Ang gihinganlan nga 10-ka-puntong adyenda ni GMA makapasilag nga talaan sa mga bakak

Prof. Jose Ma. Sison
National Democratic Front of the Philippines
Chief Political Consultant
Hulyo 07, 2004

Midangat kanako ang impormasyon nga ginapakaylap sa mga propagandista ni Gloria Macapagal-Arroyo ang kataw-anang bakak nga gisuportahan nako ang gihinganlan nga 10-ka-puntong adyenda ug sa ingon gisuportahan usab nako ang iyang malimbongon nga pagdaog sa eleksyon isip presidente sa reaksyonaryong gobyerno sa dagkong komprador ug agalong yutaan.

Ang pinakamaayong pamaagi aron tubagon ang ingon niining dili katuohan nga bakak mao ang pagbutyag sa kamatuoran nga ang gihinganlan nga 10-ka-puntong adyenda makapasilag nga talaan sa mga bakak ug ipatin-aw nganong binakak ang matag punto niini.

1. Dili makamugna og unom ka milyong trabaho ang rehimeng Macapagal-Arroyo sulod sa unom ka tuig. Bangkrap ang reaksyonaryong gobyerno. Padayon nga nagtiurok sa krisis ang ekonomiya busa wala kaayo kini'y ma-eksport nga igo nga mokita'g kwarta nga produkto ngadto sa pangkalibutang merkado. Modako ang mga depisit sa badyet ug pamatigayon. Labaw pang mobug-at ang bug-at na kaayong palas-anon nga langyaw ug lokal nga utang. Ang unsamang utang padayon nga pahimuslan lamang sa mga langyaw'ng monopolyong negosyo ug dagkong komprador ug dili sa gagmay ug hatungang mga negosyo. Anaay usa o duha ka milyong hektarya nga ihatag sa mga langyaw ug lokal nga korporasyon sa agrikultura bugti sa kadaot sa mga mag-uuma nga walay yuta ug uban pang lumulupyo.

2. Dili makagahin og igo nga ihap sa mga bag-ong bilding, klasrum, desk, lingkuranan, libro ug scholarship alang sa mga estudyante tungod kay ang prayoridad nga pundohan sa bangkrap nga reaksyonaryong gobyerno mao ang militar, kapulisan, mga serbisyong paniktik, mga prohekto nga nahitak sa anomalya ug ang pagpamalit og mahalon nga mga awto ug kagamitan sa opisina alang sa kadagkoang burukrata.

3. Dili gayud mabalanse ang badyet. Padayon nga modako ang depisit tungod sa mga prohektong lukop sa anomalya. Apan ang mga katilingbanong serbisyo, ilabina sa edukasyon, panglawas, tubig, kuryente ug uban pa, padayon nga mahikawan og igo nga pundo ug kahinguhaan.

4. Dili molambo ang "desentralisasyon" tungod sa grabing krisis ug pagkabangkrap sa reaksyonaryong gobyerno. Padayon nga madunot ang imprastrakturang pangtransportasyon, ilabina ang pederod (gagmay'ng karsada). Molapad ang "digital gap" (gintang sa teknolohiyang elektronik) kundiin ang mga tigpahimulos makabaton og sobrang mga kahimanang digital samtang ang naghagong masa pugngan pagpadayag sa ilang mga mulo ug hangyo.

5. Dili mahatagan og serbisyong kuryente ug suplay sa tubig ang mga barangay sa tibuok nasud. Namakak ang rehimen kalambigit niini. Ginalubog sa rehimen ang palisiya niini sa pagpraybitisa sa suplay sa kuryente ug tubig ug ang kamatuoran nga padayon nga gipataas ang singil niini sa mga monopolista sa enerhiya ug tubig. Gitugotan sa rehimen ang mga imperyalistang tigsuplay og enerhiya ug ekwipo nga kontrolon ang sistema sa kuryente ug tubig ug yatakan ang katawhan. Gitugotan usab niini ang US, British ug Dutch nga mga kompanya sa lana nga manag-iya sa 90% sa nga kahinguhaang lana ug gas ug mga pipeline sa Malampaya ug gitugyan na sa rehimen ang teritoryal nga hurisdiksyon sa mga kahinguhaang lana ug gas sa kadagatan sa Palawan.

6. Dili mamenosan ang gidaghanon sa mga tawo sa Metro Manila pinaagi sa dili matuman nga panaad nga paggastong makapataas og presyo (inflationary spending) alang sa konstraksyon og mga bilding nga pang-opisina sa gobyerno ug mahalon nga mga sentrong pabalay (housing centers) sa uban pang dapit sa nasud. Nagpadayon gihapon ang kagun-ob nga gidulot sa paghugno sa konstraksyon gikan pa niadtong 1987.

7. Ang pagpalambo sa Clark ug Subic dili alang sa kapuslanan sa katawhang Pilipino kundili alang sa kapuslanan sa mga negosyo sa US ug uban pang multinasyonal nga negosyo ug alang sa mga pantalan ug erport sa mga barko ug eroplanong pangmilitar sa US. Apan bisan ang kalamboan alang sa mga langyaw'ng interes gilimitahan sa kasamtangang pangkalibutang depresyon.

8. Ang automation o paggamit og kompyuter sa prosesong elektoral mahimong dugang usab nga tinubdan sa kurakot ug wala gihapon makapugong sa kaylap nga pagpanglimbong nga gihimo sa rehimeng Macapagal-Arroyo. Mahimong iprograma ang mga kompyuter aron mopagawas og malimbongon nga mga resulta sa eleksyon.

9. Plano sa rehimeng Macapagal-Arroyo nga tapuson na ang negosasyong-kalinaw tali sa GRP ug NDFP. Wala kini'y gihimong epektibong lakang aron alkontrahon ang paglakip sa PKP/BHB ug sa chief political consultant sa NDFP sa talaan sa mga "terorista." Wala niini tumana ang saad nga palayaon ang mga binilanggong politikal ug hapsayon ang paghatag og danyos sa mga biktima sa paglapas sa tawhanong katungod ubos sa rehimeng Marcos. Daw irong buang ang militar, kapulisan ug pwersang paramilitari sa GRP sa paglapas sa tawhanong katungod sa tibuok nasud. Nagasabwag sila og dugang inhustisya batok sa katawhang Pilipino. Subay sa pagmando sa US, nagbung-aw na ang pagtapos sa rehimen sa negosasyong-kalinaw.

10. Buot sa rehimeng Macapagal-Arroyo nga makighiusa ug makig-uyon diha sa mga Marcos, Estrada ug Cojuangco apan dili sa naghagong masa sa mga mamumuo ug mag-uuma ug sa mga hatungang saring sa katilingban nga karon mitagamtam og pinakangilngig nga dagway sa pagpanaugdaog ug pagpahimulos. Tungod sa mga kabakakan ug walay pulos nga mga panaad sa rehimeng Macapagal-Arroyo ug sa kamatuoran nga nagkasamot ang panaugdaog ug pagpahimulos, nagalambo ang usa ka lapad nga nagkahiusang prente sa mga patriyotiko ug progresibong pwersa. Nagasulbong ang rebolusyonaryong armadong pakigbisog sa katawhang Pilipino aron hagiton ang tibuok nagharing sistema.