PAKUSGON PA ANG PAKIG-AWAY!

National Democratic Front of the Philippines-Mindanao
Marso 29, 2003

Sa ika-34 nga anibersaryo sa pagtukod sa Bagong Hukbong Bayan, ang mga rebolusyonaryong pwersa sa Mindanao nagduyog sa uban pang mga pwersa sa tibuok nasud sa pagpadangat og pagtimbaya sa mga Pulang kumander ug manggugubat sa BHB sa ilang mga kadaugan nga nakab-ot sa pagpaasdang sa demokratikong rebolusyon sa katawhan.

Gihatag usab nato ang hataas nga pasidungog sa atong mga rebolusyonaryong martir ug bayani kinsa inspirasyon aron dugang pang pakusgon ang atong pakigbisog.

Ang Bagong Hukbong Bayan nga gitukod sa Partido Komunista sa Pilipinas niadtong Marso 29, 1969 mao ang nag-unang organisasyon sa paglunsad sa armadong pakigbisog aron lumpagon ang gahom pangpulitika sa mga mapahimuslanon ug madaugdaugong hut-ong ug tukuron ang demokratikong gobyerno sa katawhan.

Sukad sa pagkatukod sa BHB, nakakab-ot kini og dagkong mga kadaugan. Gikan sa halos wala, midako kini ngadto sa pila na ka libo ang ginsakpan karon. Gikan sa usa lang ka probinsya sa Tarlac, naabot na ang dakung mayorya sa mga probinsya sa tibuok Pilipinas.

Gi-asdang sa BHB ang malungtarong gubat sa katawhan batok sa nagharing sistema sa dagkong burgesya-kumprador ug agalong yutaan nga gidominahan sa imperyalismong U.S.

Sukad usab sa Ikaduhang Bantugang Kalihukang Pagtul-id, nasalikway sa BHB ang grabeng mga kasaypanan sa "Wala" ug Tuo nga oportunistang linya. Bunga niini, milig-on ug milapad ang iyang pwersa ug baseng masa, ug napakusog ang mga taktikal nga opensiba aron pahuyangon ang kaaway. Sa tibuok nasud, ang BHB mapadayunong naga-ani og mga bulawanong kadaugan sa pagpaasdang sa rebolusyonaryong kalihukan.

Dinhi sa Mindanao, ang mga pwersa sa BHB sa isla mitampo usab og dako niining mga kadaugan. Ang mga yunit sa BHB naglihok karon sa 19 ka probinsya ug sa kapin 200 ka lungsod ug syudad niini. Aduna karon 35 nga nagtunhay nga mga natarang gerilya, ug padayon pa kini nagkalapad ug nagkadaghan. Mokabat sa pila ka libo ang mga baryo nalihukan ug kapin gatos ka libo ang masa kinsa ubos ug impluwensyado sa Pulang panggamhanan. Itandi sa miaging tuig, ang mga baryong gilihukan mitubo og 36 porsyento ug ang organisadong masa nadugangan og pipila ka libo. Niini nga mga lugar gipatuman sa BHB ang mga lagda sa demokratikong gobyerno sa katawhan ug gipanalipdan ang interes sa katawhan batok sa pagpanglupig sa mga pasistang tropa sa reaksyonaryong kaaway.

Ang mga taktikal nga opensiba sa BHB sa Mindanao miabot og kapin 100 sa miaging tuig ug nadugangan ang atong mga tag-as og kalibre nga armas sa hapit 200. Ang pinakaulahi nga mga opensibang aksyon mao ang reyd sa armori sa Paper Industries Corp. of the Phils. (PICOP) didto sa Bgy.Mangagoy, Bislig City, Surigao del Sur niadtong Marso 21. Gilunsad kini sa hiniusang mga pwersa sa BHB sa duha ka natarang gerilya sa F20, Southern Mindanao Region ug sa F14, Northeastern Mindanao Region. Nakakuha dinhi og 92 ka tag-as og kalibre nga armas ug daghang mga bala. Kini ang kinadak-an sa tibuok nasud nga nakuha sa BHB sa miaging usa ka tuig. Nahauna niini dinhay ubang pang mga dagkong opensiba nga nalunsad sa ubang mga lugar, sama sa: reyd sa Kapitolyo sa Mati, Davao Oriental niadtong Disyembre 2002, nakakuha og 7 ka HPR; ambus sa Talaingod, Davao del Norte niadtong Pebrero 2003 batuk sa usa ka kumpanya sa 72nd IB-PA, nakakuha og 9 ka HPR; reyd sa Talacogon, Agusan del Sur niadtong Pebrero, nakakuha og 10 ka HPR; reyd sa munisipyo sa Carmen, Agusan del Norte, nakakuha og 9 ka HPR; reyd sa Maco, Compostela Valley niadtong Septembre 2002, nakakuha og 27 ka HPR ug daghang mga bala. Gawas niini dinhay uban pang mga malampusong aksyong militar sa uban pang mga natarang gerilya nga nakakuha og pila ka armas ug mga bala. Aduna usab gilunsad nga mga aksyon sa pagpahamtang og rebolusyonaryong hustisya ngadto sa mga tawong may utang og dugo sa rebolusyon ug sa katawhan.

