Tumindog para ha kalibrehan ha pamamahayag ngan tipahan an panggigipit han militar

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Oktubre 07, 2004

Ginsusuportahan han NDF-Eastern Visayas an independensya han masmidya ha rehiyon ngan hugot nga ginkokondenar hi Maj. Gen. Glenn Rabonza ha pag-atake ha mga taga-midya nga umatender han NDF-EV press conference han Abril komo �nakikigsayaw ha kaaway.� Urog pa nga ginduduso nira Rabonza ngan Maj. Neneveigh Alconvindas, hepe han civil relations han 8th Infantry Division, an pananarhug ha pagdemanda nga diri angay makigkomunikar an masmidya ha mga �kaaway han estado.� Dapat hira mangaro hin dispensa ha mga nadadabi nga taga-midya, umundang ha pagpoypoy han kalibrehan ha pamamahayag, ngan kilal-on nga an mga katungod han mga sibilyan in labaw han militar.

Ginsusung-an la han sugad nga arogante nga pamomostura han 8th Infantry Division an kangaralson han masmidya ha pamumugong han kalibrehan ha pamamahayag ngan ha peligro ha kinabuhi han mga mamamahayag. Regular nga ginpapatuman han Malakanyang ngan mga aada ha poder nga dagko nga pulitiko, dagko nga negosyante ngan nangunguna nga upisyal-militar an pagsensura ha pamamahayag. An pagsensura mismo ha ranggo han mga reporter, editor ngan komentarista in ginpapatuman han mga kapitalista nga tag-iya han mga establisimyento han midya ha pakigkunsabo o tungod han presyur hadton aada ha poder. Iginlalabay an mga kaso hin libelo ha mga mamamahayag nga nagbubuksas han korupsyon, panhuhuthot, kabangisan ngan iba pa nga mga krimen ha katawhan. Gindudunot liwat han mga madumagko ngan poderuso an masmidya pinaagi han panunuhol para hin paborable nga publisidad ngan pagbirikis han kamatuoran pabor ha ira. Pinakamaraut ha ngatanan, sobra 50 nga mamamahayag na an ginpanmatay ha Pilipinas tikang 1986 ngan usa an nasud ha may pinakahitaas an ihap hin mga ginpatay nga personahe han midya.

Naduyog an kanan militar paghuhugot ha masmidya ha kanan rehimen Arroyo pagpapapintas han pampulitika nga pamomoypoy ha butnga han sosyo-ekonomiko nga krisis. Desperado an reaksyunaryo nga gubyerno nga gipiton an katawhan nga nakakareyalisar na nga an rebolusyonaryo nga solusyon an amo la an kasolbaran ha kakablasan ngan kawaray-gahum. Sanglit ha ira kontra-rebolusyonaryo nga gerra, gin-gagamit liwat han militar an mga ahensya han sibilyan nga gubyerno ngan bisan an masmidya agud ikondisyon an katawhan ngan pahugpuyon an ira pag-ato. Ini nga mga sikolohikal nga operasyon ha �pagkabig han kasing-kasing ngan hunahuna� in segurado nga mapapakyas tungod han diri-matatahuban nga reyalidad nga an rehimen Arroyo in kontra-katawhan, korap, maka-imperyalista ngan diri nakakahatag han mga batakan nga serbisyo sosyal ngan diri nakakasolbar han presente nga krisis.

Bumunyog man o diri an sibilyan nga gubyerno ngan an masmidya ha ira, pursigido an militar ha pagsabrag han kabangisan han estado kontra ha katawhan ngan ha midya, ngan ha pagbayolar han mga kagawasan-sibil sugad han kalibrehan ha pamamahayag. Ginpamatud-an ini dida han kahibuksas hadin Agosto han militarisasyon ha Basey, Weste Samar nga nagresulta ha damo nga panalapas han tawhanon nga katungod; bisan an kabataan in gintarhug han mga pasista nga sundalo. An katawhan, munisipal nga gubyerno ngan an masmidya in nagkaurusa ngan hugot nga nagkondenar ha 46th Infantry Battalion ha paglansar hini hin haluagan nga operasyon militar nga nagbayolar han mga katungod han mga sibilyan ngan hin waray bisan ano nga pagsarit ha mga sibilyan nga upisyal. Prinsipal tungod han makusog nga pagtipa han iba-iba nga sektor, iginpabalhin an 46th IB ha Bohol.

Ginpapanawagan namon ha masmidya ha rehiyon nga tumindog para ha kalibrehan ha pamamahayag ngan tipahan an panggigipit han militar. Waray obligasyon an midya ha militar lugod mayda moral nga obligasyon ha katawhan nga ipahibaro an kamatuoran. Ha atubangan han kanan rehimen Arroyo nagkukusog nga pamomoypoy ngan han kanan militar madarahug nga pamomostura, an katawhan, an masmidya ngan an iba pa nga sektor in kinahanglan magkaurusa agud ha gilayon ibuksas an mga bayolasyon ha kalibrehan ha pamamahayag ngan kagawasan-sibil ngan pakyason an mga pag-aatentar nga ig-imposar an balaud militar.#

Para ha kumpirmasyon, kontak kan:
Roy Santos, NDF-EV Media Liaison Officer
Cellphone No. 0918-3112138
E-mail: [email protected]

Back to top