Makapugong ba sa pagsukol sa katawhan ang negosasyong kalinaw tali sa GRP ug NDFP?
Prof. Jose Ma. Sison
National Democratic Front of the Philippines
Chief Political Consultant
Hunyo 27, 2004
Gipugngan ba sa negosasyong kalinaw tali sa GRP ug NDFP ang pagsukol sa katawhan sa rehimeng US-Arroyo? Wala gayud! Makatarunganon ang pagsukol sa katawhan samtang nagtunhay ang sulabing pagpanglupig ug pagpahimulos.
Kung dili sila mosukol, walay paglaom ang katawhan nga kab-oton ang nasudnong kalingkawasan ug demokrasya batok sa imperyalismong US ug sa lokal nga mapahimuslanong mga hut-ong. Mi-uyon ang nagsunod-sunod nga mga reaksyonaryong rehimen sa GRP nga makignegosasyon sa NDFP tungod sa nagkadakong rebolusyonaryong armadong kusog sa katawhan.
Nagkasamot matag adlaw ang sosyo-ekonomikanhon ug politikanhong krisis sa nagharing sistema. Nagladlad kini og paborableng kahimtang alang sa lagsik nga pag-asdang sa duha ka dagway sa pakigbisog batok sa nagharing sistema sa dagkong komprador ug agalong yutaan. Usa niini ang armadong pakigbisog isip prinsipal nga dagway sa pakigbisog. Ang usa pa mao ang ligal nga dagway sa pakigbisog, nga sekondaryo.
Nagpahayag na ang Partido Komunista sa Pilipinas nga pakusgon niini ang rebolusyonaryong armadong pakigbisog pinaagi sa paglunsad og mga taktikal nga opensiba gikan sa mga sentro de grabidad sa Bagong Hukbong Bayan sa ang-ang sa mga rehiyon ug natarang gerilya.
Gilaoman nga mosulbong og maayo ang ligal nga dagway sa pakigbisog tungod sa kasilag sa katawhan diha sa pagpadayon sa usa ka itoy, dunot ug mangtas nga rehimen bunga sa dinagkong pagpanglimbong sa eleksyon sa Mayo 10 ug sa pinakakorap nga paggamit niini sa mga pangpublikong pundo aron modaog sa eleksyon.
Ang gikahimutangan niining krisis ug ang malukpanon nga pagkabangkrap sa reaksyonaryong gobyerno paborable alang sa pagdilaab ngadto sa wala pa katupngi nga mga aksyong protestang masa ug sa pagtukod sa usa ka lapad nga nagkahiusang prente batok sa rehimeng US-Arroyo.
Inay nga mahadlok, nasuko hinuon og maayo ang mabagang masa sa katawhan sa pagpasi-atab sa rehimen nga suportado kini sa imperyalismong US ug andam kini nga mogamit og kabangis batok sa mga lumulupyo nga manghingusog ug mogamit sa ilang demokratikong katungod nga magpahayag, magtapok ug magmartsa.
Ginahagit sa rehimen ang tanang pwersang pangpolitika nga supak niini nga pakusgon ang ilang gimbuhaton sulod sa reaksyonaryong militar ug kapulisan aron pakyason ang laraw sa rehimen nga gamiton sila batok sa katawhan. Anaay posibilidad nga mapalagpot sa gahum ang rehimeng US-Arroyo sa higayon nga bakwion sa reaksyonaryong militar ug kapulisan ang ilang suporta niini.
Nabalita nga aduna na�y usa ka lapad nga nagkahiusang prente sa mga pwersang sibilyan ug mga retiradong opisyal sa militar ug kapulisan nga hingpit nga nanglimbasog na aron danihon ang mga pwersa sa militar ug kapulisan sa nagharing sistema nga suportahan ang demokratikong kalihukang masa sa katawhan ug bakwion ang suporta sa rehimeng US-Arroyo, sama sa nahitabo dihang gipalagpot sila Marcos ug Estrada. ###
Back to top
| 