Kini nga mga kalampusan dugang mipalig-on sa armadong kusog sa BHB. Gikalipay kini pag-ayo sa mabagang masa sa katawhan tungod kay ang ilang hukbo padayon nga nagkakusog.

Gipatuman usab sa BHB ang pagpaasdang sa agraryong rebolusyon sa kabukiran ug gikalipay kini sa katawhan. Malampusong nalunsad sa miaging tuig sa daghang mga natarang gerilya sa Mindanao ang nagkalain-laing matang sa antipyudal nga mga pangmasang pakigbisog, sama sa pagpataas sa suholan sa uma, pagpakunhod sa abang sa yuta, pagpataas sa presyo sa produkto sa uma, ug uban pa. Miabot og liboan ka lumulupyo sa tibuok Mindanao ang nakagamtam og mga kaayohan bunga niini. Sa Northcentral Mindanao, sa kapin 30 ka baryo nga nalunsaran og pakigbisog, miabot og 3,672 ka tawo ang direktang nabulahan. Sa Northeast Mindanao, sa kapin 30 ka baryo nga nalunsaran, miabot og 5,558 ka tawo ang nabulahan. Sa Southern Mindanao, sa pangrehiyong kampanya kalabot sa kopras, dinhay pangmasang mobilisasyon sa 71 ka baryo sa 14 ka lungsod ug gisalmotan sa liboan ka masa. Naa usab lokal nga mga antipyudal nga pangmasang pakigbisog nga nalunsad; sa dili kompletong datos, dinhay nalunsad sa 13 ka baryo ug nabulahan ang 2,550 ka tawo. Ug sa Western Mindanao ug Farsouthern Mindanao aduna usab ubay-ubay nga baryo ang nalunsaran sa pila ka pangmasang aksyon ug ubay-ubay ka masa ang nabulahan.

Bunga niini, ang BHB sa Mindanao, sama sa ubang dapit sa nasud, padayon nga midako ug mikusog. Miabot na og pila ka libo ang atong mga Pulang manggugubat, mitubo kini og 20% gikan sa miaging tuig. Midako ang mga armadong yunit pangpropaganda ug miusbaw ang gidaghanon sa mga nag-unang yunit gerilya sa mga natarang gerilya ug rehiyon. Ug padayon nga milambo ang teknik ug mga taktika niining mga yunit gerilya. Gipakita kini sa mga malampusong taktikal nga opensiba batok sa mga tropa sa kaaway. Ug bisan sa mga depensibang aksyon dinhay daghang higayon nga makaagaw kini og inisyatiba gikan sa mas dako ug kusgan nga kaaway. Nagpakita kini sa nagauswag nga kahanas sa mga Pulang kumander ug manggugubat sa BHB ug sa hugot nga suportang masa.

Kining mga napakita sa ibabaw pila lang sa mga kadaugan nga nakab-ot. Taas pa ang listahan sa uban pa nga mga kalampusan nga nahimo sa BHB sa pag-alagad sa katawhan ug pagpaasdang sa rebolusyon.

Busa, kining adlaw karon sa kasumaran sa pagkatukod sa BHB gikalipay kaayo nato ug sa katawhang Pilipino. Ang pagkusog sa BHB pagkusog usab sa pakigbisog sa katawhan nga buot molingkawas gikan sa kaulipnan niining semikolonyal ug semiipyudal nga sistema nga naglubong sa katawhan sa kangitngit ug walay pag-uswag sa panginabuhian ug sa kinabuhi mismo.

