CAFGU RONNIE MIBULOS NAAMBUSH-PATAY SA NAG-OPE NGA 58TH IB, GIPASANGIL SA NPA

Maria Malaya
Tigpamaba
NDF-Amihanan Sidlakang Mindanao
(Northeastern Mindanao)
Abril 18, 2004

Abril 11, 2004, nag-operisyon ang mokabat sa 30 ka tropa sa 58th IB sa walay pagrespeto sa pagsaulog sa mga Kristyanos sa Adlaw sa Pagkabanhaw. Alas 4 sa kaadlawon nakit-an sa mga tagibaryo ang mga sundalo nga mipaingon sa bukid sa Mabahin ug Matho. Samtang sa maong adlaw si Cafgu Ronnie Hibulos, alas 5 sa buntag uban sa iyang siete anyos nga anak nga lalaki miadto sa bukid sa Lubcon 1, Mabahin, Cortes. Ang mag-ama mangati og alimokon ug manok ihalas nga nagsul-ob og fatigue uniform si Cafgu Ronnie. Sa pag-abot nila sa duol sa busay gipabuthan sila. Nakadagan ang bata ug nagpahibalo sa nahitabo, nangayo og tabang sa iyang kaparyentehan ug mga silingan. Alas 6 sa buntag nangabot na ang mga silingan sa nahitabuan nga patay na si Ronnie ug wala na diha sa lugar ang nag-ambus. Ilang gitan-aw ang giposisyonan ug natantya nila nga mokabat sa trenta ka tawo ang nag-ambus. Ang nahitabuan mga tunga ra sa kilometro gikan sa highway. Sa maong buntag gihapon, nakit-an sa pipila ka tagibaryo nga gisugat sa 6x6 ang 58th IB nga nag-ope gikan sa bukid. Nagdali kini sa pagsakay.

Sumala sa awtopsiya, duha lang ka bala ang igo ni Ronnie: bala sa M14 ug M16. kini si Ronnie gitambagan sa iyang ginikanan nga dili moadto sa bukid kay naay operisyon sa military.

Apan sa pagkapetsa 17, Abril 2004, Sabado, gipasiatab na sa tigpamaba sa 58th IB nga gi-ambush-patay sa NPA si Ronnie sa wala kunoy pagrespeto sa Domingo sa Pagkabanhaw. Sa pagka-domingo na usab, nagsabwag kini og pamahayag nga gipasangil sa NPA ang nag-ambus kang Ronnie.

Alang sa pamilya ni Cafgu Ronnie gikasubo namo nahitabo nga giunay siya sa tropa sa 58th IB. Ang labing nakapasubo mao ang wala pag-angkon sa dakung sayop sa 58th IB. Mao kini ang dakung leksyon sa mga Cafgu ug bisan sa pipila ka elemento sa AFP, PNP nga pwede ra gyud ipakawalay-bili ang kinabuhi ug ilimod. Makapaubos kini sa morale sa mga Cafgu ug sa sulod sa AFP mismo. Tataw kaayo ang pagkabakakon ug paggamit sa pangilad bisan sa tataw nga panghitabo. Walay pagpanagana sa pagpamakak bisan nakahibalo sila nga tubagon sila sa NDF. Tin-aw nga paglapas kini sa Protocols of War. Walay katakos nga mosukol si Ronnie kay walay pusil ug naa pa man gani kuyog nga anak nga siete anyos.

Ang awhag namo ngadto sa pamilya ug mga tagibaryo nga moreport sila sa Joint Monitoring Committee sa NDF o sa GRP. Pwede kini kung sa JMC-NDF sila moadto, ipaagi lang sa lokal nga Karapatan office kay kining Karapatan office gitudlo sa JMC-NDF isip kabahin sa lokal monitoring sa mga kalapasan sa CARHRIHL nga gipatuman na karon human sa kasabutan sa NDF ug GRP didto sa Oslo, Norway.