Mensahe sa Ika-35 Anibersaryo ng Bagong Hukbong Bayan

Gregorio Ba�ares
Tagapagsalita
National Democratic Front of the Philippines-Bicol
Marso 29, 2004

Nag-aalab na rebolusyonaryong pagbati at mahigpit na pakikipagkamay ang aming ipinaaabot sa mga kumander, mandirigma, at istap ng Bagong Hukbong Bayan sa pagdiriwang ng ika-35 Anibersaryo ng pagtatatag nito ngayong Marso 29.

Ang lahat ng mga pambansa-demokratikong pwersa sa kanayunan at kalunsuran, ang rebolusyonaryong baseng masa, mga alyado at kaibigan ng rebolusyon, at ang sambayanang Pilipino ay kapiling nyo sa pagpupugay sa mga tagumpay ng BHB sa nakaraang 35 taon ng maningning na pagsusulong ng digmang bayan.

Isang katotohanan ang malinaw na iginuguhit ng BHB sa bawat pahina ng kasaysayan - ANG BHB ANG TUNAY NA HUKBO NG BAYAN! Pinatutunayan ito di lang sa pahayag kundi sa araw-araw na rebolusyonaryong praktika sa piling ng masa.

Ang katotohanang ito ay umaani para sa BHB at rebolusyonaryong kilusan ng mataas na pagkilala at pagrespeto sa buong daigdig. Iwinawasiwas ng BHB ang sulo ng digma laban sa imperyalismo at lahat ng reaksyon at nagsisilbing inspirasyon sa aping mamamayan ng daigdig na tahakin ang landas ng armadong pakikibaka.

Sa gabay ng Marxismo-Leninismo-Maoismo at sa pamumuno ng Partido Komunista ng Pilipinas, ang mga platun ng ating hukbo sa Bikol ay umaani ng mga tagumpay sa pagsusulong ng iba't ibang larangan ng gawain. Malalim itong nakaugat at nakapwesto sa anim na probinsya at sa mayorya ng mga bayan sa Kabikulan.

Tumutulong ang BHB sa pagpupundar ng demokratikong estado ng mga manggagawa, magsasaka, at iba pang aping uri sa pamamagitan ng hakbang-hakbang na pagtatayo ng mga organisasyong masa at pagbubuo ng mga organo ng kapangyarihang pampulitika sa kanayunan.

Mabilis na umarangkada ang pagbubuo ng mga ganap na samahang masa (GSM) sa kanayunan at mabilis na dumami ang bilang nito sa nakaraang taon. Ang organisadong masa sa rehiyon ay umaabot sa ilampung libo habang ang baseng masa ay bumibilang ng ilandaang libong masa sa kanayunan at kalunsuran.

Kabilang sa mga tagumpay ng BHB sa rehiyon ang pagsasakatuparan ng rebolusyonaryong reporma sa lupa, ang implementasyon ng kapangyarihan sa rebolusyonaryong pagbubuwis, pagpapatupad ng rebolusyonaryong hustisya at police power, at pagtatanggol sa Demokratikong Gubyernong Bayan.

Epektibong nasasaklaw ng rebolusyonaryong reporma sa lupa ang ilampung libong ektarya at nabiyayaan ang libu-libong mga pamilyang magsasaka ng mga kampanya sa pagpababa ng upa sa lupa, pagpataas ng presyo ng kopra at palay, pagpapaunlad ng kooperasyon, produksyon at kabuhayan ng mga magsasaka.

Magiting na ipinagtatanggol ng ating hukbo ang mga tagumpay na nakamit sa pagtatayo ng rebolusyonaryong gubyerno at repormang agraryo sa harap ng mabangis na pananalakay ng 9th Orgullo Division at ng PNP. Matutunog at matatagumpay na mga taktikal na opensiba ang inilunsad ng BHB sa nakaraang taon at malakas na ininda ito ng mga kaaway sa rehiyon. Nakasamsam ito ng maraming armas at gamit-militar at nagdulot ng malaking pinsala sa tauhan at kagamitan ng AFP at PNP.

Matingkad na tagumpay ng BHB ang paggawad ng rebolusyonaryong hustisya sa pusakal na si Lt. Col. Ramon Claros na dating upisyal sa paniktik ng PNP. Si Claros ang namuno sa pagdukot at pagpatay sa mga aktibista noong Abril, 1989 sa Naga City, at siya ring utak sa paglaganap ng iligal na droga at kidnapping-for-ransom sa Naga City at Camarines Sur.

Malaking dagok sa berdugong AFP at PNP ang pagbihag at pangangalaga ng BHB sa dalawang POW na sina 1Lt. Ronaldo Fedelino at Pfc. Ronnel Leme�o ng 42nd IB-PA. Ipinapakita nito ang makatarungan at makataong patakaran ng rebolusyonaryong kilusan at maluwag na pagtrato sa mga bihag na kaaway at sa mahigpit nitong pagtalima sa internasyunal na mga batas tulad ng Protocol II ng Geneva Conventions at CARHRIHL.

Pinabubulaanan ng mainit na pagsuporta at pagtataguyod ng mamamayan sa BHB ang paratang ng rehimeng US-Macapagal-Arroyo at imperyalismong US na "terorista" ang PKP, BHB at si Kasamang Jose Maria Sison na Punong Konsultant ng NDFP. Sa katunayan, ang mga pinakamahuhusay na mga anak ng bayan ay nagboboluntaryong sumapi sa BHB at gumampan ng rebolusyonaryong tungkulin.

Ang NDF-Bicol at mga alyadong organisasyon nito ay mahigpit na nakikiisa sa BHB sa pagsusulong ng digmang bayan sa kanayunan. Isang patakaran nito ang paghikayat sa maraming aktibistang manggagawa at magsasaka, kababaihan at kabataang nakapag-aral para sumapi sa BHB. Pinag-iibayo ng NDF ang pakikibaka sa iba't ibang larangan ng gawain - armado, di-armado, propaganda, diplomasya at sa pagbubuo ng nagkakaisang prente para sa armadong pakikibaka.

Napakatindi ng krisis at kahirapang pinapasan ng mamamayan. Humihiyaw sila ng rebolusyonaryong pagbabago sa harap ng mapanlinlang at reaksyunaryong prosesong elektoral na ginaganap sa bansa. Humihiling sila ng rebolusyonaryong hustisya sa mga kaapihang nararanasan mula sa anti-mamamayan, anti-demokratiko, at papet na rehimeng Macapagal-Arroyo.

Napakalaking hamon sa ating hukbo na patindihin ang pakikidigmang gerilya sa rehiyon at mag-ambag sa pambansang panawagang isulong ang digmang bayan sa mas mataas na antas. Kailangang patindihin ang pagsasagawa ng makakayanan at maipagtatagumpay na mga taktikal na opensiba laban sa mga batalyon ng AFP at mga sagadsaring elemento ng PNP at CAFGU, habang patuloy na inaasikaso ang lahatang-panig na gawaing pampulitika, pang-ideolohiya, at pagpapalakas sa organisasyon.

Tanging sa rebolusyonaryong pamamaraan lamang tunay na mapaglilingkuran ang sambayanan. Kung walang Bagong Hukbong Bayan, wala ni anuman ang mamamayan!

Nananawagan kami sa buong sambayanang Pilipino na itaguyod, pakamahalin, at palakasin ang BHB na tunay na hukbo ng bayan!

Ipadagos an armadong paglaban sagkod sa kapangganahan!

Mabuhay ang rebolusyong Pilipino!#

Back to top