Pagsilot sa Filipinas Palm Oil, Inc (FPPI)

Maria Malaya
Tigpamaba
NDF-Amihanan Sidlakang Mindanao
(Northeastern Mindanao)
Hulyo 31, 2003

Ang rebolusyonaryong kalihokan misilot sa Filipinas Palm oil, Inc. (FPPI) tungod sa paglapas niini sa palisiya sa rebolusyonaryong buhis. Ang silot gipatuman sa usa ka yunit sa Ka Bob Ruiz Komand sa Front 14, Northeastern Mindanao Region sa NPA pinaagi sa pagsunog sa Upat (4) ka farm tractor ug pagkompiska sa 6 ka motorsiklo ug 6 ka VHF radio. Ang aksyong pagsilot gihimo didto sa Brgy. Cabantao, Rosario, sa Agusan del Sur kaniadtong Hulyo 17, 2003.

Ang FPPI mao ang kanhi NDC-Guthrie, nga kontrolado sa British-Malaysian multinasyonal nga korporasyon, usa sa mga higanteng monopolyo sa palm oil sa tibuok kalibotan. Sukad sa sayong bahin sa dekada 80 hangtud karon, namonopolyo niini ang kapin sa 8,000 ektaryang kayutaan sa Agusan del Sur pinaagi sa pagpangilog og kaayutaan gikan sa mga mag-uuma ginamit ang mga bangis nga armadong pundok sa "Lost Command" ni Col. Carlos Lademora. Aron maabog ang mga masa gikan sa ilang kayutaan ang "Lost Command" namugos sa mga masa sa pagbaligya nga barato sa ilang kayutaan, midaut sa mga tanom, nanghulga, namun-og, nangreyp sa mga kababayen-an ug mipatay ug mimasaker sa mokapin sa usa ka gatos ka masa. Kining "Lost Command" mao usab nga pundok ang nagmasaker sa daghang masa sa Las Navas, sa probinsya sa Samar niadtong ulahing bahin sa dekada 70.

Hangtud karon nagpabiling bangis kining FPPI ngadto sa mga trabahante ug padayong mihikaw sa hustisya ngadto sa mga giiloga'g yuta ug mga biktima niini sa tanang matang sa kabangis. Nagpabilin usab ang mga dili makatarunganong kondisyon niini sa pag-abang sa yuta sa mga gagmayng mag-uuma. Samtang padayon kining nagapahimulos ug nagahakop og dagkong ginansya gikan sa kahago sa mag-uuma ug mamumuo sulod sa teritoryo sa NDF, sa pikas nga bahin nagmagahi kini sa pagbayad sa rebolusyonaryong buhis ngadto sa rebolusyonaryong kalihokan.

Angayan lamang nga batukan sa rebolusyonaryong kalihokan ug sa katawhang Pilipino ang ilang paghari. Busa, hagit sa katawhan ang pagbutyag ug pagbatok ning mapahimuslanon ug ahente sa imperyalista hangtud nga maangkon sa katawhan ang tinuod nga repormang agraryo.

Nagpahimangno ang NDF-NEMR ngadto sa tanang negosyante ug agalong yutaan nga morespeto sa pulitikanhong gahum sa rebolusyonaryong kalihokan ug motuman sa palisiya sa rebolusyonaryong pamuhis aron dili mapahamtangan sa silot sama sa nahiagoman sa FPPI ug ubang nagmagahing mga kompanya.