Napupugngan ba han mga negosasyon pankamurayawan han GRP-NDFP an pag-ato han katawhan?

Prof. Jose Ma. Sison
National Democratic Front of the Philippines
Chief Political Consultant
Hunyo 27, 2004

Napupugngan ba han mga negosasyon pankamurayawan an pag-ato han katawhan ha rehimen US-Arroyo? Waray! Ngan waray gud! Makatadungan an pag-ato han katawhan samtang nakada an ura-ura nga panraradaugdaug ngan paniniyupi.

Kun waray pag-ato, waray paglaum an katawhan nga makakab-ot hin nasudnon nga katalwasan ngan demokrasya kontra ha imperyalismo nga US ngan ha lokal nga magtiyupion nga mga klase. Sunod-sunod nga inuyon an mga reaksyunaryo nga rehimen han GRP ha pakikignegosasyon ha NDFP tungod ha nagtitikadako nga rebolusyonaryo nga armado nga kusog han katawhan.

Kada adlaw nagtitikagrabi an sosyo-ekonomiko ngan pulitikal nga krisis han naghahadi nga sistema. Ini an naghahatag hin magtambok nga mga kundisyon para ha makusog nga pagtubo han duha nga porma han pakigbisog kontra ha naghahadi nga sistema han mga dagko nga komprador ngan agaron maytuna. Syahan an armado nga pakigbisog nga asya an prinsipal nga porma han pakigbisog. Ikaduha amo an legal nga porma han pakigbisog nga asya an segundaryo nga porma.

Nakagpahayag na an Partido Komunista han Pilipinas nga ginpapakusog na hini an rebolusyonaryo nga armado nga pakigbisog pinaagi han paglalansar hin mga taktikal nga opensiba tikang han mga sentro de grabidad han Bagong Hukbong Bayan ha balitang han mga rehiyon ngan prente gerilya.

Gin-aantum nga makusog nga masulong an legal nga porma han pakigbisog tungod ha kangalas han katawhan ha pagpapadayon han niyutiyo, kurap ngan brutal nga rehimen pinaagi han hiluagan nga panlilisbot ha Mayo 10 nga eleksyon ngan ha pinakakurap nga paggamit han mga pundo publiko para ha panalinguha nga magdaug ha eleksyon.

Paborable an mga kundisyon nga krisis ngan an ngatanan-nga-bahin nga pagkabangkrap han reaksyunaryo nga gubyerno para ha pag-uursa han waray pa matupngi nga mga protesta nga aksyon masa ngan para ha pagpapauswag han hiluag nga nagkakaurosa nga prente kontra ha rehimen US-Arroyo.

Waray matarhug an hiluag nga masa han katawhan kundi nangangalas ha paghihinambog han rehimen nga aada ha iya an suporta han imperyalismo nga US ngan andam nga gumamit hin mabangis nga pwersa kontra ha katawhan nga mag-iinsister ngan gumamit han ira mga demokratiko nga katungod nga magpahayag, magtirok ngan magmartsa.

Gin-aayat han rehimen an ngatanan nga mga pulitikal nga pwersa nga kontra ha iya nga pakusgon an ira buruhaton sakob han reaksyunaryo nga militar ngan pulis agud pakyason an larang han rehimen ha paggamit hini kontra ha katawhan. Nakada an posibilidad nga matanggal an rehimen US-Arroyo ha poder kun mawara na ha iya an suporta han reaksyunaryo nga militar ngan pulis.

May-ada na naisumat nga hiluag nga nagkakaurosa nga prente han sibilyan nga mga pwersa ngan han retirado nga mga opisyal militar ngan pulis nga maduruto na nga nagios ha pag-aghat han mga pwersa militar ngan pulis han naghahadi nga sistema nga suportahan an demokratiko nga kagiusan masa han katawhan ngan bawion an suporta nira ha rehimen US-Arroyo, pareho hadton pagrumpag kanda Marcos ngan Estrada. ###

Back to top