NDF-WMR Mikondenar Kang Misamis Occidental Gov. Ocampos

Adan Sindapan
Spokesperson
National Democratic Front-Western Mindanao
Pebrero 28, 2003

Gikondenar sa National Democratic Front sa Kasadpang Mindanao pinaagi sa tigpamaba niini nga si Ka Adan Sindapan ang pamahayag ni Misamis Occidental Gov. Leo Ocampos nga "bukas siya sa pagdawat nga sa lalawigan ilunsad ang Balikatan 03-1". Kini nga pamahayag sa gobernador pagailhon sa NDF-WMR nga usa ka "paghagit" sa rebolusyonaryong kalihokan nga gipangulohan sa Communist Party of the Philippines. Gisaway sa NDF-WMR si Ocampos sa pagpakabuta-bungol sa kaylap nga panawagan sa nagpakabanang mga sektor batok sa armadong pagpanginlabot sa mga langyaw'ng tropa sa pangsulod nga suliran sa nasud.

Sumala kang Sindapan, gilimbongan lamang ni Gov. Ocampos ang iyang kaugalingon, kun moingon siya nga ang pagsumpo sa MILF mao ang nag-unang konsiderasyon sa interes nga imbitahon ang mga tropang Amerikano dinhi sa Misamis Occidental. Nasayod ang kadaghanan nga sa lalawigan sa Misamis Occidental, ang CPP-NPA lamang ang bugtong rebolusyonaryong pundok nga nangulo sa usa ka armadong kalihokan alang sa paglingkawas sa katawhan ug aktibong nakigsangka batok sa kasamtangang reaksyonaryong kagamhanan ug kasundalohan, sumala sa tigpamaba sa NDF-WMR. "Matngon ang mga rebolusyonaryong pwersa sukad pa kaniadto nga pasumangil lamang ang Abu Sayyaf aron direktang makasulod dinhi sa Mindanao ang mga imperyalistang tropa sa US ug ang tinuod nga target mao ang New People's Army ug Moro Islamic Liberation Front", gisubli sa tigpamaba sa NDF-WMR.

"Ang gipadayag ni Gov. Ocampos kalabot sa iyang pag-uyon sa Balikatan 03-1 posibleng usa ka lakang aron makakabig og pabor gikan sa Malakanyang alang sa 2004 nga eleksyon", gipunting ni Sindapan. Apan, sumala sa tigpamaba sa NDF-WMR, angayan hinumdoman ni Gov. Ocampos nga kun buot niyang makakabig og gamhanang suporta dili niya angay isalikway ang pangindahay sa katawhang nangandoy sa tinuod nga kagawasan, kalinaw ug demokrasya.

Gipasidaan ni Sindapan nga, "mahimong politikanhong tulobagon ni Gov. Ocampos ngadto sa katawhan ang iyang gipadayag nga pagpaluyo sa US troop deployment." "Kaylap ang pagbabag sa mga katawhan sa pagpanginlabot sa mga Amerikano sa pangsulod nga hisgotanan sa Pilipinas. Ang mga progresibo ug makinasudnon siguradong dili makauyon sa posisyon ni Ocampos.", nagkanayon si Sindapan.

Gipahimangno ni Sindapan nga dili dapat magpadala si Gov. Ocampos sa laraw nilang Defense Sec. Reyes ug Gloria Macapagal-Arroyo nga nagtuong pinaagi sa ayuda sa mga imeryalistang tropang Amerikano molampos ang ilang kontrarebolusyonaryong kampanya batok sa NPA. "Nasayop ang rehimeng Macapagal-Arroyo sa pagtuo nga mahudlat ug mapukan niini ang rebolusyonaryong kalihokan pinaagi sa pagpakitabang sa mga tropang Amerikano. Masayop usab si Gov. Ocampos kun motuo siya sa gituohan sa rehimen."

Gipunting ni Sindapan nga naut-ot ang popularidad ug nahimulag si Gloria Macapagal-Arroyo gumikan sa hugtanong pagpaluyo niya sa kontra-katawhan ug kontra-nasudnong mga laraw sa US sama sa makauulaw nga pagtuboy sa pagpanulong sa US sa Iraq ug pagbalewala sa hinanaling mga mulo sa katawhan. "Ang tinuod nga repormang agraryo lamang ug dili ang teroristang mga kampanya sama sa Balikatan ang makahatag og katagbawan sa diskontento sa katawhan. Hangtod dili makab-ot sa katawhan ang tinuod nga kasulbaran sa ilang batakang mga suliran dili mahunong ang armadong pakigbisog alang sa katilingbanong kausaban", kini ang gipadayag sa tigpamaba sa NDF-WMR.

"Kun nagtinguha si Gov. Ocampos nga mosaka ang iyang popularidad alang sa iyang politikanhong ambisyon", nagkanayon ang NDF-WMR spokesperson, "nan, angayan siyang makig-alayon sa mabagang katawhan sa Misamis Occidental ug dili sa mga pasistang utok-pulbora sama sa pundok nilang Reyes ug Macapagal-Arroyo." Gisugyot sa NDF-WMR spokesperson nga kun buot ipakita sa gobernador ang iyang pagpakabana sa katawhan, dapat niyang suportahan ang mga pangayo sa mga mag-uuma nga maoy mayoriyang hut-ong sa lalawigan ug isalikway ang mga militaristang laraw sama sa Balikatan nga walay laing hasngan kundili ang mga sibilyang mag-uuma. ###

Back to top