Aada ha ilarum han pagdetenir han NPA hi Daniel Velarde ngan ginbibista ha kaso nga paniniktik

Fr. Santiago "Sanny" Salas
Spokesperson in Eastern Visayas
National Democratic Front of the Philippines
Hunyo 17, 2004

Para ha kumpirmasyon, kontaka hi:
Roy Santos, NDF-EV Media Liaison Officer
Cellphone No. 0918-3112138
E-mail: [email protected]

Para tul-iron an datos, gin-aanununsyo han National Democratic Front ha Siniringan Bisayas nga hi Daniel Velarde, usa nga civilian asset han 34th Infantry Battalion, in ha yana aada ha kustudiya han New People's Army ngan nakapailarum hin pagbista atubangan han husgado han katawhan ha sala nga pangingispiya ngan iba pa nga kontra-rebolusyunaryo nga mga aktibidad.

Gin-aresto hi Velarde ha Brgy. San Isidro, Matuguinao, W. Samar han mga Pula nga mangaraway han Arnulfo Ortiz Command hadton Mayo 29 ha mando han rebolusyonaryo nga gubyerno han katawhan. Diri pala maiha tikang hiya maaresto, nagpagawas dayon hin maitum nga propaganda an militar, nga nag-aalegar nga kuno hi Velarde in usa nga kapitan hin barangay ngan an pag-aresto ha iya in kunektado han naglabay nga Mayo 10 nga piniliay tungod kuno han kangalas ha iya han mga NPA.

Ha kamatuoran, hi Velarde in diri upisyal han reaksyunaryo nga gubyerno kundi usa nga binaydan nga goon hin pira nga pulitiko han naglabay nga eleksyon. Ha sugad nga kamutangan, an rebolusyunaryo nga gubyerno han katawhan in diri nagsisirot ha bisan hin-o tungod la han ira pampulitika nga pagkiling kundi tungod han ira kontra-sosyal ngan kontra-rebolusyonaryo nga mga binuhatan. An Arnulfo Ortiz Command, an kustodyan ni Velarde, nagkaklaro nga an pag-aresto ha iya in waray kalabutan ha eleksyon kundi tungod han masunod nga mga rason:

1. Hi Velarde in maiha na nga natudlok han NPA nga espiya para ha militar komo aktibo nga kaapi han kanan 8th Infantry Division pukot hin paniktik ha mga barangay.
2. Damo nga testigo an nakakita kan Velarde nga butad nga nag-gigiya ha mga operasyon militar han mga special operations team han Bravo Company han 34th IB, nga nakabase ha Matuguinao.
3. Hi Velarde in nagbutang ha kadelikaduhan han mga kinabuhi han mga inosente nga sibilyan pinaagi hin panunudlok ha ira ha mga militar komo mga tagsuporta kuno han NPA.
4. Han naglabay nga panahon han pangampanya han Abril-Mayo, hi Velarde ngan an mga militar in nan-harass hin mga tagsuporta hin usa nga karibal nga pulitiko nga kulaos mga simpatisador han NPA, samtang aktibo liwat nga iginkampanya hira Rep. Reynaldo Uy ngan Mayor Jocella Dy han Matuguinao.

Maupay nga pagtratar an iginhahatag kan Velarde ngan gin-gagarantiya ha iya an kaangayan nga proseso ngan patas nga pagbista han iya kaso ilarum han mga balaudnon ngan mga proseso han rebolusyunaryo nga sistema han hustisya. Komo usa nga suspetsado nga ahente ha paniktik han militar, hiya kun sugad in gintatagad - ilarum han internasyunal nga mga balaud ha gerra - diri komo waray-labot nga sibilyan kundi usa nga aktibo nga kaaway nga kombatant ha gerra sibil. Kundi, an rebolusyunaryo nga kagiusan in narespeto ngan nag-gagarantiya han pag-obserbar ngan pagsunod han iya indibidwal nga mga katungod. Hi Velarde in ginbibista tungod han iya pagbutang ha peligro han seguridad ngan pagtalapas niya han mga balaud ngan kahimyangan ha rebolusyunaryo nga teritoryo.

Dugang pa, an NDF ha Sinirangan Bisayas nagkaklaro nga an NPA in waray kalabutan ha pagsikmit hin upat nga tawo ha Brgy. Libertad, Matuguinao ngan ginkokonsidera ini nga akusasyon komo usa na liwat nga desperado nga maitum nga propaganda han militar. An NPA in diri basta-basta nga nag-aaresto hin bisan la hin-o kundi in gin-aawtorisa ngan nakarawat han kaangayan nga mga kasuguanan tikang ha rebolusyunaryo nga gobyerno han katawhan ha takna nga gintutuinan ini nga mag-aresto hin suspetsado. Lugod maaram ngan ginkokondena han rebolusyunaryo nga kagiusan an pira nga pulitiko ngan mga armado nga goons hini nga amo an tinuod nga responsable han nasabi nga mga panikmit. #

Back to top