan ti naparpardas ken aduan a panagorganisa kadagiti grupo ken komite a pangorganisa ti mannalon, kabataan, lallakay, ken kababaihan. Daytoy ket iti porma ti CPDF sel, komite, ken tsapter kadagiti baryo, tribu, ken komunidad. Agur uray ti panawen para iti napardas a pannakaibangon dagiti organo ti demokratiko a bileg pampulitika wenno ODBP nga agserbi kas bin i ti rebolusyonaryo a awtonomos a gobyerno ti umili.

Rimbawan tayo dagiti banag a makalapped iti panagkaykaysa tayo kas kadagiti tribal war, CAFGU, riri iti boundary, IRA, ken eleksyon. Rumbeng a risuten tayo dagitoy a risiris babaen iti nainkapyaan ken prinsipyado a wagas, saan a babaen iti ginnura ken binnusor nga isu't kayat ti kabusor. Kadagiti kakailian ken kakabagian a kameng ti AFP, PNP, ken CAFGU, agpampanawagan met ti CPDF, awisen tayo isuda a baliwan ti turong ti armas ken panunot da. Saan nga umanay ti bassit a sweldo wenno allowance a kasukat ti dara ken biag ti katribu ken kailian.

Babaen iti CPDF, reppeten tayo ti nalawlawa a panagkaykaysa ti umili. Daytoy ti kongkreto a pakakitaan ti panangitandudo ken panangsalaknib tayo iti kalintegan ti nailian a minorya para iti bukod a panagkeddeng - ti kalintegan tayo a siwayawaya a suroten ti bukod a panagdur as iti gimong, ekonomya, ken kultura, ken siwayawaya nga ikeddeng ti bukod a pulitikal nga istatus tayo.

Tapno maaddaan ti napatpateg pay a kaipapanan dagiti sakripisyo dagiti martir tayo, ikari tayo, isapata tayo, a petpetan dagiti prinsipyo nga inlablaban da, itultuloy tayo dagiti rinugian da, patibkeren ti nakem tayo, ipinget ti dangadang agingga iti pinal a balligi ti nailian a wayawaya, nailian a demokrasya, ken bukod a panangngeddeng!

Back to top