Samtang nagkakusog ang BHB ug uban pang mga rebolusyonaryong pwersa nga gipangulohan sa Partido Komunista sa Pilipinas, tataw nga nahiagom og grabeng krisis pang-ekonomiya ug pangpulitika ang nasud bunga sa pagka-itoy ug pagkabangkarote sa rehimeng US-Macapagal Arroyo. Tataw usab ang grabeng krisis sa imperyalismong U.S. nga pila na ka tuig naigo sa krisis pang-ekonomiya ug kasamtangang labawng gikasilagan sa mabagang masa sa katawhan sa tibuok kalibutan bunga sa gubat agresyon niini sa nasud Iraq.

Ang rehimeng US-Macapagal Arroyo samot nga nahimulag sa katawhan. Bunga kini sa dugang pagpaantos nga ginahimo niini ngadto sa katawhan pinaagi sa pagpatuman sa liberalisasyon, deregulasyon ug denasyonalisasyon nga mipaunlod sa panginabuhian sa masang kabus ug bisan sa mga gagmay ug hatungang mga negosyante. Gitulisok usab ang rehimen sa pagsunod-sunod niini sa mga lihok ug mando sa rehimeng Bush sa U.S. ilabina niining gubat pagpanulong nga gihimo sa U.S. sa Iraq.

Ug ang amo sa rehimeng Macapagal-Arroyo nga mao ang imperyalismong U.S. padayong nagasinati sa krisis sa sobrang produksyon nga nagbunga sa pila ka milyon ka tawo nga nawad-an og empleyo ug liboan karon ang mga tawong walay balay sa U.S. mismo. Gipaantos usab ang katawhang Amerikano sa pagpamig-ot sa ilang mga katungod sibil nga gipatuman sa Patriot Act sa US. Dugang pa niini, ang ginahimo karon sa US nga dili-makatarunganong pakiggubat sa Iraq tin-aw kaayo nga pagyatak sa kaugalingnan sa katawhan ug nasud Iraq. Kini karon kusog nga gikondena sa minilyon nga mga katawhan sa tibuok kalibutan ug sa mayorya sa kanasuran sulod sa United Nations. Sa US, Britain, Spain, ug daghang pang kanasuran, kaylap karon ang minilyong mga pangmasang mobilisasyon pagbatok niining pagpanulong sa US nga walay laing tuyo kundili ang pagkontrol sa lana sa Iraq ug Middle East. Dugang nga mipatataw kini sa kinaiya sa imperyalismo.

Subay niining pangkinatibuk-ang kahimtang sa sulod ug gawas sa nasud, alang sa BHB dinhi sa Mindanao, sa pagsulod sa bag-ong tuig sa iyang armadong pakigbisog, pakusgon pa niini ang pakig-away aron motampo sa kinatibuk-ang paningkamot sa nasudnong organisasyon sa BHB sa pagpaasdang sa armadong pakigbisog aron lumpagon ang nagharing sistema sa katilingban. Ipursige sa BHB ang pagpalapad ug pagpalig-on sa iyang pwersa. Ipakaylap ug pakusgon niini ang mga taktikal nga opensiba. Palapdon niini ang iyang baseng masa ug hugtanong ipatuman ang agraryong mga pakigbisog ug uban pang mga kalihukang masa nga mopauswag sa interes sa mabagang masa sa katawhan. Pakusgon usab niini ang pakighiusa sa uban pang mga pwersa nga nagbatok sa kasamtangan nga rehimeng US-Macapagal Arroyo ug sa nagharing sistema.

Ang BHB sa pagpangulo sa Partido Komunista sa Pilipinas dili mohunong sa pakigbisog hangtud nga makab-ot ang tinuod nga kagawasan ug demokrasya sa nasud. Ang BHB mao ang tinuod nga hukbo sa katawhan nga manalipod sa ilang interes.

Busa, sa pagsubli, pakusgon pa nato ang pakig-away batok sa mga madaugdaugon ug mapahimuslanong hut-ong. Nagtunhay ang mga sukaranan para ipatuman kini, ug kinahanglan nga hugot huptan kini nga awhag. Gina-awhag usab namo ang mga nagpakabana sa kaayohan sa katawhan ug sa nasud nga dugang suportahan ang armadong pakigbisog nga ginalunsad sa atong hukbo.

Mabuhay ang Bagong Hukbong Bayan!

I-asdang ang rebolusyon!

Mabuhay ang katawhang Pilipino!###

Back to top